1-3. (a) Bantfu labanyenti bativa njani ngemsebenti wabo? (b) LiBhayibheli likhutsata muphi umbono ngemsebenti, futsi ngumiphi imibuto lesitawucoca ngayo kulesehluko?

KUBANTFU labanyenti, umsebenti awutsandzeki. Kucitsa ema-awa lamanyenti wenta umsebenti longawutsandzi, kwenta ungakutsandzi kuya emsebentini lilanga ngalinye. Bantfu labanesimo lesinjalo sengcondvo bangakhutsatwa njani kutsi bajabulele umsebenti wabo—singasayiphatsi-ke yekutfola kweneliseka kuwo?

² LiBhayibheli likhutsata kuba nembono lofanele ngemsebenti lomatima. Litsi umsebenti nemiphumela yawo usibusiso. Solomoni wabhala: “Ngetulu kwaloko, kutsi umuntfu adle anatse atijabulise ngayo yonkhe imishikashika yakhe kusipho saNkulunkulu.” (Umshumayeli 3:13) Jehova uyasitsandza, futsi ngaso sonkhe sikhatsi usifunela lokuncono kakhulu, ufuna sitfole kweneliseka ngemsebenti wetfu futsi sijabulele netitselo tawo. Kute sihlale elutsandvweni lwakhe, sidzinga kuphila ngekuvumelana nendlela labheka ngayo tintfo, kanye netimiso takhe letiphatselene nemsebenti.—Fundza Umshumayeli 2:24; 5:18.

³ Kulesehluko, sitawucoca ngalemibuto lemine: Yini lengasisita seneliseke ngemsebenti wetfu? Nguluphi luhlobo lwemsebenti lolungakawafaneli emaKhristu eliciniso? Singaba njani nekulinganisela emsebentini wekutiphilisa kanye netintfo letiphatselene nekukhonta kwetfu Nkulunkulu?  Ngumuphi umsebenti lobaluleke kunayo yonkhe lesingawenta? Kwekucala, ase sicoce ngetibonelo letimbili tetisebenti letinkhulu kakhulu endzaweni yonkhe—Nkulunkulu Jehova naJesu Khristu.

4, 5. LiBhayibheli likuveta njani kutsi Jehova usisebenti lesiphumelelako?

⁴ Jehova uSisebenti Lesikhulu kunato tonkhe. Genesisi 1:1 utsi: “Ekucaleni Nkulunkulu wadala lizulu nemhlaba.” Watsi nje nakacedza umsebenti wakhe wekudala, lokuhlanganisa kudala umhlaba, Nkulunkulu watsi konkhe “kuhle kakhulu.” (Genesisi 1:31) Ngalamanye emavi abeneliseke kakhulu ngawo wonkhe umsebenti wakhe wasemhlabeni. Jehova, ‘longuNkulunkulu lojabulako,’ akungabateki kutsi utfola injabulo lenkhulu ekubeni kwakhe sisebenti lesiphumelelako.—1 Thimothi 1:11.

⁵ Nkulunkulu wetfu lokhutsele akayekeli kusebenta. Ngemuva kwesikhatsi lesidze umhlaba kanye nako konkhe lokukuwo kudaliwe, Jesu watsi: “Babe wami seloku usasebenta kuze kube manje.” (Johane 5:17) Yini Babe wakhe labesolo ayenta? Asendzaweni yakhe yasezulwini, abeloku achubeka nekucondzisa futsi anakekela bantfu. Wente kutsi kubekhona ‘indalo lensha,’ lokungemaKhristu latalwe ngemoya latawubusa naJesu ezulwini. (2 Khorinte 5:17) Nkulunkulu abeloku asebentela kufeza injongo yakhe ngebantfu—yekutsi labo labamtsandzako batfole kuphila lokuphakadze eveni lelisha. (Roma 6:23) Nembala, Jehova uyajabula ngemiphumela yalomsebenti. Tigidzi tisivile lesigijimi seMbuso, Nkulunkulu watidvonsa, talungisa indlela yato yekuphila kute tihlale elutsandvweni lwakhe.—Johane 6:44.

6, 7. Nguliphi ligama lekuba sisebenti lesikhutsele Jesu latakhela lona?

⁶ Jesu unesikhatsi lesidze atiwa ngekuba sisebenti lesitikhutsele. Ngembi kwekuta kwakhe emhlabeni abe ngumuntfu, ‘abesisebenti lesiyingcweti saNkulunkulu ngesikhatsi kudalwa  tonkhe tintfo, ‘letisezulwini naletisemhlabeni.’ (Taga 8:22-31; Kholose 1:15-17) Ngesikhatsi alapha emhlabeni, Jesu wachubeka asebenta kamatima. Asesemncane, wafundza umsebenti wekwakha, watiwa ngekutsi ‘ngumbati.’ * (Makho 6:3) Lomsebenti wawufaka ekhatsi kusebenta kamatima kanye nemakhono lehlukahlukene—ikakhulukati ngobe ngaleso sikhatsi kwakute tindzawo tekusaha emapulango, tekutsenga emathuluzi ekusebenta kanye nemishini lesebenta ngagesi. Uyambona yini Jesu ngemehlo engcondvo ayotifunela takhe tingodvo—mhlawumbe agawula tihlahla atidvonsela lapho asebentela khona? Uyambona yini akha tindlu—asaha futsi afaka emakabha, enta tivalo, futsi akha nefenisha? Akungabateki kutsi Jesu wativela yena matfupha kweneliseka lokutfolakala ngemuva kwemsebenti lomuhle nalowentiwe kamatima.

⁷ Jesu abekhutsele emsebentini wekushumayela. Waba matasatasa iminyaka lemitsatfu kulomsebenti lobaluleke kangaka. Ngenca yekutsi abefuna kukhuluma nebantfu labanyenti kakhulu, akamoshanga sikhatsi, abevuka ekuseni ngetingweti asebente kute kube sebusuku. (Lukha 21:37, 38; Johane 3:2) “Wadzabula emadolobha nemadolobhana ashumayela liVangeli ngembuso waNkulunkulu.” (Lukha 8:1) Jesu wahamba emakhulu emakhilomitha ngetinyawo emigwacweni lenelutfuli endlulisa sigijimi setindzaba letinhle kubantfu.

8, 9. Jesu weneliseka njani ngemsebenti wakhe lomatima?

⁸ Weneliseka yini Jesu ngemsebenti wakhe lomatima enkonzweni? Yebo! Wahlanyela imbewu yeliciniso leMbuso, washiya emasimu alungele kuvunwa. Kwenta umsebenti waNkulunkulu kwamcinisa Jesu, kwamupha emandla kangangekutsi wadzela nekudla afuna kuwucedza ngalokuphelele lomsebenti. (Johane 4:31-38) Cabanga nje kutsi loko kwamupha kweneliseka lokunganani lapho asacedze lomsebenti  futsi abikela Babe wakhe atsi: “Babe, ngikudvumisile eveni, ngekucedzela umsebenti lowanginika wona kutsi ngiwente.”—Johane 17:4.

⁹ Siyaciniseka kutsi Jehova naJesu batibonelo letinhle kakhulu tebantfu labeneliseka ngemsebenti wabo lomatima. Lutsandvo lwetfu ngaJehova kufanele lusente sifune ‘kuba balingisi bakhe.’ (Efesu 5:1) Lutsandvo lwetfu ngaJesu kufanele lusente ‘silandzele tinyatselo takhe edvute.’ (1 Phetro 2:21) Ase sihlole indlela natsi lesingeneliseka ngayo ngemsebenti wetfu lomatima.

10, 11. Yini lengasisita ekutseni sibe nesimo sengcondvo lesihle ngemsebenti wetfu wekutiphilisa?

¹⁰ Umsebenti wekutiphilisa uyincenye yekuphila kwemaKhristu eliciniso. Sifuna kutfola kweneliseka kanye nenjabulo ngemsebenti wetfu, kepha loku kungaba matima nangabe sisebenta umsebenti lesingawutsandzi, nobe lomatima. Singajabula njani ngemsebenti wetfu etimeni letinjalo?

¹¹ Ngekuba nesimo sengcondvo lesihle. Singeke ngaso sonkhe sikhatsi sitishintje timo tetfu, kepha singakwati kushintja simo setfu sengcondvo. Kuzindla ngembono waNkulunkulu kungasisita ekutseni sibe nesimo sengcondvo lesihle ngemsebenti. Nasi sibonelo: Nangabe uyinhloko yelikhaya, khumbula kutsi umsebenti wakho ukusita kutsi ukhone kondla umndeni wakho ngisho nobe ubukeka uphansi. Ngako-ke, kondla umndeni wakho akusiyo intfo lencane emehlweni aNkulunkulu. LiVi lakhe litsi loyo longawondli umndeni wakhe ‘mubi kakhulu kunemuntfu longakholwa.’ (1 Thimothi 5:8) Kucaphela kutsi umsebenti wakho ukusita kutsi ukhone kufeza umgomo wakho—lokukufeza umtfwalo lowuniketwe nguNkulunkulu—kungakusita utfole kweneliseka kanye nenjongo emsebenti wakho, lokuyintfo labangayitfoli labo losebenta nabo.

12. Kukhutsala nekwetsembeka emsebentini kuzuzisa ngatiphi tindlela?

 ¹² Ngekukhutsala nangekwetsembeka. Kusebenta kamatima kanye nekufundza indlela yekwenta umsebenti wetfu kancono kungasiletsela tibusiso. Tisebenti letikhutsele, naletinemakhono tivame kubaluleka kakhulu kubacashi bato. (Taga 12:24; 22:29) NjengemaKhristu eliciniso, kufanele futsi setsembeke—singayebi imali, tintfo, kanye nesikhatsi semcashi. (Efesu 4:28) Njengobe sibonile esehlukweni lesendlulile, kwetsembeka kuyazuzisa. Sisebenti lesatiwa ngekwetsembeka, ngalokuvamile sitakwetsenjwa. Ngisho nobe  umcashi wetfu asibona sibonelo setfu sekwetsembeka nobe cha, singaba nekweneliseka lokutfolakala ngekuba ‘nanembeza lomsulwa’ nangekwati kutsi sijabulisa Nkulunkulu lesimtsandzako.—Hebheru 13:18; Kholose 3:22-24.

13. Sibonelo setfu lesihle emsebentini singaba namiphi imiphumela lemihle?

¹³ Ngekucaphela kutsi kutiphatsa kwetfu kungakhatimulisa Nkulunkulu. Lapho silondvolota lizinga leliphakeme lekutiphatsa kwebuKhristu emsebentini, labanye bayokucaphela loku. Kuba namuphi-ke umphumela? Singase ‘sihlobise imfundziso yaNkulunkulu uMsindzisi wetfu.’ (Thithusi 2:9, 10) Yebo, kutiphatsa kwetfu lokuhle kungenta labanye babone buhle bekukhonta kwetfu Nkulunkulu, kubese kukhanga kakhulu kubo. Asewucabange nje kutsi bewuyotiva njani lapho losebenta naye abanesifiso sekwati liciniso leliBhayibheli ngenca nje yesibonelo sakho lesihle emsebentini. Lokubaluleke nakakhulu, cabanga nganaku: Yini lengazuzisa kakhulu kwendlula kwati kutsi kutiphatsa kwakho lokuhle kukhatimulisa Jehova, futsi kwenta inhlitiyo yakhe ijabule?—Fundza Taga 27:11; 1 Phetro 2:12.

14-16. Lapho sibhekene netincumo letiphatselene nemsebenti, ngumiphi imibuto lokufanele siyicabangele?

¹⁴ LiBhayibheli alisho ngalokucondzile kutsi ngukuphi lokwemukelekako nalokungemukeleki nakutiwa endzabeni yemsebenti wekutiphilisa. Kepha loko akusho kutsi sesitawukhetsa nobe ngumuphi umsebenti singasanaki nekutsi uhlanganisani. ImiBhalo ingasisita ekukhetseni umsebenti lozuzisako, lotawusenta setsembeke, nalojabulisa Nkulunkulu, futsi sibe sigwema leyo lengamjabulisi. (Taga 2:6) Lapho sibhekene nesincumo sekukhetsa umsebenti, kunemibuto lemibili lebalulekile lokufanele sitibute yona.

¹⁵ Kwenta lomsebenti kukwenta intfo lelahlwa liBhayibheli yini? LiVi laNkulunkulu likulahla ngalokucondzile kweba,  kucala emanga nekwenta tithico. (Eksodusi 20:4; Imisebenti 15:29; Efesu 4:28; Sembulo 21:8) Kufanele sale nobe ngabe ngumuphi umsebenti loyawudzinga kutsi sente tintfo letinjalo. Lutsandvo lwetfu ngaJehova luyawusenta kutsi singawemukeli umsebenti lohlanganisa imikhuba leyephula imiyalo yakhe.—Fundza 1 Johane 5:3.

¹⁶ Kwenta lomsebenti kutawungenta kutsi ngihlanganyele yini nobe ngibe nesandla emkhubeni longakalungi? Cabanga  nganasi sibonelo: Kwenta umsebenti wekuphendvula tincingo akukubi. Kutsiwani-ke nangabe umKhristu anikwa umsebenti lonjalo emtfolamphilo lonikelisa ngengati? Kuyavunywa kutsi yena akasebenti ngalokucondzile ngekutsatfwa kwengati kute impontjelwe labanye. Nobe kunjalo, kusebenta kwakhe lapho bekungeke yini kusho kutsi naye usekela kumpontjelwa kwengati—lokungumkhuba lophambene neliVi laNkulunkulu? (Imisebenti 15:29) Njengebatsandzi baJehova, asifuni kuhlanganiswa nemikhuba lengasekelwa yimiBhalo.

17. (a) Ngumaphi emaphuzu lokufanele siwacabangele lapho senta tincumo letiphatselene nemsebenti? (Fundza libhokisi “ Kufanele Ngiwutsatse Yini Lomsebenti?”) (b) Nembeza wetfu ungasisita njani ekutseni sente tincumo letijabulisa Nkulunkulu?

¹⁷ Yonkhe imibuto lephatselene nemsebenti ingaphendvulwa ngekuhlolisisa lemibuto lemibili lebutwe esigabeni 15 na-16. Ngakulokunye, kunalamanyenti emaphuzu lesiyawube  senta kahle ngekuwacabangela lapho senta tincumo letimayelana nemsebenti. * Asinawulindzela kutsi sisebenti lesetsembekile sibeke imitsetfo letawuhlanganisa tonkhe timo letingaphakama. Kusetimeni letinjalo-ke lapho kudzingeka khona kutsi sibe nekucondza. Njengobe sifundzile eSehlukweni 2, kudzingeka sifundzise futsi siceceshe bonembeza betfu ngekufundza kutsi singalisebentisa njani liVi laNkulunkulu ekuphileni kwetfu kwamalanga onkhe. Nangabe ‘imicondvo yetfu lehlutekile’ iceceshwe kanjalo, nembeza wetfu ungasisita ekutseni sente tincumo letitawujabulisa Nkulunkulu futsi tisente sihlale elutsandvweni lwakhe.—Hebheru 5:14.

18. Kungani kulukhuni kuhlala wemukeleka kuJehova?

¹⁸ ‘Kuletikhatsi tekugcina’ futsi ‘letimatima,’ kwenta tincumo letisisita sihlale semukeleka kuJehova kulukhuni. (2 Thimothi 3:1) Kutfola umsebenti wekutiphilisa kanye nekuwugcina nako kungase kube yintfo lematima. NjengemaKhristu eliciniso, siyasicaphela sidzingo sekusebenta kamatima kute sondle imindeni yetfu. Kepha nangabe singanaki, kucindzetelwa emsebentini, nobe kuhungwa ngulelive lelitsandza umcebo kungase kusiphatamise enkonzweni yetfu yekushumayela nasekukhonteni kwetfu Nkulunkulu. (1 Thimothi 6:9, 10) Ase sibone kutsi singenta njani kute silinganisele emsebentini, ‘sikwati nekwehlukanisa lokuncono.’—Filiphi 1:10.

19. Kungani Jehova akufanelekela kwetsenjwa, futsi kumetsemba lokunjalo kusisita kutsi sigweme ini?

¹⁹ Tsemba Jehova ngayo yonkhe inhlitiyo yakho. (Fundza Taga 3:5, 6.) Jehova uyakufanelekela kwetsenjwa lokunjalo ngobe uyasikhatsalela. (1 Phetro 5:7) Wati tidzingo tetfu kwendlula tsine, futsi akehluleki kutenelisa. (Tihlabelelo 37:25) Ngako-ke,  senta kahle ngekulalela lapho liVi lakhe lisikhumbuta litsi: “Balekelani kutsandza imali, neneliswe nguloko leninako, ngobe Nkulunkulu watsi: ‘Ngingeke ngikuyekele, ngingeke ngikushiye.’” (Hebheru 13:5) Linyenti letikhonti tesikhatsi lesigcwele lingakufakazela kutsi Nkulunkulu uyatinakekela tidzingo tekuphila. Nangabe setsemba ngalokugcwele kutsi Jehova utawusinakekela, sitawukugwema kukhatsateka ngalokwecile  ngekunakekela imindeni yetfu. (Matewu 6:25-32) Angeke sivumele umsebenti wekutiphilisa kutsi usente singasayinaki imisebenti yebuKhristu, njengekushumayela tindzaba letinhle kanye nemihlangano yebuKhristu.—Matewu 24:14; Hebheru 10:24, 25.

20. Kushoni kugcina liso lakho liphilile, futsi singakwenta njani loko?

²⁰ Gcina liso lakho liphilile. (Fundza Matewu 6:22, 23.) Kuba neliso leliphilile kusho kugcina kuphila kwetfu kulula. UmKhristu loneliso leliphilile unaka injongo leyodvwa—lokukwenta intsandvo yaNkulunkulu. Nangabe liso letfu linake injongo leyodvwa, angeke sigijimise imisebenti leholela kahle nobe indlela yekuphila lephakeme. Angeke sibanjwe kufuna tintfo takamuva naletincono, batsengisi labatsi siyatidzinga kute sijabule. Ngako-ke, ungaligcina njani liso lakho liphilile? Ngekugwema kutifaka etikweletini letingakadzingeki. Ungatinklinyi ngetikhundla temsebenti letidla sikhatsi lesinyenti. Lalela seluleko seliBhayibheli lesitsi weneliseke ‘ngekudla nekwekwembatsa.’ (1 Thimothi 6:8) Funa tindlela tekwenta kuphila kwakho kube melula nakakhulu.

21. Kungani kufanele sibe netintfo letita kucala ekuphileni kwetfu, futsi ngutiphi leto tintfo?

²¹ Tibekele imigomo yakamoya, futsi unamatsele kuyo. Njengobe sinesikhatsi lesilinganiselwe, kufanele sibeke tintfo letita kucala ekuphileni kwetfu. Nasingakwenti loku, tintfo letingakabaluleki tingase tidle sonkhe sikhatsi setfu lesiligugu, bese tivalela leto letibaluleke kakhulu. Ngutiphi tintfo lekufanele tite kucala ekuphileni kwetfu? Linyenti lebantfu eveni lingase litsi yimfundvo lephakeme, ngobe ikusita ekutseni utfole umsebenti loholela kahle kulelive. Kepha Jesu wancusa balandzeli bakhe: “Funani kucala umbuso waNkulunkulu.” (Matewu 6:33) Tsine njengemaKhristu eliciniso, sibeka uMbuso waNkulunkulu kucala ekuphileni kwetfu. Indlela yetfu yekuphila—lokutincumo lesitentako, imigomo lesitibekela yona, kanye netintfo lesitentako—kufanele kubonise kutsi tindzaba teMbuso kanye nentsandvo yaNkulunkulu  kubaluleke kakhulu kitsi, kwendlula umcebo kanye nemsebenti wekutiphilisa.

22, 23. (a) Ngumuphi umsebenti loyinhloko wemaKhristu eliciniso, futsi singabonisa njani kutsi lomsebenti ubalulekile kitsi? (Fundza libhokisi “ Sincumo Sami Siye Sangenta Ngajabula Futsi Ngenetiseka Ekuphileni.”) (b) Ngukuphi kutimisela lonako ngalokuphatselene nemsebenti wekutiphilisa?

²² Ngenca yekwati kutsi siphila itikhatsini tekugcina, siwunaka kakhulu umsebenti loyinhloko wemaKhristu eliciniso—lokukushumayela nekwenta bafundzi. (Matewu 24:14; 28:19, 20) Njengobe silingisa Sibonelo setfu lesinguJesu, sifuna kuphishaneka sente lomsebenti losindzisa kuphila. Singabonisa njani kutsi lomsebenti ubalulekile kitsi? Linyenti lebantfu baNkulunkulu liyatinikela kute lishumayele ngenhlitiyo yonkhe njengebamemeteli belibandla. Labanye baye bahlela timo tabo kute bakwati kukhonta njengemahlahlandlela nobe titfunywa telivangeli. Bacaphela kubaluleka kwekubeka imigomo yekukhonta Jehova, batali labanyenti baye bakhutsata bantfwana babo kutsi baphishanekele imigomo yenkonzo yesikhatsi lesigcwele. Bamemeteli beMbuso labashisekako bayajabula yini ngemsebenti wabo lomatima enkonzweni? Yebo, bayajabula! Kukhonta Jehova ngemphefumulo wonkhe kusicinisekiso sekuphila lokujabulisako, lokwenetisako, kanye nalokunetibusiso letingeke tibalwe.—Fundza Taga 10:22.

²³ Linyenti letfu kufanele lisebente ema-awa lamanyenti emsebentini wekutiphilisa kute londle imindeni yalo. Khumbula kutsi Jehova ufuna sijabule ngemsebenti wetfu lomatima. Ngekuvumelanisa indlela yetfu yekucabanga kanye netento tetfu, nendlela yakhe yekucabanga netimiso takhe, singakutfola kweneliseka emsebentini wetfu. Nobe kunjalo, asitimisele kungawuvumeli umsebenti wetfu wekutiphilisa usiphatamise emsebentini loyinhloko—lokukushumayela tindzaba letinhle teMbuso waNkulunkulu. Ngekwenta lomsebenti ute kucala ekuphileni kwetfu, sisuke sibonisa lutsandvo lwetfu ngaJehova, futsi kanjalo sitigcine elutsandvweni lwakhe.