HLALANI NILINDZILE!
2023: Umnyaka Lobangele Kukhatsateka Lokunyenti—Litsini LiBhayibheli?
Tintfo letenteke nga-2023 tifakazele kutsi siphila esikhatsini liBhayibheli lelisibita ngekutsi ‘ngemalanga ekugcina.’ (2 KuThimothi 3:1) Naka kutsi tintfo letentekako nyalo tifana njani naleto liBhayibheli lelatsi titowenteka esikhatsini setfu.
LiBhayibheli netintfo letenteka emhlabeni
‘Timphi etindzaweni letehlukahlukene.’—Matewu 24:6.
“Tiyaluyalo letihambisana nebudlova setiyandza emaveni lamanyenti.” a
Buka sihloko lesitsi “Ngubani Lotawusindzisa Bantfu Labangenacala?” kanye nalesitsi “Kusetjentiswe Imali Lengetulu Kwa-$2 Trillion Kuze Kusekelwe Timphi .”
“Kutamatama kwemhlaba etindzaweni letehlukahlukene.”—Makho 13:8.
“Kube nekutamatama kwemhlaba lokungu-13 lokungetulu kwa-7 magnitude etindzaweni letehlukahlukene emhlabeni wonkhe kusukela kwacala 2023. Leli ngulelinye lemanani lasetulu labe khona ngemnyaka munye nje kuphela kusukela kwacalwa kugcinwa emarekhodi.” b
Buka sihloko lesitsi “Kutamatama Kwemhlaba Lokukhulu ETurkey NaseSyria.”
“Tintfo letetfusako.”—Lukha 21:11.
“Sikhatsi semalanga ekushisa sesendlulile, nyalo sekungena sikhatsi semalanga ekubila.”—António Guterres, lowengamele inhlangano yaMhlabuhlangene. c
Buka sihloko lesitsi “Kushisa Lokukhulu Kwasehlobo Langa-2023.”
“Indlala.”—Matewu 24:7.
“2023: Ube ngulomunye umnyaka lomatima kulabo labakutfola kumatima kondla imindeni yabo.” d
Buka sihloko lesitsi “Kuswelakala Kwekudla Emhlabeni Wonkhe Kubangwa Yimphi Kanye Nekushintja Kwesimo Selitulu.”
“Tikhatsi letibucayi lokumatima kubhekana nato.”—2 KuThimothi 3:1.
“Umuntfu munye kulabangu-8 emhlabeni wonkhe, unesifo sekucindzeteleka.” e
Buka sihloko lesitsi “Kwenyuka Kwetinkinga Tekucindzeteleka Kubantfu Labaseminyakeni Yekutfomba.”
Yini lesingayilindzela emnyakeni wa-2024?
Kute lowatiko kutsi 2024 usiphatseleni. Nobe kunjalo, tintfo letenteka emhlabeni tikhombisa kutsi madvutane, uMbuso waNkulunkulu nobe hulumende wasezulwini, utawutsatsa sikhundla sabohulumende bebantfu futsi ucedze tonkhe tintfo letisibangela kuhlupheka nekukhatsateka.—Danyela 2:44; Sembulo 21:4.
Njengobe sisamele loko kutsi kwenteke, nakufika kukhatsateka, singetsembela kuNkulunkulu kutsi asisite. LiBhayibheli litsi:
“Nangesaba, ngivele ngetsembele kuwe.”—Tihlabelelo 56:3.
Sikhombisa njani kutsi setsembele kuNkulunkulu? Sikumema kutsi ufundze lokunyenti ngesetsembiso seliBhayibheli lesimayelana nelikusasa lelite kuhlupheka. Dadisha natsi liBhayibheli mahhala kuze ubone kutsi wena nemndeni wakho ningazuza njani etetsembisweni teliBhayibheli.
a Magazini i-Foreign Affairs, “A World at War: What Is Behind the Global Explosion of Violent Conflict?” lebhalwe ngu-Emma Beals naPeter Salisbury, nga-October 30, 2023.
b I-Earthquake News, “Year 2023: Number of Major Earthquakes on Course for Record,” yaMay, 2023.
c United Nations, “Secretary-General’s Opening Remarks at Press Conference on Climate,” ngaJuly 27, 2023.
d I-World Food Programme, “A Global Food Crisis.”
e I-World Health Organization, “World Mental Health Day 2023,” nga-October 10, 2023.
Lokunye Longatsandza Kukuhlola
LETINYE TIHLOKO
Litsemba Sibili Ngelikusasa Lelihle
Yini leyenta tetsembiso letiseBhayibhelini tehluke kunaleto letentiwa bantfu?
TIMFUNDZISO TELIBHAYIBHELI LETIBALULEKILE
Uyini UMbuso WaNkulunkulu?
Ngesikhatsi alapha emhlabeni, Jesu bekafundzisa kakhulu ngeMbuso waNkulunkulu kwendlula nobe ngabe yini lenye. Sekuphele iminyaka leminyenti bantfu bathantazela kutsi loMbuso ufike.
MAYELANA NATSI
Cela Kuvakashelwa
Coca ngembuto lomayelana neliBhayibheli nobe ufundze lokunyenti ngaBoFakazi BaJehova.
