Yini loyentako nawutiva wesaba?— Kungenteka kutsi uya kumake wakho nakubabe wakho kute bakusite. Kodvwa kunalomunye umuntfu longakusita. Lomuntfu unemandla lamakhulu kwendlula bonkhe bantfu. Uyati kutsi ngubani loyo?— NguJehova Nkulunkulu. Asesicoce ngelijaha lelibitwa ngekutsi nguDavide lokukhulunywa ngalo eBhayibhelini. Davide bekati kutsi Jehova bekatohlala amsita, ngako bekangesabi.

Kusukela ngesikhatsi Davide aseluswane, batali bakhe bamfundzisa kutsi atsandze Jehova. Ngako loko kwamsita kutsi angesabi ngisho nalapho kwenteka tintfo letetfusako. Bekati kutsi Jehova abenguMngani wakhe nekutsi bekatomsita. Ngalelinye lilanga Davide eluse timvu, kwachamuka libhubesi lelikhulu lafike labamba imvu ngematinyo alo. Uyati yini kutsi wentani Davide? Waligijimisa lelibhubesi futsi walibamba, wase ulibulala ngetandla takhe. Nangalesikhatsi libhele lihlasela timvu takubo, Davide walibamba walibulala. Ucabanga kutsi ngubani lowasita Davide?— Ucinisile, bekunguJehova.

Nangalesinye sikhatsi Davide waba nesibindzi lesikhulu. Sive sema-Israyeli besilwa nebantfu lababitwa ngekutsi ngemaFilisti. Lelinye lemasotja emaFilisti belilidze kakhulu futsi belinemandla lamakhulu. Libito lalelisotja kwakunguGoliyathi. Lelisotja beledzelela emasotja aka-Israyeli kanye naJehova. Latsi lamasotja akete atokulwa nalo. Kodvwa onkhe bekasaba kakhulu kulwa nalo. Ngako ngesikhatsi Davide eva ngaloko, watsi kuGoliyathi: ‘Mine ngitawukulwa nawe! Jehova utangisita, futsi ngitakwehlula.’ Ucabanga kutsi Davide bekanesibindzi yini?— Yebo, bekanesibindzi lesikhulu. Uyafuna yini kwati kutsi kwentekani ngemuva kwaloko?

Davide watsatsa sidubulelo sakhe nematje lashelelako lasihlanu, wahamba wayewukulwa nalelisotja lelinemandla. Ngesikhatsi Goliyathi abona kutsi Davide bekamncane kangakanani, wahlekisa ngaye. Kodvwa Davide watsi kuye: ‘Wena uta kimi uphetse inkemba, kodvwa mine ngita kuwe ngelibito laJehova!’ Watsatsa litje walifaka kulesidubulelo sakhe, wagijima wacondza kuGoliyathi wase umjikijela ngalo. Lelitje lashaya Goliyathi, langena ekhatsi ebuntini. Lelisotja lelinemandla lamakhulu lavele lawela phansi,  lafa. EmaFilisti acala kwesaba futsi onkhe abaleka. Njengobe Davide bekangumfana lomncane kangaka, wakhona njani kwehlula Goliyathi?— Jehova wamsita ngobe yena unemandla lamakhulu kwendlula Goliyathi.

Yini longayifundza kulendzaba yaDavide?— Jehova unemandla lamakhulu kwendlula bonkhe bantfu, futsi unguMngani wakho. Ngako-ke nakuphindze kwenteka ufikelwa kwesaba, khumbula kutsi Jehova angakusita kutsi ube nesibindzi.