“Ngiyalitsandza liHholwa letfu leMbuso!” kusho Nicole, dzadze losemusha waseColombia. “Liyindzawo lapho ngijabulela khona kuba nebazalwane nabodzadzewetfu.” Nawe utiva njengaNicole yini?

 BoFakazi BaJehova emhlabeni wonkhe bahlangana emaHholweni eMbuso lacishe abe ngu-63 000. Letakhiwo atigcini nje ngekuba tindzawo letikahle tekukhontela Nkulunkulu, kodvwa tenta lokungetulu kwaloko. David, lihlahlandlela lelivamile laseColombia utsi: “LiHholwa letfu leMbuso lihlobisa loko lesikufundzisako. Bantfu labanyenti nabasivakeshele bayamangala kubona indlela lamaHholwa etfu lanakekeleke kahle ngayo.” Loku akutentakaleli nje, kodvwa sisebenta kamatima kuze siwahlante siphindze siwanakekele. Yini lesisita sikhone kukwenta loku?

 Emabandla lasebentisa liHholwa leMbuso ngiwo lanemsebenti wekulinakekela. Kungako bazalwane nabodzadze baligcina lihlobile, balinakekela futsi balungisa netintfo letincane letidzinga kulungiswa.

 Kuze isite emabandla anakekele emaHholwa awo eMbuso, litiko laka-Local Design/Construction (LDC) likhetsa bazalwane labatawucecesha labanye ngetindzaba tekunakekela letakhiwo. Umzalwane locecesha labanye ngekunakekela letakhiwo ubuka kunakekelwa kwemaHholwa eMbuso langaba ngu-6 kuya kulangu-10. Uyawavakashela aphindze aceceshe bamemeteli labasebentisa leloHholwa kutsi bangalinakekela njani. Njalo ngemuva kweminyaka lemitsatfu uhlolisisa sakhiwo ngasinye kuze abone kutsi kute yini tinkinga letikhona letidzinga kulungiswa.

 Bazalwane nabodzadze bayabonga ngalokuceceshwa labakutfolako. Indhumathi, dzadze wase-India, utsi: “Sakujabulela lokuceceshwa. Bekumnandzi kufundza ngendlela lesingaligcina ngayo lihholwa letfu lisesimeni lesikahle.” Evans, umzalwane waseKenya, utsi: “Sifundze indlela yekubalekela tindleko letisetulu ngekulungisa tinkinga tisetincane.”

 Kusebentisa kanye nekunakekela emaHholwa eMbuso kungabita emakhulu kuya etinkhulungwaneni tema-dollar a njalo ngemnyaka, kuye ngekutsi liHholwa likuyiphi indzawo, selibe khona sikhatsi lesingakanani nekutsi mangakhi emabandla lalisebentisako. Tinakekelwa njani letindleko?

 Kunakekelwa kwemaHholwa eMbuso kusekelwa ngeminikelo. Alexander, umzalwane waseKazakhstan, utsi: “Lenye incenye yalemali isetjentiselwa kubhadalela i-internet, emanti kanye nagesi kantsi lenye isetjentiselwa kutsenga kwekusula tandla, ema-gloves, tintfo tekuhlanta napende.” Imali lesalako inikelelwa umsebenti wemhlaba wonkhe kuze kusitwe emisebentini lemikhulu nalebitako yekunakekela takhiwo tenhlangano emhlabeni wonkhe.

 Nangabe kunakekelwa kweliHholwa leMbuso kutawudzinga imali lengetulu kwaleyo bazalwane labavame kuyisebentisa ngetinyanga letimbili nome letintsatfu, labadzala belibandla bakhuluma nemzalwane we-LDC locecesha ngetindzaba tekunakekela takhiwo. Nangabe i-LDC ivuma kutsi kuchutjekwe nalomsebenti, ngalokuvamile ukhokhelwa ngeminikelo leyentelwe umsebenti wemhlaba wonkhe. Ngemnyaka wemsebenti wanga-2023, kwaba nemisebenti lenjalo leyentiwa lengu-8 793 leyabita $76.6 million. Nati tibonelo letimbili.

 Lelinye liHholwa leMbuso lase-Angola lelineminyaka lengu-15, beselinetinkinga letinyenti. Bekudzingeka tintsambo tagesi letinsha, kulungiswa kwetibondza letichekekile, kanye nekulungisa inkinga yemanti emvula lasuka eHholweni ageletele kubomakhelwane. I-LDC yahlela kutsi letinkinga tilungiswe. Lomsebenti wabita $9 285. Bomakhelwane babonga futsi yabajabulisa indlela lomsebenti lowentiwa ngayo.

 EPoland, lelinye liHholwa leMbuso belineluphahla loluvutako futsi i-carpet yalo beseyonakele kakhulu kangangekutsi beyingeke isasebentiseka. I-LDC yavuma kutsi kulungiswe loluphahla ngendlela yekutsi lungaphindzi luvutise emanti kuphindze kufakwe i-carpet lensha. Lomsebenti wabita $9 757. Ngenca yalomsebenti, kutawutsatsa sikhatsi lesidze kutsi leliHholwa liphindze lidzinge kulungiswa.

 Kunakekelwa kwemaHholwa eMbuso akugcini nje ngekonga iminikelo, kodvwa kuphindze kudvumise ligama laJehova. Shaun lomunye umzalwane waseTonga utsi: “Ngenca yekuwanakekela kahle emaHholwa etfu eMbuso siyakhona kukhontela Jehova endzaweni lehlantekile nalesesimeni lesikahle futsi lelimelela kahle ligama lakhe emmangweni. Site emahloni ekumemela bantfu eHholweni letfu leMbuso.”

 Sonkhe singasita ekuhlanteni nasekunakekeleni indzawo yetfu yekukhontela Jehova. Marino, umzalwane we-LDC locecesha ngetindzaba tekunakekela takhiwo e-Australia utsi: “Sonkhe singaba nencenye kulomsebenti lojabulisako wekunakekelwa kwemaHholwa eMbuso. Ngekwenta njalo, sisita ekongeni imali kuze isetjentiswe lapho idzingeke kakhulu khona.”

 Lomunye umzalwane wase-India lokutsiwa nguJoel, uyakujabulela kunakekela liHholwa labo leMbuso. Utsi: “Kusebenta nebazalwane kanye nabodzadzewetfu kunginiketa sitfombe sekutsi kutobanjani eveni lelisha.” Nicole, lesike sakhuluma ngaye, utsi: “Ngesikhatsi bazalwane balungisa tindlu tangasense lebetivutisa emanti, ngasita ekuwasuleni. Ngisho nobe ngingazange ngibe nesandla ekulungiseni lenkinga, kodvwa ngasita kutsi kubebete lolimalako.”

 Nawufuna kuvolontiya kuze usite ekunakekelweni kwemaHholwa eMbuso, khuluma nalabadzala belibandla lokulo. Ngetulu kwaloko, umnikelo wakho ungasita ekunakekeleni liHholwa lenu leMbuso kanye nalamanye lasemhlabeni wonkhe. Leminikelo ingentiwa emabhokisini emnikelo laseHholweni leMbuso nobe ku-website letsi donate.dan124.com. Sinibonga kakhulu ngekwephana kwenu.