NGALELINYE LILANGA, lenye indvodza yeta kuJesu. Beyati kutsi Jesu uhlakaniphe kakhulu, ngako yatsi kuye: ‘Mfundzisi, tjela umnaketfu anginikete letinye tetintfo lanato.’ Lendvodza beyicabanga kutsi letinye taletintfo temnakabo bekufanele tibe tayo.

Kube wena bewunguJesu, bewutawutsini?— Jesu wabona kutsi lendvodza beyinenkinga. Kodvwa inkinga beyingasiko kutsi ifuna tintfo temnakabo. Inkinga beyikutsi lendvodza beyingati kutsi yini lebaluleke sibili ekuphileni.

Ase sicabange ngaloku. Yini lokufanele kubaluleke kakhulu kitsi? Kuba nemathoyisi lamahle yini, timphahla letinsha nobe letinye tintfo letinjengaleti?— Kunentfo lebaluleke kakhulu kunaloko. Lesi ngiso sifundvo Jesu labefuna kusifundzisa. Ngako-ke, wacoca indzaba yendvodza leyakhohlwa Nkulunkulu. Uyafuna yini kuyiva lendzaba?—

Lendvodza beyinjinge kakhulu. Beyinemhlaba wekulima kanye netindzawo tekugcina kudla. Tilimo lebeyitihlanyele betikhula kahle. Beseyite indzawo leyenele yekubeka sivuno sayo. Ngako beyitakwenta njani? Yakhuluma yodvwa, yatsi: ‘Ngitawubhidlita letindzawo tami tekubeka kudla ngakhe letinkhulu. Bese ngibutsela khona sivuno sami nato tonkhe tintfo tami letinhle.’

Lendvodza lenjingile beyicabanga kutsi kwenta kanjalo bekukuhlakanipha. Beyicabanga kutsi ihlakaniphe  kakhulu nekutsi ingakhona kubeka tintfo letinyenti. Yatsi: ‘Nginencumbi yetintfo letinhle. Ngitatisebentisa iminyaka leminyenti. Ngako nyalo ngingaphumula. Ngitawudla, nginatse futsi ngitijabulise.’ Kodvwa kukhona lokubi ngaloko lobekucatjangwa ngulendvodza lenjingile. Ucabanga kutsi yini leyo?— Beyiticabangela yona kuphela nangenjabulo yayo. Yamkhohlwa Nkulunkulu.

Ngako Nkulunkulu wakhuluma nalendvodza lenjingile. Watsi: ‘Muntfu lote ingcondvo. Lamuhla ebusuku utawufa. Titawuba tabani-ke letintfo lotibekele tona?’ Lendvodza lenjingile beyitawukhona yini kusebentisa letintfo naseyifile?— Beyingeke ikhone ngobe betitawuba talomunye umuntfu. Jesu watsi: “Kunjalo-ke ngemuntfu lotibekela umcebo kodvwa abe angakacebi emehlweni aNkulunkulu.”​—Lukha 12:13-21.

Uyafuna yini kuba njengalendvodza lenjingile?— Inhloso yayo leyinhloko ekuphileni beyikutitfolela umnotfo. Kwenta kanjalo bekuliphutsa.  Beyifuna tintfo letinyenti. Kodvwa ‘beyingakacebi emehlweni aNkulunkulu.’

Bantfu labanyenti banjengalendvodza lenjingile. Bahlale bafuna tintfo letinyenti. Kodvwa kwenta njalo kungaholela etinkingeni letinkhulu. Nasi sibonelo: Angitsi unawo emathoyisi?— Ngicela ungitjele kutsi nguwaphi emathoyisi lonawo?— Kutsiwani nangabe lomunye umngani wakho anebhola, umdoli nobe lelinye lithoyisi wena lote lona? Kukahle yini kufuna kutsi batali bakho bakutsengele lona?—

Ngaletinye tikhatsi lithoyisi lingase libonakale libaluleke kakhulu. Kodvwa kwentekani kulelithoyisi ekuhambeni kwesikhatsi?— Liyaguga. Kungenteka lephuke, bese ngemuva kwaloko awusalifuni. Kodvwa kunentfo lebaluleke kakhulu kwendlula emathoyisi. Ucabanga kutsi iyini?—

Kuphila kwakho. Kuphila kwakho kubalulekile ngobe kute longakwenta ngaphandle kwako. Kodvwa utotfola kuphila ngenca yekutsi wenta tintfo letijabulisa Nkulunkulu. Ngako asingalingisi lendvodza lenjingile lete ingcondvo, leyakhohlwa Nkulunkulu.

 Bantfwana akusibo kuphela labangenta tintfo letibulima njengalendvodza lenjingile. Nebantfu labadzala labanyenti nabo bayatenta. Labanye babo bahlale bafuna tintfo letinyenti. Kungenteka kutsi banako kudla labangakudla ngalelo langa, timphahla tekugcoka kanye nendzawo yekuhlala. Kodvwa bafuna lokunye ngetulu kwaloko. Bafuna timphahla letinyenti. Bafuna netindlu letinkhulu. Tonkhe letintfo tiyadula. Ngako basebenta kamatima kuze batfole imali lenyenti. Nabatfola imali lenyenti bachubeka bafuna tintfo letinyenti.

Bantfu labadzala labanye baba matasatasa kakhulu betama kutfola imali, kangangekutsi bagcine sebete sikhatsi sekuba nemindeni yabo. Baba bete nesikhatsi sekukhonta Nkulunkulu. Imali yabo itawubenta baphile yini?— Ngeke. Bangayisebentisa yini imali yabo nasebafile?— Ngeke bayisebentise. Loku kubangelwa kutsi bantfu labafile abakwati kwenta lutfo.​—Umshumayeli 9:5, 10.

Loku kusho kutsi kubi yini kuba nemali?— Akusikubi. Imali singayisebentisela kutsenga kudla netimphahla. LiBhayibheli litsi imali iyintfo yekukhosela. (Umshumayeli 7:12) Kodvwa nangabe siyitsandza imali, sitawuba netinkinga letinkhulu. Sitawufanana nalendvodza lenjingile leyatibekela umcebo, kantsi beyingakacebi emehlweni aNkulunkulu.

Kusho kutsini kuceba emehlweni aNkulunkulu?— Kusho kwenta Nkulunkulu ete kucala ekuphileni kwetfu. Labanye bantfu batsi bayakholwa kuNkulunkulu. Bacabanga kutsi kukholwa kuye ngiko kuphela lokudzingekako. Kodvwa bacebe sibili yini emehlweni aNkulunkulu?— Abakacebi, bafanana nalendvodza lenjingile leyakhohlwa Nkulunkulu.

Jesu akazange amkhohlwe Babe wakhe losezulwini. Akazange etame kwenta imali lenyenti. Bekete netintfo letinyenti. Jesu bekati kutsi yini lebaluleke sibili. Ucabanga kutsi yini lebaluleke sibili?— Kuceba emehlweni aNkulunkulu.

Singaceba njani emehlweni aNkulunkulu?— Singaceba ngekutsi sente tintfo letimjabulisako. Jesu watsi: “Ngihlale ngenta tintfo letimjabulisako.”  (Johane 8:29) Nkulunkulu uyajabula nangabe senta tintfo lafuna sitente. Ase ungitjele kutsi ngutiphi tintfo longatenta kuze ujabulise Nkulunkulu?— Ungafundza liBhayibheli, uye emihlanganweni yebuKhristu, uthantaze kuNkulunkulu futsi usite labanye bantfu kutsi bafundze ngaye. Leti tintfo letibaluleke sibili ekuphileni.

Ngesizatfu sekutsi Jesu bekacebile emehlweni aNkulunkulu, Jehova wamnakekela. Wamniketa umklomelo wekuphila phakadze. Nangabe natsi silingisa Jesu, Jehova utasitsandza futsi asinakekele njengaye. Ngako-ke, asilingise Jesu singalingisi lendvodza lenjingile leyakhohlwa Nkulunkulu.