1, 2. (a) Ngalokucondzene nebantfu labashadako, yini lesingase sitibute yona, futsi kungani? (b) Ngumiphi imibuto lesitawucoca ngayo kulesehluko?

UYATSANDZA yini kuya emishadweni? Bantfu labanyenti bayatsandza, ngobe imishado imnandzi. Ubona labo labashadako bagcoke kahle. Lokuhle kakhulu kutsi buso babo busuke bugcwele injabulo! Ngalelilanga, bamamatseka bangacedzi, futsi babonakala benelikusasa lelichakazile.

² Nobe kunjalo, kufanele kuvunywe kutsi ngetindlela letinyenti imishado ikulenkhulu inkinga lamuhla. Nobe sibafisela lokuhle labo labashadako, ngaletinye tikhatsi siye sitibute: ‘Batawuhlala bajabulile yini? Batawuhlala ndzawonye sikhatsi lesidze yini?’ Timphendvulo talemibuto titawuya ngekutsi labo labashadile bayasisebentisa yini seluleko saNkulunkulu mayelana nemshado. (Fundza Taga 3:5, 6.) Kufanele bakwente loko kute bahlale elutsandvweni lwaNkulunkulu. Ase sihlole timphendvulo teliBhayibheli talemibuto lemine lelandzelako: Ngutiphi tizatfu tekushada? Nangabe ufuna kushada, kufanele ukhetse umuntfu lonjani? Ungawulungiselela njani umshado? Futsi yini lengasita bantfu labatsatsene kutsi bahlale bajabulile emshadweni wabo?

3. Kungani kungeke kube kuhlakanipha kushada ngenca yetizatfu letingakabaluleki?

³ Labanye bacabanga kutsi umshado uletselana injabulo—batsi angeke uyitfole injabulo nangabe ungakashadi. Loko kungemanga laluhlata klaba! Jesu, indvodza leyayingakashadi, watsi  kungashadi kusipho, futsi wabuye wakhutsata labo labangakhona kuhlala bangakashadi kutsi bente kanjalo. (Matewu 19:11, 12) Umphostoli Pawula naye wakhuluma ngetinzuzo tekungashadi. (1 Khorinte 7:32-38) Jesu naPawula abatange babeke umtsetfo wekutsi umuntfu akukafanele ashade, empeleni, ‘kuvimbela kushada’ kubalwe kanye “netimfundziso temadimoni.” (1 Thimothi 4:1-3) Nobe kunjalo, kungashadi kungabaletsela injabulo labo labafuna kukhonta Jehova ngaphandle kwekuphazamiseka. Ngako-ke, akusiko kuhlakanipha kushada ngenca yetizatfu letingakabaluleki, njengalapho ucindzetelwa bontsanga yakho.

4. Umshado lomuhle ubeka siphi sisekelo sekukhulisa bantfwana?

⁴ Ngakulokunye, tikhona yini tizatfu letinhle tekushada? Yebo tikhona. Umshado usipho lesivela kuNkulunkulu. (Fundza Genesisi 2:18.) Ungasiletsela tinzuzo letitsite kanye netibusiso letinyenti. Nasi sibonelo: Umshado lophumelelako usisekelo lesihle semphilo yelikhaya. Bantfwana badzinga indzawo lekahle labatawukhuliselwa kuyo batali babo, futsi babatsandze, babayale, baphindze babacondzise. (Tihlabelelo 127:3; Efesu 6:1-4) Kepha-ke, kukhulisa bantfwana akusikuphela kwesizatfu sekushada.

5, 6. (a) Ngekusho kwencwadzi yeMshumayeli 4:9-12, ngutiphi letinye tetinzuzo tebungani lobusondzelene? (b) Umshado ungafanana njani nentsambo lenemicu lemitsatfu?

⁵ Asewucabange ngembhalo lesitsetfwe kuwo lesihloko kanye naloko lokushoko: “Babili bancono kunamunye, ngobe batfola umvuzo lomuhle ngemsebenti wabo: Nakuwa lomunye wabo, lomngani wakhe uyamsita amsukumise, kodvwa maye kuloyo loyedvwa, lotsi nakawa angabi naye lotamsita amsukumise. Kantsi futsi bantfu nabalele bababili bayafutfumetana; kodvwa umuntfu angatifutfumeta kanjani alele yedvwa? Nangabe umuntfu ayedvwa, angehlulwa nakahlaselwa; kantsi nabababili bangativikela. Intsambo lenemicu lemitsatfu ayisheshi idzabuke.”—Umshumayeli 4:9-12.

⁶ Ngalokuyinhloko, lombhalo ukhuluma ngekubaluleka kwebungani emshadweni. Empeleni umshado uhlanganisa bangani labasondzelene kakhulu. Njengobe lombhalo ubonisile, buhlobo lobunjalo bungasita labo labashadile kutsi basitane,  badvudvutane futsi bavikelane. Umshado ucina nakakhulu nangabe uhlanganisa bantfu labangetulu kwalababili. Intsambo lenemicu lemibili, njengobe lelivesi lisho kulula kutsi idzabuke. Kepha imicu lemitsatfu lelukiwe kungaba matima kuyidzabula. Nangabe kujabulisa Jehova kuyintfo lebalulekile endvodzeni nemfati, umshado wabo ufanana naleyontsambo lenemicu lemitsatfu. Jehova usuke ayincenye yalomshado, futsi kungako ucina nakakhulu.

7, 8. (a) Ngusiphi seluleko Pawula lasibhalela emaKhristu langakashadi, lalwa netinkhanuko tebulili? (b) LiBhayibheli lisiniketa muphi umbono locondzile ngemshado?

⁷ Umshado uphindze ube yindzawo lokukuphela kwayo lapho tifiso tebulili tingenetiswa khona. Kuya ecasini kuba ngumtfombo wenjabulo nangabe kwentiwa emshadweni. (Taga 5:18) Nangabe umuntfu asengcile kuloko liBhayibheli lelikubita ngekutsi ‘sikhatsi sekwehlulwa yinkhanuko’—lokusikhatsi lapho tifiso tebulili tiba nemandla khona—lapho kungenteka usuke asalwa naletifiso tebulili khona. Tifiso letinjalo nangabe tingalawulwa, tingaholela ekutiphatseni lokubi. Pawula waphefumulelwa kutsi abhalele bantfu labasengakashadi nasi seluleko: “Nabangenako kutibamba, kuncono kutsi bashade, ngobe kuhle kutsi umuntfu ashade kunekutsi ashiswe yinkhanuko.”—1 Khorinte 7:9, 36; Jakobe 1:15.

⁸ Nobe ngabe ngusiphi sizatfu lesenta umuntfu ashade, kuhle kutsi abhekane nemaciniso. Njengobe Pawula asho, labo “labashadile bayawuhlupheka emhlabeni.” (1 Khorinte 7:28) Bantfu labashadile baba netinkinga labo labangakashadi labangeke babe nato. Nangabe ushadile-ke, ungatinciphisa njani leto tinkinga, futsi wandzise tibusiso emshadweni wakho? Lenye indlela kukhetsa umuntfu lotawushada naye ngekuhlakanipha.

9, 10. (a) Ngusiphi sibonelo lesentiwa nguPawula lesikhombisa kutsi kuyingoti kangakanani kuboshelwa ejokeni linye nalabangakholwa? (b) Ngalokuvamile, yini leba ngumphumela wekunganaki seluleko saNkulunkulu sekungashadi nemuntfu longakholwa?

⁹ Pawula waphefumulelwa kutsi abhale simiso lesibalulekile  lokufanele sisetjentiswe nangabe umuntfu afuna kukhetsa umuntfu latawushada naye: “Ningaboshelwa ejokeni linye nalabangakholwa.” (2 Khorinte 6:14) Lesibonelo sakhe sasisekelwe emphilweni yetekulima. Nangabe tilwane letimbili letehluke kakhulu ngebukhulu bato nobe ngemandla, tiboshelwe ndzawonye, totimbili angeke tihambe kahle. Kuyafanana nangekuboshelwa ejokeni linye kwemuntfu lokholwako nalongakholwa emshadweni. Bobabili angeke bakwati kusebentisana nobe kuvana. Nangabe lomunye afuna kuhlala elutsandvweni lwaJehova, kantsi lona lomunye ete indzaba naloko, kuphila kwabo angeke kufanane, futsi loko kutawukwenta kutsi kuphila kwabo kungajabulisi. Ngako-ke Pawula wakhutsata emaKhristu kutsi ashade kuphela nalamanye emaKhristu lakanye nawo.—1 Khorinte 7:39, catsanisa ne-NW.

¹⁰ Kuletinye timo, lamanye emaKhristu langakashadi aphetsa ngekutsi kushada nemuntfu longakholwa kuncono kunekuhlala angakashadi. Labanye bakhetsa kungasinaki seluleko seliBhayibheli futsi bashada nebantfu labangamkhonti Jehova. Ngaso sonkhe sikhatsi umphumela waloko uba buhlungu. Bantfu labanjalo batikhandza sebashade nemuntfu labangakwati kukhuluma naye ngetintfo letibaluleke kakhulu ekuphileni. Situnge labanaso nyalo singaba sikhulu kakhulu kunaleso labebanaso basengakashadi. Lokujabulisako kutsi kunetinkhulungwane temaKhristu langakashadi lasilalelako seluleko lesivela kuNkulunkulu ngalendzaba. (Fundza Tihlabelelo 32:8.) Nanobe banelitsemba lekutsi ngalelinye lilanga nabo batawushada, bahlala bangakashadi kute kube ngulapho batfola umuntfu lokhonta Nkulunkulu Jehova.

11. Yini lengakusita kutsi ukhetse umuntfu lotawushada naye ngekuhlakanipha? (Fundza libhokisi “ Yini Lengiyibukako Kumuntfu Lengifuna Kushada Naye?”)

¹¹ Kuliciniso, akusito tonkhe tinceku taJehova letingavele tibe bantfu labangaba bangani bemshado labafanelekako. Nangabe ucabangela kushada, funa umuntfu lonebuntfu, imigomo yakamoya, kanye nalotsandza Nkulunkulu njengawe. Sisebenti lesetsembekile sishicilele tihloko letinyenti letikhuluma ngalendzaba, futsi kutawuba kuhlakanipha ngawe kutifundza, futsi  uthandaze ngeseluleko sato bese uyasivumela kutsi sikucondzise lapho wenta lesincumo lesibaluleke kangaka. *—Fundza Tihlabelelo 119:105.

12. Nguliphi lisiko leliphatselene nemshado lelisetjentiswako emaveni lamanyenti, futsi ngusiphi sibonelo seliBhayibheli lesisiniketa sicondziso kuloku?

¹² Emaveni lamanyenti kulisiko kutsi batali batfolele bantfwana babo bantfu labatawushada nabo. Kuyavunywa kulawo masiko kutsi batali basebentise kuhlakanipha nelwati lwabo ekwenteni lesincumo lesibalulekile. Ngalokuvamile, imishado lenjalo iyaphumelela, njengobe kwakunjalo nasesikhatsini sakadzeni. Sibonelo sa-Abrahama sekutfumela inceku yakhe kutsi iyawufunela Isaka umfati, sifundzisa batali lokungenteka basesimeni lesifananako nalamuhla. Imali kanye nesikhundla kwakungasito tintfo letibalulekile ku-Abrahama. Kunaloko, wenta imetamo leminyenti kutsi atfolele Isaka umfati ebantfwini labakhonta Jehova. *—Genesisi 24:3, 67.

13-15. (a) Simiso lesitfolakala encwadzini yeTaga 24:27 singalisita njani lijaha lelicabangela kushada? (b) Yini lengentiwa yintfombi kute iwulungele umshado?

¹³ Nangabe ucabangela kushada, utawube wenta kahle nangabe utibuta naku: ‘Sengikulungele yini vele kushada?’ Imphendvulo yalombuto ayikho ekutseni wena utiva njani ngelutsandvo, ngekuya ecasini, ngebungani nobe kukhulisa bantfwana. Kunaloko, kunemigomo lecondzile ngamuye walabo labafuna kuba yindvodza nobe umfati lokufanele acabange ngayo.

 ¹⁴ Lijaha lelifuna umfati kufanele licabangisise kahle ngalesimiso: “Cedzela kucala imisebenti yakho yangaphandle, ulungise emasimu akho, bese wakha indlu yakho.” (Taga 24:27) Kugcizelelani loku? Ngaleso sikhatsi, nangabe lijaha lifuna ‘kwakha umuti,’ nobe lifuna kucala umndeni ngekutsi lishade, kwakudzingeka kutsi litibute, ‘sengikulungele yini vele kunakekela nekusekela umkami nebantfwabami lokungenteka ngibatfole?’ Kwakufanele acale asebente, anakekele insimu kanye netilimo takhe. Lesimiso sisasebenta nalamuhla. Lijaha lelifuna kushada, kufanele lilungiselele kwetfwala lowomtfwalo. Yingci nje lisenemandla ekusebenta, kufanele lisebente. LiVi laNkulunkulu litsi umuntfu longawunakekeli umndeni wakhe, ngetidzingo tenyama, temivelo kanye netakamoya, mubi kwengca umuntfu longakholwa!—Fundza 1 Thimothi 5:8.

¹⁵ Nentfombi lekhetsa kushada, nayo isho kutsi iyavuma kutsi itawuyetfwala lemitfwalo lesindzako. LiBhayibheli likhuluma ngemakhono kanye netimfanelo umfati latidzingako kute akwati kusita indvodza yakhe futsi anakekele umndeni wakhe. (Taga 31:10-31) Labo labajaka kushada babe bangakakulungeli kuyitfwala imitfwalo lebakhona emshadweni, empeleni loku bakwenta ngenca yebugovu, futsi bayehluleka kucabanga ngaloko labangamentela kona loyo labafuna kushada naye. Lokubaluleke nakakhulu kutsi labo labafuna kushada kufanele bakwati kusebentisa timiso taNkulunkulu ekuphileni kwasemshadweni.

16, 17. Ngutiphi timiso temiBhalo lokufanele labo labafuna kushada bazindle ngato?

¹⁶ Kulungiselela umshado kufaka ekhatsi kuzindla ngendzima Nkulunkulu layibekele emadvodza nebafati. Indvodza kufanele yati kutsi kusho kutsini kuba yinhloko yemndeni wemaKhristu. Lendzima akusiyo nje imvume yekuba ngulocindzetelako. Kunaloko, kufanele ilingise indlela Jesu lasebentisa ngayo bunhloko bakhe. (Efesu 5:23) Ngalokufananako, umfati longumKhristu kudzingeka ayicondze indzima yakhe lehloniphekile njengemfati welikhaya. Utawukuvumela yini kutfobela ‘umtsetfo  wendvodza yakhe?’ (Roma 7:2) Sewuvele ungephansi kwemtsetfo waJehova newaKhristu. (Galathiya 6:2) Ligunya lendvodza yakhe emndenini limelela nalomunye umtsetfo. Angakwati yini kulisekela futsi alihloniphe ligunya lemuntfu longakapheleli? Nangabe angeke akwati kukwenta loko, utawube wenta kahle nakancuma kungashadi.

¹⁷ Ngetulu kwaloko, ngamunye walabashadile kufanele akulungele kunakekela tidzingo letikhetsekile taloyo lashade naye. (Fundza Filiphi 2:4.) Pawula wabhala : “Ngako-ke, akube ngulowo nalowo atsandze umkakhe, njengobe atitsandza yena, nemfati ahloniphe indvodza yakhe.” Aphefumulelwe nguNkulunkulu, Pawula wacaphela kutsi indvodza inesidzingo lesikhetsekile sekutsi itive ihlonishwa ngalokujulile ngumfati wayo. Nemfati unesidzingo lesikhetsekile sekutsi ative atsandvwa yindvodza yakhe.—Efesu 5:21-33.

18. Kungani bantfu labaganene kufanele batitsibe?

¹⁸ Ngako-ke, kuganana akusiso sikhatsi sekumane nje utijabulise. Kepha sikhatsi sekutsi lomdvuna nalomsikati bafundze indlela yekuphatsana, nesikhatsi sekuncuma kutsi bayafanelana yini. Kuphindze kube sikhatsi sekubonisa kutitsiba. Ngobe sifiso sekubonisana lutsandvo ngendlela lefanele labo labashadile kuphela singase sibenemandla. Kepha liciniso likutsi kukhangana kuyimvelo. Kodvwa labo labatsandzana ngeliciniso bayotigwema tento letingabalimatela buhlobo babo naNkulunkulu. (1 Thesalonika 4:6) Ngako-ke, nangabe kukhona lotsite lotsandzana naye, kufanele ulwele kutitsiba; lemfanelo itawukuzuzisa kuko konkhe kuphila kwakho, usengakashadi kanye nalapho sewushadile.

19, 20. Indlela umKhristu lawubheka ngayo umshado kufanele yehluke njani endleleni live lamuhla leliwubheka ngayo? Fananisa.

¹⁹ Nangabe labashadile bafuna kwenta umshado wabo uhlale njalo, kufanele babe nembono lofanele ngesibopho semshado. Etincwadzini letinyenti nasemafilimini, umshado uvetwa  uyintfo lebanesiphetfo lesihle ngaso sonkhe sikhatsi. Kepha ekuphileni lokuvamile, umshado awusiso siphetfo; kunaloko usicalo—sicalo salokutsite lokwadalwa nguJehova kutsi kuhlale sikhatsi lesidze. (Genesisi 2:24) Lokubuhlungu kutsi live lamuhla lite umbono lofananako. Kulamanye emasiko, bantfu bafananisa kushada “nekubopha lifindvo.” Bangase bangaboni kutsi loko labakushoko kufanana ncamashi nembono lovamile bantfu labanawo mayelana nemshado. Kungani kunjalo? Batsi nanobe lifindvo lelikahle kufanele lihlale licinile kuye ngesidzingo, kepha kubalulekile nangalo kutsi liphindze lichacheke melula.

²⁰ Loku kusho kutsi linyenti lebantfu lamuhla libheka umshado njengentfo yesikhashana. Kumelula kutsi bavele bashade ngobe basuke bacabanga kutsi batawujabula, kepha lapho kucala kuphakama tinkinga, bavele bawuncamule. Kodvwa asewukhumbule umfanekiso loseBhayibhelini lokhuluma ngebunye lobufanana nebemshado—intsambo. Tintsambo nobe tindophi temikhumbi tentiwe ngendlela yekutsi tingasheshi tiguge, tingadzabuki melula, ngisho nobe kungatsiwa kunesiphepho lesinemandla. Kuyafanana nangemshado, wawudalelwe kutsi uhlale njalo. Phela khumbula, Jesu watsi: “Loko lakuhlanganisile Nkulunkulu, akungabe kusehlukaniswa ngumuntfu.” (Matewu 19:6) Nangabe ushada, kufanele uwubheke ngendlela lefananako umshado. Lesibopho siwenta ube ngumtfwalo yini umshado? Cha!

21. Ngumuphi umbono lokahle lokufanele indvodza nemfati babe nawo ngalomunye nalomunye, futsi yini lengabasita kutsi bente kanjalo?

²¹ Indvodza nemfati kufanele balondvolote umbono lokahle ngalomunye nalomunye. Nangabe ngamunye wabo etama kunaka timfanelo letinhle talona lomunye, umshado uyoba yindzawo yenjabulo kanye neyekucabuleka. Kungenteka yini kutsi umuntfu abe nembono lomuhle ngemuntfu lashade naye longakapheleli? Yebo kungenteka. Jehova akawacali emanga, futsi naye unembono lomuhle ngatsi, nobe singakapheleli.  Umhlabeleli wabuta: “Kube wena, Simakadze, bewusibalela tono tetfu, ngubani labengaphunyula, angalahlwa?” (Tihlabelelo 130:3) Indvodza nemfati kufanele babe nemoya lonjengewaJehova, umoya wekutsetselelana.—Fundza Kholose 3:13.

22, 23. Bo-Abrahama naSara bababekela njani sibonelo lesihle labo labashadile lamuhla?

²² Njengobe iminyaka ihamba, Umshado ungachubeka ubaletsela injabulo netibusiso labo labashadile. LiBhayibheli  likhuluma ngemshado wa-Abrahama naSara ngesikhatsi sebagugile. Akusiko kutsi umshado wabo bewute tinkinga nebulukhuni. Asewucabange nje kutsi kwakumatima njani ngaSara, njengobe abeseneminyaka lengetulu kwa-60 ngesikhatsi bashiya likhaya labo lelitfokomele lelisedolobheni lelihle e-Uri, futsi wahamba wayawuhlala emathendeni kuphila kwakhe konkhe. Kepha ngetulu kwako konkhe loku, wachubeka atitfoba ebunhlokweni bendvodza yakhe. Abengumphelelisi kanye nemsiti weliciniso ku-Abrahama, futsi abemsita ngenhlonipho kute tincumo takhe tiphumelele. Inhlonipho yakhe abengagcini ngekuyibonisa ngemlomo, kepha ngisho ‘nangekhatsi kuye,’ abebita indvodza yakhe ngekutsi yinkhosi yakhe. (Genesisi 18:12; 1 Phetro 3:6) Inhlonipho yakhe nga-Abrahama yayisuka ekhatsi enhlitiyweni.

²³ Loku akusho kutsi bo-Abrahama naSara bebavumelana kuto tonkhe tintfo. Naye Sara ngalesinye sikhatsi wake waveta umbono ‘lowamkhatsata kakhulu’ Abrahama. Nobe kunjalo, ngesicondziso lesivela kuJehova, ngekutfobeka Abrahama walilalela livi lemkakhe, lelagcina lisibusiso emndenini. (Genesisi 21:9-13) Nalamuhla, labo lesekungemashumi lamanyenti eminyaka bashadile, bangafundza kulesibonelo sa-Abrahama naSara.

24. Yimishado lenjani leletsa ludvumo kuNkulunkulu Jehova, futsi kungani?

²⁴ Ebandleni lebuKhristu kunetinkhulungwane letinyenti temishado lejabulako—imishado lapho umfati ayihlonipha ngalokujulile indvodza yakhe, nalapho indvodza imtsandza futsi imniketa ludvumo umkayo, futsi lapho bobabili batimisela kwenta intsandvo yaJehova kube yintfo lehamba embili ekuphileni kwabo. Nangabe ukhetsa kushada, kubalulekile kutsi umkhetse ngekuhlakanipha umuntfu lotawushada naye, uwulungiselele kahle umshado, futsi usebentele kuba nemshado lonekuthula, lutsandvo, futsi loletsa ludvumo kuNkulunkulu Jehova. Nawenta kanjalo, umshado wakho uyawukusita ekutseni utigcine elutsandvweni lwaNkulunkulu.