Ucabanga kutsi timo tiyoke tishintje yini emhlabeni? Bantfu labanyenti bacabanga kutsi titoshintja ngisho nobe babhekana netinkinga letinyenti lamuhla. Kodvwa nasesikhuluma emaciniso singalindzela yini kutsi timo tibe ncono? Yebo! LiBhayibheli lisiniketa litsemba sibili ngelikusasa.

•  LiBhayibheli lisiniketa liphi litsemba?

•  Ungakwetsemba yini loko lokwetsenjiswa liBhayibheli?

•  Nkulunkulu utakufeza njani loko lakwetsembisile?

•  Sitawugcwaliseka nini lesetsembiso?

•  Kungakusita njani loko liBhayibheli lelisetsembisa kona lamuhla?

 LiBhayibheli liyavuma kutsi bantfu babhekene netinkinga letimatima. Nobe kunjalo, lisetsembisa kutsi letinkinga angeke tihlale tikhona kuze kube phakadze. Cabanga nganati tibonelo letimbalwa.

•   Inkinga: Kuba bete indzawo yekuhlala

   Lokushiwo liBhayibheli: “Bayawukwakha tindlu bahlale kuto.”​—Isaya 65:21.

   Lokukushoko ngelikusasa: Bantfu batawuba nemakhaya abo.

•   Inkinga: Kweswelakala kwemsebenti nebuphuya

   Lokushiwo liBhayibheli: “Umsebenti wetandla tebantfu bami lengibakhetsile uyawubajabulisa kakhulu.”​—Isaya 65:22.

   Lokukushoko ngelikusasa: Bonkhe bantfu batawuba nemsebenti lowenetisako labawujabulelako nalotobazuzisa.

•   Inkinga: Kungalungi

   Lokushiwo liBhayibheli: “Netikhulu titawubusa ngendlela lelungile.”​—Isaya 32:1.

   Lokukushoko ngelikusasa: Bantfu ngeke basaphatfwa kabi ngenca yebuhlanga, buve babo, kutsi banayo yini imali nobe bete, futsi kute lotawuphuya.

•   Inkinga: Kungondleki kahle kanye nendlala

   Lokushiwo liBhayibheli: “Kutawuba nenala yekudla emhlabeni; kube kunyenti ngisho naseticongweni tetintsaba.”​—Tihlabelelo 72:16.

   Lokukushoko ngelikusasa: Kutawuba nekudla lokunemphilo lokwenele bonkhe bantfu. Kute lotawulamba nobe angondleki kahle.

•   Inkinga: Bugebengu kanye nebudlova

   Lokushiwo liBhayibheli: “Nguloyo naloyo utawuhlala ngephansi kwesihlahla sakhe semagilebisi nangephansi kwesihlahla sakhe semakhiwa, futsi kute lotabesabisa.”​—Mikha 4:4.

   Lokukushoko ngelikusasa: Wonkhe muntfu utotiva alondzekile futsi aphephile ngobe bantfu lababi batawube bangasekho, bantfu “labalungile batawudla lifa lemhlaba.”​—Tihlabelelo 37:10, 29.

•   Inkinga: Imphi

   Lokushiwo liBhayibheli: “Sive ngeke siphindze silwe nalesinye sive, futsi ngeke tiphindze ticeceshelwe kulwa imphi.”​—Isaya 2:4

   Lokukushoko ngelikusasa: Kutawugcwala kuthula emhlabeni. (Tihlabelelo 72:7) Kute lotawufelwa sihlobo sakhe ngenca yetimphi nobe labatawubaleka emaveni abo ngenca yato.

•   Inkinga: Kugula kanye netifo

   Lokushiwo liBhayibheli: “Kute lohlala khona loyawutsi: ‘Ngiyagula.’”​—Isaya 33:24.

   Lokukushoko ngelikusasa: Bantfu angeke bakhubateke nobe bagule (Isaya 35:5, 6) LiBhayibheli lize letsembisa kutsi “kufa ngeke kusaba khona.”​—Sembulo 21:4.

•   Inkinga: Kulinyatwa kwemhlaba

   Lokushiwo liBhayibheli: “Lihlane nendzawo leyomile kutawujabula, indzawo lebekile lelugwadvule itawujabula kakhulu, ichakaze njengembali.”​—Isaya 35:1.

   Lokukushoko ngelikusasa: Injongo yaNkulunkulu yasekucaleni yekutsi bantfu bahlale emhlabeni lolipharadisi itawugcwaliseka.​—Genesisi 2:15; Isaya 45:18.

 Ecinisweni, ungakwetsemba. Nobe kunjalo, sicela uhlolisise loko liBhayibheli lelikushoko ngelikusasa. Leni? Ngobe tetsembiso letiseBhayibhelini atifani naleto letentiwa bantfu. Tetsembiso letiseBhayibhelini tivela kuNkulunkulu. Naka kutsi yini leyenta letetsembiso tehluke:

•   Nkulunkulu wetsembekile. LiBhayibheli litsi Nkulunkulu ‘angeke acale emanga’ (KuThithusi 1:2) Ngetulu kwaloko, nguNkulunkulu kuphela longaphrofetha ngelikusasa. (Isaya 46:10) LiBhayibheli linetibonelo letinyenti letifakazela kutsi loko Nkulunkulu lakuphrofethako ngelikusasa kuyenteka. Kuze utfole lokunyenti, bukela i-video lenesihloko lesitsi Yini Lengasenta Sikholwe Kutsi LiBhayibheli Liliciniso?

•   Nkulunkulu unawo emandla ekusombulula tinkinga tetfu. LiBhayibheli litsi Nkulunkulu unemandla ekwenta “konkhe lafuna kukwenta.” (Tihlabelelo 135:5, 6) Loku kusho kutsi kute lokungavimba Nkulunkulu kutsi afeze tetsembiso takhe. Ngetulu kwaloko Nkulunkulu ufuna kusisita ngobe uyasitsandza.​—Johane 3:16..

 Kungenteka uyatibuta kutsi, ‘Nangabe Nkulunkulu uyafuna kusisita futsi unawo nemandla ekwenta njalo, kungani sichubeka sibhekana netinkinga letinyenti?’ Kuze siphendvule lombuto, bukela i-video letsi Kungani Nkulunkulu Avumela Kuhlupheka?

 Nkulunkulu utawusebentisa uMbuso wakhe lokunguhulumende wasezulwini kuze afeze tetsembiso takhe. Ubeke Jesu Khristu kutsi abe yiNkhosi yaloMbuso futsi umnike emandla ekunakekela umhlaba nebantfu labaphila kuwo. Ngesikhatsi Jesu alapha emhlabeni welapha labagulako, wapha labalambile kudla, walawula simo selitulu futsi wavusa ngisho nebantfu labafile. (Makho 4:39; 6:41-44; Lukha 4:40; Johane 11:43, 44) Ngaloko lakwenta wakhombisa loko latakwenta nasekabusa njengeNkhosi yeMbuso waNkulunkulu.

 Kuze ufundze lokunyenti ngalotakuzuza nasekubusa uMbuso waNkulunkulu, bukela i-video letsi Uyini UMbuso WaNkulunkulu?

 Madvutane! Yini lengasenta siciniseke? LiBhayibheli laphrofetha ngetintfo lebesitawubona ngato kutsi uMbuso waNkulunkulu sewutawucala kubusa emhlabeni. (Lukha 21:10, 11) Letintfo sesiyatibona tenteka.

 Kuze utfole lokunyenti, fundza sihloko lesitsi “UMbuso WaNkulunkulu Utawubusa Nini Emhlabeni?””

 Lomunye umbhali weliBhayibheli wafananisa litsemba lesilitfola eBhayibhelini ‘nelihhuka lemkhumbi emiphefumulweni yetfu.’ (KumaHebheru 6:19) Njengoba lihhuka lisita umkhumbi kutsi ungaphephuki nakunesiphepho, kanjalo nelitsemba lesilitfola eBhayibhelini ngelikusasa lisisita sikhone kubhekana netinkinga. Litsemba lingavikela ingcondvo yetfu kanye nemphilo yetfu.​—1 KubaseThesalonika 5:8