Sekuphele iminyaka lengetulu kwa-130 BoFakazi BaJehova bahlangana ndzawonye njalo ngemnyaka emihlanganweni yesifundza. Lemihlangano iba netinkhulumo letingetulu kwa-40, umculo, tincociswano nema-video. Kuze lomhlangano uzuzise futsi ukhutsate labo labakuwo, kufanele ‘bawuve futsi bawubone’ kahle. (Lukha 2:20) Iminikelo yenu isetjentiswa njani kuze bonkhe labeta kulemihlangano bazuze ngisho nome lomhlangano ukuliphi live?

 Tinkhundla temidlalo kanye netindzawo letinyenti leticashwako lamuhla letisemaveni latfutfukile tinayo imishini ye-audio/video. Kodvwa yini lesenta sisebentise imishini yetfu nasicashe letindzawo? David, losebenta ne-World Headquarters Broadcasting Department, utsi: “Timbalwa tindzawo lesiticashako letinemishini levumela kutsi umhlangano ulaleleke kahle sikhatsi lesidze. Sibonelo nje, tinkhundla temidlalo tisebentisa imishini yato kuze tente timemetelo letimfisha nome kuze tidlale umculo lomfisha, kantsi imishini yato yema-video yentelwe kuveta imiphumela yemidlalo, tekutsengiselana (advertisements) kanye nekuphindza ticephu temdlalo (replays). Ngalokwehlukile, tsine sifuna labete emihlanganweni yetfu babukele ema-video ladlala sikhatsi lesidze, beve kahle baphindze bacondze konkhe lokushiwo sikhulumi.

 Tindzawo lokubanjelwa kuto imihlangano yesifundza atifani, kungako lemishini ye-audio/video kufanele yentiwe ilungele kusetjentiswa endzaweni yemhlangano ngamunye. Ngekushesha nje nasetitfolakele letindzawo lapho kutawubanjelwa khona lemihlangano, ematiko aka-Broadcasting lasemahhovisini emagatja ayabuka kutsi labatawubakhona kulemihlangano batawuhlala kuphi, kuye ngekutsi balindzele kutsi babe bangakhi nekutsi lendzawo yinkhulu kangakanani. Bazalwane babese benta tibalo tekutsi tipikha kanye nema-screen kutawubekwa kuphi futsi kutawuchunyaniswa njani. Labazalwane baphindze bente neluhla lwetintfo letitawudzingeka kuze wonkhe muntfu akhone kuwubukela nekuva kahle lomhlangano.

 Lokusebenta kwalemishini ye-audio/video kuba yinkimbinkimbi kakhulu etindzaweni lapho lomhlangano utawube ungetilwimi letehlukahlukene. Nangabe lomhlangano utawuhunyushelwa kuletinye tilwimi, labo labahumushako kudzingeka bolubone futsi baluve kahle loluhlelo kuze loko labakuhumushako kusakatwe kubantfu labeva lololwimi. Ngenca yemishini yekudlala ema-video letfutfuke kakhulu leyenta kutsi ne-audio ihambisane ne-video, labo labakhona emhlanganweni bayakhona kubukela ema-video baphindze beve ne-audio ngasikhatsi sinye ngetilwimi letehlukahlukene. David utsi: “Lemishini iyinkimbinkimbi, kungako emavolontiya layisebentisako kudzingeka aceceshwe kahle.”

 Emahhovisi eligatja lamanyenti anemishini ye-audio/video lesetjentiswa minyaka yonkhe. Kulawo magatja, bazalwane baye bahlele kutsi lemishini isuswa njani kulomunye umhlangano iyiswe kulomunye. Ligatja lase-United States isebentisa imali lengetulu kwa-$200 000 a njalo ngemnyaka kuze lihambise lemishini letawusetjentiswa emihlanganweni yesifundza ensimini yeligatja layo. Lemali lena yincane nayicatsaniswa naleyo beyitawusetjentiswa kube bekutsengwa futsi kunakekelwe lemishini emhlanganweni wesifundza ngamunye. Steven, lobekasita ka-audio/video kulomunye umhlangano wesifundza lebewuseCanada, utsi: “Bazalwane nabodzadze lebebasebenta ka-audio/video basebenta kamatima kuze onkhe emathulusi alemishini, ngisho nalamancane lanjengetintsambo nemabhawodi, kuyatiwa kutsi kukuphi, kunakekelwa kahle futsi kupakishwa kahle kuze kulungele kuhanjiswa kuyiswe emhlanganweni wesifundza lolandzelako.”

 Kucasha imishini ye-audio/video kudule kakhulu, futsi esikhatsini lesinyenti ukhandza kutsi ayikho ezingeni lelisetulu nome ayinakekelwa kahle. Ngenca yaleso sizatfu, siyayitsenga lemishini lesiyidzingako. Kwanyalo, lescreen lesikhulu (LED video wall) lengu-5 wemamitha kuphakama, 3 wemamitha budze, icishe ibite $24 000, kantsi intsambo yinye yembhobho lengu-15 wemamitha icishe ibite $20. Ngenca yaloko litiko laka-Broadcasting lisebentisana nelitiko letekutsenga kuze ‘kubalwe tindleko’ ngaphambi kwekutsenga lemishini. (Lukha 14:28) Sibonelo nje, ngaphambi kwekutsi kutsengwe lemishini, kuyabukwa kutsi bangakanani bantfu labatawuzuza kuyo? Kudzingekile yini vele kutsi kutsengwe imishini lemisha? Ikhona yini indzawo leyenele nobe lekahle yekubeka lemishini, nekutsi bakhona yini labaceceshiwe labangayinakekela?

 Kuze lemishini ye-audio/video ihlale sikhatsi lesidze futsi kongiwe neminikelo, sihlale siyihlola njalo kuze silungise nalapho kudzingeka khona. Nayihanjiswa lemishini ifakwa emabhokisini lakhiwe ngetintfo leticinile kuze ingalimali futsi lamabhokisi anakekelwa njalo kuze ahlale asesimeni lesikahle.

 Lemishini ye-audio/video lesiyisebentisa emihlanganweni yetfu yesifundza ibamangalisile bantfu labangesibo boFakazi. Sibonelo nje, kulomunye umhlangano wesifundza, lesinye sisebenti senkapani lenkhulu lesakatako futsi leyatiwako samangaliswa yindlela loluhlelo lolukhicitwa ngayo. Jonathan losita ekuhlanganiseni nasekusetjentisweni kwemishini ye-audio/video emihlanganweni yesifundza utsi, “lesisebenti salenkapani samangala nasiva kutsi labazalwane nabodzadze lebebenta lomsebenti bebangakawufundzeli kodvwa bebamane nje bangemavolontiya.” Saphindze satsi, “bekungatsatsa emalanga lasihlanu kutsi inkapani yaso ihlanganise lemishini, tsine lesiyihlanganise ngelilanga linye nje kuphela.” Kulomunye umhlangano wesifundza umphatsi walendzawo lebesiyicashile watsi, “banyenti bantfu labasebenta ngemculo nema-video labasebentise lendzawo kodvwa angikase ngababona bawenta kahle njengani umsebenti wabo.”

 Lemishini ye-audio/video ikusite njani wena kutsi uzuze emhlanganweni wesifundza? Kungenteka utiva ngendlela David lohlala eNgilandi lativa ngayo. Utsi: “Ngineminyaka lengu-88, futsi imihlangano yesifundza ngiyihambe kuphila kwami konkhe. Nyalo sekumelula kakhulu kutsi ngilalelisise emhlanganweni. Lama-video lamahle lesiwabukelako enta ngive ungatsi lomhlangano sewusheshe uphele, umlayeto lowendluliselwa ngulama-video ucacile futsi uyazuzisa.” Michael lohlala eNigeria yena utsi, “Ngenca yekutsi sekumelula ngebazalwane betfu kutsi beve sikhulumi baphindze babukele nema-video sebayakhona kulalelisisa emihlanganweni futsi netingcondvo tabo tingazuli.”

 Njengobe uya emhlanganweni wesifundza nobe lokhetsekile lonesihloko lesitsi “Memetela Tindzaba Letimnandzi!,” cabangisisa ngemsebenti lowentiwe kuze ukhone kuva uphindze ulubukele kahle loluhlelo. Yiminikelo yenu lesisita sikhone kwenta konkhe loku. Sibonga kakhulu ngayo, lokufaka ekhatsi leyo leniyenta nisebentisa i-website letsi donate.dan124.com.