SANDZISANCHAZO
Indlela Yekuphatsa Umuntfu Losusiwe Ekuhlanganyeleni
Timbalwa tintfo letisivisa buhlungu kwendlula lobo lesibuvako lapho sihlobo nobe umngani wetfu losedvute acoshwa ebandleni ngenca yekungaphendvuki esonweni lesitsite. Indlela lesisabela ngayo esicondzisweni seliBhayibheli lesimayelana nalendzaba ingaveta lizinga lesimtsandza ngalo Nkulunkulu, kanye nekwetsembeka kwetfu kulelilungiselelo. * Asewucabange ngaleminye yemibuto lephakamako ngalendzaba.
Kufanele simphatse njani umuntfu losusiwe ekuhlanganyeleni? LiBhayibheli litsi: “Ningahlanganyeli nemuntfu lekutsiwa ungumzalwane kantsi uyingwadla, nome siphingi, nome ngulobukhali, nome ngulokhonta tithico, nome ngulowetfukanako, nome sidzakwa, nome sigebengu; ningete nadla ngisho nekudla nemutfu lonjalo.” (1 Khorinte 5:11) Mayelana nawo wonkhe umuntfu “longahlali emfundzisweni yaKhristu,” siyafundza: “Ningabomemukela emakhaya enu, futsi ningambingeleli nekumbingelela, ngobe umuntfu lombingelelako ubambisana naye emisebentini yakhe lemibi.” (2 Johane 9-11) Site budlelwane bebuKhristu nemuntfu losusiwe ekuhlanganyeleni. Sicongosekulindza sa-March 1, 1982, likhasi 24, ngesiNgisi satsi: “Kutsi nje ‘sawubona’ kumuntfu kungaba sento sekucala lesingaholela ekukhulumisaneni ngisho nasekubeni bangani. Siyafuna yini kutsatsa leso sinyatselo sekucala kumuntfu losusiwe ekuhlanganyeleni?”
Kufanele simgweme ngalokuphelele yini? Yebo, ngenca yetizatfu letinyentana. Kwekucala, kukubonisa kwetsembeka kuNkulunkulu naseVini lakhe. Jehova asimlaleli kuphela lapho kumelula, kepha simlalela nalapho kwenta kanjalo kumatima khona. Lutsandvo ngaNkulunkulu lusenta silalele yonkhe imiyalo yakhe, sicaphela kutsi ulungile, unelutsandvo kanye nekutsi imitsetfo yakhe iyasizuzisa. (Isaya 48:17; 1 Johane 5:3) Kwesibili, kungatihlanganisi nesoni lesingaphendvuki kuvikela tsine nalo lonkhe libandla ekungcoleni ngekwakamoya nasekutiphatseni, futsi kugcina ligama lelibandla lilihle. (1 Khorinte 5:6, 7) Kwesitsatfu, kutimela kwetfu ngalokucinile timiso teliBhayibheli kungamzuzisa ngisho naloyo losusiwe ekuhlanganyeleni. Ngekusekela sincumo sekomidi yekwehlulela, singase sitsintse inhlitiyo yaloyo lowonile lekute kube ngunyalo uye wehluleka kusabela emetameni yalabadzala yekumsita. Kulahlekelwa buhlobo bakhe nalabo labatsandzako, kungase kumsite ‘asanguluke,’ abone kutsi sono sakhe sibi kangakanani, futsi atsatse tinyatselo tekubuyela kuJehova.
Kutsiwani nangabe sihlobo sisusiwe ekuhlanganyeleni? Esimeni lesinjalo, sibopho lesicinile semalunga emndeni singaba luvivinyo lwekwetsembeka. Kufanele sisiphatse njani sihlobo lesisusiwe ekuhlanganyeleni? Lapha singeke sikhulume ngato tonkhe timo letingase tivele, kepha ase sicoce ngaletimbili letiyinhloko.
Ngaletinye tikhatsi, lilunga lemndeni lelisusiwe kungenteka lisahlala ekhaya nalamanye emalunga emndeni. Njengobe kususwa kwakhe akusincamuli sibopho semndeni, imisebenti yasekhaya yamalanga onkhe ingachubeka. Kepha ngendlela yakhe yekuphila, ukhetse kuncamula sibopho nobe buhlobo bakhe nemalunga emndeni wakhe lakholwako. Ngako-ke, emalunga emndeni latsembekile angeke abe nebuhlobo bakamoya naye. Sibonelo saloku kutsi lona losusiwe angeke abekhona lapho emalunga emndeni atadisha liBhayibheli ndzawonye. Nobe kunjalo, nangabe lona losusiwe asengumntfwana, futsi asengaphansi kwesandla sebatali bakhe, labo batali basenemtfwalo wekumfundzisa nekumyala. Ngako-ke, batali labanelutsandvo bangase bahlele kumchubela sifundvo seliBhayibheli loyo mntfwana. *
Kuletinye timo, lesihlobo lesisusiwe kungenteka asihlali ekhaya nemndeni wakubo. Nobe tingase tibe khona timo letingakavami letidzinga kuchumana ngelizinga lelilinganiselwe kute kusingatfwe ludzaba lolutsite lolubalulekile lwemndeni, timo letinjalo kufanele tigcinwe timbalwa. Emalunga latsembekile emndeni wemaKhristu akafunani netaba tekusebentelana nesihlobo lesisusiwe ekuhlanganyeleni lesingahlali ekhaya. Kunaloko, kwetsembeka kwabo kuJehova kanye nasenhlanganweni yakhe kubenta kutsi balisekele lelilungiselelo lemBhalo lekususa ekuhlanganyeleni. Kwetsembeka kwabo kungamzuzisa loyo lowonile, futsi kungamsita ekutseni azuze esiyalweni laniketwe sona. *
^ sig. 1 Timiso teliBhayibheli ngalendzaba tisebenta ngendlela lefananako nakulabo labatehlukanisako ebandleni.
^ sig. 2 Kute utfole kwatiswa lokubanti mayelana nemntfwana losusiwe losahlala ekhaya, fundza Sicongosekulindza sa-October 1, 2001, emakhasi 16-17, kanye nesa-November 15, 1988, likhasi 20, ngesiZulu.
^ sig. 8 Kute utfole kwatiswa lokubanti mayelana nendlela yekuphatsa sihlobo lesisusiwe ekuhlanganyeleni, fundza seluleko semBhalo lokwakhulunywa ngaso ku-Sicongosekulindza sa-April 15, 1988, emakhasi 26-31, kanye nesa-March 1, 1982, emakhasi 26-31, ngesiZulu.
