1. Yandze kangakanani inkholelo yemilingo nebutsakatsi?

INCWADZI lenesihloko lesitsi African Traditional Religion itsi: “E-Afrika, kukuchitsela sikhatsi kubuta kutsi bakhona yini batsakatsi.” Ichubeka itsi “bantfu base-Afrika ngetigaba tabo bakholelwa kutsi butsakatsi buyintfo lekhona sibili.” Labangakafundzi netifundziswa bayakholelwa emilingweni nasebutsakatsini. Baholi betinkholo tebuMoslem neteBukholwa nabo bayakholelwa kuloku.

2. Inkholelo leyandzile itsi abuyaphi emandla ekwenta imilingo?

² Inkholelo leyandzile e-Afrika itsi kunemandla emoya lafihlakele lacondziswa nguNkulunkulu. Tidalwa letingumoya nabokhokho lasebafa nabo bangawasebentisa lamandla. Labanye bantfu nabo bayakwati kuwasebentisela kuletsa lusito (tinhlanhla) nome kulimata (kulumba) labanye.

3. Kuyini kulumba, futsi bantfu banatiphi tinkholelo ngako?

³ Emalumbo acondziswa etitseni. Kutsiwa labalumbako banemandla ekutfumela tahhukulu, timfene, tinyekevu, naletinye tilwane tibe sicitfo. Kunenkholelo yekutsi emalumbo ngiwo labangela tincabano, bunyumba, kugula, ngisho nekufa.

4. Iyini inkholelo yebantfu labanyenti ngekutsakatsa, futsi labanye labake bakwenta batsini ngako?

⁴ Lokuhambisana edvute nekulumba butsakatsi. Kuletinye tindzawo, kutsiwa batsakatsi bayakwati kuphuma emitimbeni yabo ebusuku, bandize bayewuhlangana nalabanye batsakatsi, nome bayewuhlasela titsa tabo. Loku kuyaye kusekelwe emavini lashiwo ngulabo lasebawuyekela lomkhuba wekutsakatsa. Nasi sibonelo, lomunye magazini walapha e-Afrika wawunetinkhulumo letishiwo ngulabanye labebatsakatsa (linyenti labo lingemantfombatana). Lomunye wabo watsi: “Ngabangela tingoti tetimoto letabulala bantfu labangu-150.” Lomunye yena watsi: “Ngabulala bantfwana labasihlanu ngekumunya ingati yabo yonkhe.” Kantsi-ke lomunye watsi: “Ngabulala tingani tami letintsatfu ngoba tangala.”

5. Labanye bantfu bawasebentisa njani emandla emimoya langabonakali?

⁵ Lamandla emimoya langabonakali kutsiwa aphindze futsi aletsele bantfu  tinhlanhla nesivikelo emashweni. Labantfu labafuna tinhlanhla bagaba tiphandla nebuhlalu. Bagcobisa nome banatse imitsi yekutivikela. Emakhaya abo, bayabetsela nome babe naletinye tintfo labakholelwa kutsi tinemandla ekubavikela. Labanye bagaba tintfo tekuticinisa letinemavesi eliBhayibheli nome eKoran.

6. Sathane nemadimoni akhe bentani esikhatsini lesengcile, futsi kufanele siwatsatse njani emandla abo?

⁶ Sathane nemadimoni akhe vele batitsa tebantfu letiyingoti. Banemandla ekuhuha imicabango nekuphila kwebantfu. Esikhatsini lesengcile, emadimoni angena futsi abasebentisa bantfu netilwane. (Matewu 12:43-45) Akukafaneli siwatsatsele phasi emandla awo, futsi akukafaneli sicabange shengatsi makhulu kakhulu.

7. Yini Sathane lafuna kutsi siyikholelwe, futsi loko kufaniswe nani?

⁷ Sathane ungumdukisi lomkhulu. Wenta bantfu bacabange kutsi unemandla lamakhulu kwendlula lawo vele lanawo. Kubonisa loku: Ngesikhatsi kuliwa kulelinye live lase-Afrika, emasotja adlala imisindvo letsetjuliwe yekudubula kwetimbayimbayi netibhamu letinkhulu. Loku abekwentela kwetfusa titsa tawo titewucabanga kutsi tihlaselwa libutfo lelinetikhali letinyenti, letinemandla. NaSathane ufuna bantfu bacabange kutsi emandla akhe makhulu kakhulu. Ufuna kwetfusa bantfu kuze batokwenta intsandvo yakhe esikhundleni sekwenta yaJehova. Ase sicabangele tintfo letintsatfu letingemanga Sathane lafuna kutsi bantfu batikholelwe.

8. Ngumaphi emanga Sathane lawabhebhetelako?

⁸ Intfo yekucala lengemanga Sathane layibhebhetelako ngulena: Kute sigameko lesitivelelako. Lokubi lokungakentiwa ngumuntfu lotsite kusuke kwentiwe ngemandla emimoya lafihlakele. Ase sitsi umntfwana ubulawa ngumalaleveva. Make wakhe kungenteka uyati kutsi malaleveva sifo lesita netimbuzulwane. Kepha kungenteka akholelwe kutsi lembuzulwane itfunyelwe ngumtsakatsi.

9. LiBhayibheli likukhombisa njani kutsi Sathane akatibangeli tonkhe tinkinga letikhona?

⁹ Nome nje Sathane anawo emandla ekubangela tinkinga letitsite, kuliphutsa kucabanga kutsi unemandla ekubangela tonkhe tinkinga. LiBhayibheli litsi: “Ematubane lamakhulu akusiwo lenta umuntfu aphumelele emncintiswaneni, nemandla akusiwo lenta uncobe ekulweni, kantsi nekudla akutfolwa ngulabahlakaniphile bodvwa, nebunjinga abusibo balabakhaliphe ngengcondvo kuphela, nemphumelelo ayisiyo yalabanelikhono; kodvwa sikhatsi nematfuba kubehlela bonkhe.” (Umshumayeli 9:11) Lenye ingijimi ingaba nematubane kwendlula leletinye, kepha ingaphumeleli. “Sikhatsi nematfuba” lativelelako kungayenta ingaphumeleli. Kungenteka yenyele, igule, nome ikhutjwe bese iyawa. Loku kungenteka kunome ngabe ngubani. Akusho kutsi kusuke kubangelwe nguSathane nome batsakatsi, kepha kuyatentakalela.

10. Kutsiwani ngebatsakatsi, futsi sati ngani kutsi loku kungemanga?

¹⁰ Kwesibili lokungemanga Sathane lawabhebhetelako nguloku: Batsakatsi bangaphuma emitimbeni yabo ebusuku, bahambe bayewuhlangana nalabanye batsakatsi nome bahlasele titsa tabo. Tibute nangu umbuto: ‘Nangabe bangakwenta loko, yini lena lesuke ishiye umtimba?’ Njengoba sibonile, umphefumulo  ungulomuntfu, lokusho kutsi awusiyo intfo lengaphuma kumuntfu. Sifundze nekutsi umoya ungemandla labangela kutsi umuntfu achubeke nekuphila. Awenti lutfo uwodvwana.

11. Sati ngani kutsi batsakatsi abakwati kuphuma emitimbeni yabo futsi wena uyakukholelwa yini loko?

¹¹ Umphefumulo awuwushiyi umtimba uyokwenta tintfo letitsite, letinhle nome letimbi. Nemoya ngeke wente kanjalo. Ngaleso sizatfu, batsakatsi abakwati kuphuma emitimbeni yabo nome batigucule babe tilwane. Liciniso likutsi abatenti mbamba letintfo labatsi bayakwati kutenta.

12. Sathane ubenta njani bantfu bacabange kutsi bente tintfo labangakatenti?

¹² Labantfu labatsi bona bake bagucuka bakususelaphi loko? Sathane uyakwati kwenta bantfu bakholelwe kutsi kunetintfo letenteke kubo tibe tingakenteki mbamba. Sathane angasebentisa imibono kubenta batsatse ngekutsi kunetintfo labatibonile, bativa, nome batenta, tibe tingekho. Sathane unelitsemba lekutsi loku kutawenta bantfu behlukane naJehova futsi bacabange kutsi liBhayibheli linemanga.

13. (a) Kulungile yini kusebentisa emandla emimoya kuletsa tinhlanhla nekutivikela emashweni? (b) ImiBhalo itsini ngemilingo?

¹³ Kwesitsatfu lokungemanga nguloku: Kulungile kusebentisa emandla emimoya kuletsa tinhlanhla nekutivikela emashweni ngoba kuyasita ekulweni nemalumbo. Kepha liBhayibheli alisho kutsi kunemehluko ekhatsi kwekutsakatsa nekusebentisa emandla emimoya ekuletseni inhlanhla nasekutivikeleni emashweni. Lona litilahla tonkhe tindlela tekusebentisa emandla emimoya. Ase ucabange ngemitsetfo Jehova layiniketa sive sema-Israyeli macondzana nekusetjentiswa kwalamandla:

• “Ningabi tangoma nome labenta imilingo.”—Levithikhusi 19:26.

• “Indvodza nome lomsikati losangoma nome longumtsakatsi nibombulala.”—Levithikhusi 20:27.

•   “Kubete emkhatsini wenu . . . nalobhulako nome losangoma, nome lohumusha tigameko, angenele butsi, nome alumbe, nome wemimoya lemibi, nome lophengulako.”—Dutheronomi 18:10-14.

14. Jehova wayibekelani imitsetfo levimbela kusebentisa imilingo?

¹⁴ Lemitsetfo yakwenta kwakhanya kutsi Nkulunkulu abengafuni kutsi bantfu bakhe bente imilingo. Jehova waniketa bantfu bakhe lemitsetfo ngoba abebatsandza futsi angafuni kutsi bagcilatwe kukholelwa eteni nekwesaba. Abengafuni kutsi bacindzetelwe ngemadimoni.

15. LiBhayibheli likukhombisa njani kutsi Jehova unemandla kwendlula Sathane?

¹⁵ Nome nje liBhayibheli lingatichazi kabanti tintfo emadimoni lakwatiko kutenta naleto langeke atente, lisikhombisa kutsi Jehova unemandla lamakhulu kakhulu kunaSathane nemadimoni akhe. Jehova wenta kutsi Sathane acoshwe ezulwini. (Sembulo 12:9) Kunake nekutsi Sathane wacela nemvume yekutsi alinge Jobe, waphindze walalela secwayiso sekutsi angambulali Jobe.—Jobe 2:4-6.

16. Kufanele setsembele kubani kuze sitfole sivikelo?

¹⁶ Taga 18:10 titsi: “Libito [laJehova, NW] liyinqaba lecinile, lapho kungabalekela khona bantfu labalungile basindze.” Kufanele setsembele kuJehova kute sitfole sivikelo. Tinceku taNkulunkulu atitivikeli kuSathane nemadimoni akhe ngekusebentisa tintseleti netihlati, futsi atikwesabi kutsakatfwa. Tinceku taNkulunkulu tikholelwa kuloko liBhayibheli lelikushoko: “Ngobe emehlo aSimakadze abuka emhlabeni wonkhe kucinisa labo labatinhlitiyo tabo titinikele kuye ngalokuphelele.”—2 Tikhronike 16:9.

17. Incwadzi yaJakobe 4:7 isetsembisani, kepha yini tsine lokufuneka siyente?

¹⁷ Nawe ungaba nalelotsemba nangabe ukhonta Jehova. Jakobe 4:7 utsi: “Ngako-ke tfobelani Nkulunkulu, kodvwa nimelane naSathane, uyawunibalekela.” Nangabe ukhonta Jehova, futsi umtfobela, unaso sizatfu sekwetsemba kutsi utakuvikela.