YINI loyitsandza kakhulu emkhatsini wekusebenta nekudlala?— Ecinisweni, kudlala akusiyo intfo lembi. LiBhayibheli lisho naku lokulandzelako ngeliJerusalema: “Titaladi telidolobha tiyawuphitsitela bafana nemantfombatana.”​—Zakhariya 8:5.

Umfundzisi Lomuhle Kakhulu wakujabulela kubukela bantfwana nabadlala. Ngesikhatsi asengaketi emhlabeni, watsi: “Ngangiseceleni kwakhe [Nkulunkulu], njengengcweti yekwakha. Nganginentfokoto lenkhulu onkhe emalanga.” Phawula kutsi Jesu bekasisebenti naJehova ezulwini. Ngalesikhatsi asasezulwini, watsi: “Ngijabulela bantfu bonkhe.” Njengobe sifundzile, Umfundzisi Lomuhle Kakhulu bekabatsandza bonkhe bantfu, lokufaka ekhatsi bantfwana.​—Taga 8:30, 31.

 Ucabanga kutsi Jesu bekadlala yini nakasengumntfwana?— Kungenteka bekakwenta loko. Njengobe ‘bekayingcweti’ ezulwini ,waphindze wasebenta yini nakasemhlabeni?— Jesu bekabitwa ngekutsi ‘yindvodzana yembati.’ Bekaphindze abitwe ngekutsi ‘ungumbati.’ Kukhombisani loku?— Kukhombisa kutsi Josefa, babe lowakhulisa Jesu njengendvodzana yakhe wamfundzisa. Ngaleyondlela Jesu naye waba ngumbati.​—Matewu 13:55; Makho 6:3.

Jesu bekangumbati lonjani?— Njengobe bekayingcweti ezulwini, awucabangi yini kutsi nakasemhlabeni bekangumbati lonelikhono?— Cabanga ngekutsi bekumatima kangakanani kuba ngumbati ngesikhatsi saJesu. Kungenteka bekudzingeka kutsi Jesu ahambe aye ehlatsini ayogawula sihlahla, asijube sibe tingodvo,  bese uyatitfwala aye nato ekhaya afike atibate kahle kuze ente ematafula, emabhentji kanye naletinye tintfo.

Ucabanga kutsi lomsebenti Jesu labekawenta wamletsela injabulo yini?— Wena ungajabula yini nangabe ungabata ematafula lamahle, titulo kanye naletinye tintfo letisetjentiswa bantfu?— LiBhayibheli litsi kuhle kutsi umuntfu “atijabulise ngemsebenti wakhe lawentako.” Umsebenti ukuniketa luhlobo lolutsite lwenjabulo longeke uyitfole nawudlala.​—Umshumayeli 3:22.

Kuliciniso kutsi umsebenti uzuzisa tingcondvo kanye nemitimba yetfu. Bantfwana labanyenti bamane bahlale babukele iTV nobe badlale imidlalo yema-video. Bakhuluphala kakhulu baphindze babe bete emandla futsi abajabuli. Futsi ababajabulisi nalabanye bantfu. Yini lokudzingeka siyente kuze sijabule?—

Sifundzile eSehlukweni 17 salencwadzi kutsi kupha kanye nekwenta tintfo letinhle kuze sisite labanye kuletsa injabulo. (Imisebenti 20:35) LiBhayibheli libita Jehova ngekutsi ‘nguNkulunkulu lojabulako.’ (1 Thimothi 1:11) Njengobe sifundzile kuTaga, Jesu ‘bekajabula embikwakhe njalonjalo.’ Yini leyabangela Jesu wajabula?— Wasiniketa lesinye setizatfu nakatsi: “Babe solo usasebenta nanyalo, nami ngiyasebenta.”​—Johane 5:17.

Ngesikhatsi Jesu asemhlabeni, akazange abe ngumbati imphilo yakhe yonkhe. Jehova Nkulunkulu bekanemsebenti lokhetsekile lawunika Jesu kutsi awente nakasemhlabeni. Uyawati yini loyo msebenti?— Jesu watsi: “Kufanele ngitishumayele letindzaba letimnandzi teMbuso waNkulunkulu, ngobe nguloko lengatfunyelwa kona.” (Lukha 4:43) Ngalesinye sikhatsi Jesu washumayela bantfu, bamkholwa futsi batjela labanye ngetintfo labekabatjele tona, njengalomfati longumSamariya lombona kulesitfombe.​—Johane 4:7-15, 27-30.

Kwamphatsa njani Jesu kwenta lomsebenti? Ucabanga kutsi bekafuna yini kuwenta?— Jesu watsi: “Kudla kwami kwenta intsandvo yaloyo longitfumile nekutsi ngicedze umsebenti wakhe.” (Johane 4:34)  Utsandza kukudla kangakakani kudla lokutsandzako?— Loku kusiniketa umcondvo wekutsi Jesu bekawutsandza kangakakanani umsebenti Nkulunkulu labekamnikete wona.

Nkulunkulu wasidala ngendlela yekutsi kufundza kwenta umsebenti kusente sijabule. Nkulunkulu utsi sipho lasinikete umuntfu kutsi “ajabule emsebentini wakhe.” Ngako nangabe ufundza kusebenta nawusengumntfwana, imphilo yakho yonkhe itawujabulisa kakhulu.​—Umshumayeli 5:19.

Loko akusho kutsi umntfwana kufanele ente umsebenti wemuntfu lomdzala, kodvwa sonkhe kufanele sente umsebenti lotsite. Batali bakho kungenteka bavukela emsebentini malanga onkhe kuze batfole imali yekunakekela umndeni wakini ngekudla, kanye nekutsi ube nelikhaya lekuhlala. Njengobe wati, munyenti umsebenti lodzinga kwentiwa ekhaya kuze lihlale licocekile futsi lihlantekile.

Ngumuphi umsebenti lokhona longawenta longazuzisa wonkhe umndeni?— Ungasita ekuhleleni litafula, uwashe tindishi, ulahle tibi, uhlante likamelo lakho uphindze ugcogce emathoyisi akho. Kungenteka kutsi sewuvele uyatenta letinye taletintfo. Loyo msebenti usibusiso mbamba emndenini wakini.

Asesibone kutsi umsebenti lonjalo usibusiso kanjani. Emathoyisi kudzingeka kutsi abekwe endzaweni lefanele ngemuva kwekudlala ngawo. Ucabanga kutsi kungani loko kubalulekile?— Kusita ekugcineni indlu ihlelekile futsi kungaphindze kuvikele tingoti. Nangabe ungawabeki endzaweni yawo emathoyisi akho, make wakho angase achamuke etfwele matima bese unyatsela lelinye lawo. Kungenteka agileke awe aphindze atilimate. Kungase kudzingeke kutsi aye ngisho nasesibhedlela. Bekungaba yintfo lembi leyo angitsi?— Ngako-ke nangabe utsatsa emathoyisi akho uyowabeka endzaweni lefanele ngemuva kwekudlala ngawo, kungaba sibusiso kubo bonkhe.

Kunalomunye umsebenti bantfwana labanawo. Sibonelo saloko ngumsebenti wesikolwa. Esikolweni ufundza indlela yekufundza. Labanye  bantfwana bakutfola kumnandzi kufundza kantsi labanye batsi kulukhuni. Ngisho noma kungabonakala kulukhuni ekucaleni, utawujabula nasewukwati kufundza kahle. Tinyenti tintfo letijabulisako longakhona kutifundza. Utawukhona ngisho nekutifundzela incwadzi yaNkulunkulu, liBhayibheli. Ngako nawuwenta kahle umsebenti wakho wesikolwa loko kutakuzuzisa, angitsi kunjalo?—

Kunalabanye bantfu labawubalekelako umsebenti. Kungenteka uyamati muntfu lowenta njalo. Njengobe Nkulunkulu asidala kuze sisebente, kumelwe sifundze indlela yekukujabulela. Umfundzisi Lomuhle Kakhulu wawujabulela kangakakani umsebenti wakhe?— Wawufanana nekudla kudla lakutsandza kakhulu. Ngumuphi umsebenti labekakhuluma ngawo?— Kutjela labanye ngaJehova Nkulunkulu nendlela labangatfola ngayo kuphila lokuphakadze.

Naku lokungasisita kuze sijabulele umsebenti. Tibute kutsi ‘kungani lomsebenti kudzingeka wentiwe?’ Nangabe sewati kutsi kungani kubalulekile kwenta lokutsite, kuba lula kukwenta. Ngisho noma lomsebenti umkhulu noma umncane kubalulekile kutsi uwentisise. Nawenta umsebenti lomuhle, ungakujabulisa umsebenti wetandla takho njengobe kwenteka kuMfundzisi Lomuhle Kakhulu.