SIFUNDVO 24
Liyini Liciniso Ngetingilosi?
Jehova ufuna siwati umndeni wakhe losezulwini. Lomndeni ufaka ekhatsi tingilosi, letibitwa ngekutsi ‘ngemadvodzana aNkulunkulu.’ (Jobe 38:7, umbhalo longentansi) Litsini liBhayibheli ngetingilosi? Tingilosi tikutsintsa njani kuphila kwebantfu? Tonkhe tingilosi tiyincenye yemndeni waNkulunkulu yini?
1. Tibobani tingilosi?
Jehova wadala tingilosi ngaphambi kwekutsi adale umhlaba. Njengaye, tonkhe tingumoya futsi tihlala ezulwini. (KumaHebheru 1:14) Kunetigidzigidzi tetingilosi futsi tonkhe atifani. (Sembulo 5:11) ‘Tenta loko [Jehova] lakushoko futsi tilalela livi lakhe.’ (Tihlabelelo 103:20) Ngaletinye tikhatsi endvulo, Jehova bekatfuma tingilosi kutsi timikise imilayeto kubantfu bakhe, tibasite tiphindze tibasindzise. Lamuhla, tingilosi ticondzisa emaKhristu kubantfu labafuna kufundza ngaNkulunkulu.
2. Ungubani Sathane nemadimoni akhe?
Letinye tingilosi atizange tihlale tetsembekile kuJehova. Ingilosi yekucala leyavukela Nkulunkulu nguleyo ‘lebitwa ngekutsi nguDeveli nangekutsi nguSathane, lodukisa umhlaba wonkhe.’ (Sembulo 12:9) Sathane bekafuna kubusa, ngako wadukisa bantfu bekucala, futsi ngekuhamba kwesikhatsi wenta naletinye tingilosi tavukela. Letingilosi letavukela tibitwa ngekutsi ngemadimoni. Jehova waticosha ezulwini watiphonsa emhlabeni, futsi titawubhujiswa.—Fundza Sembulo 12:9, 12.
3. Sathane nemadimoni betama njani kusidukisa?
Sathane nemadimoni badukisa bantfu labanyenti ngekubenta basebentise budimoni, lokungumkhuba lomubi wekutama kuchumana nemimoya. Sibonelo nje, labanye bantfu babuta kulabo labafundza tinkhanyeti, kulababiketela inhlanhla, kulabaphengulako nakubatsakatsi. Labanye bafuna tindlela tekwelashwa kusetjentiswa imimoya. Bantfu baphindze bayengwe kuze bakholelwe kutsi bangakhona kukhuluma nebantfu labafile, kodvwa Jehova uyasecwayisa: “Ningayi kubantfu labatangoma futsi ningayi kuyobuta kulabaphengulako.” (Levithikhusi 19:31) Usiniketa lesecwayiso kuze asivikele kuSathane nasemadimonini. Batitsa taNkulunkulu futsi bafuna kusilimata.
CHUBEKA UFUNISISA
Fundza ngetintfo letinhle letentiwa tingilosi, tingoti tekusebentisa imimoya nangekutsi singativikela kanjani kuSathane nasemadimonini.
4. Tingilosi tisita bantfu kutsi bafundze ngaJehova
Tingilosi taNkulunkulu atibashumayeli bantfu ngalokucondzile. Kunaloko, tingacondzisa tikhonti taNkulunkulu kubantfu labafuna kufundza ngaye. Fundza Sembulo 14:6, 7, bese nicoca ngalemibuto:
-
Yini lesenta sidzinge lusito lwetingilosi kuze sishumayele?
-
Kuyakukhutsata yini kwati kutsi tingilosi tingakucondzisa kubantfu labafuna kufundza liBhayibheli? Leni?
5. Kubalekele kusebentisa imimoya
Sathane nemadimoni batitsa taJehova, baphindze babe titsa tetfu. Fundza Lukha 9:38-42, bese nicoca ngalombuto:
-
Emadimoni abaphatsa njani bantfu?
Asifuni kusebentisa emadimoni ekuphileni kwetfu. Fundza Dutheronomi 18:10-12, bese nicoca ngalemibuto:
-
Emadimoni etama kusidukisa nekuchumana natsi ngatiphi tindlela? Ngumiphi imikhuba levamile endzaweni yangakini?
-
Nawucabanga, kukahle yini kutsi Jehova angasivumeli sente imikhuba lehambisana nekusebentisa imimoya? Yini lekwenta usho njalo?
Dlala le-VIDEO, bese nicoca ngalemibuto lelandzelako.
-
Ucabanga kutsi bekuyingoti yini loko lebekugatjwe yindvodzakati yaPalesa? Yini lekwenta usho njalo?
-
Yini Palesa lebekufanele ayente kuze avikeleke emadimonini?
EmaKhristu eliciniso bekahlale amelana nemadimoni. Fundza Imisebenti 19:19 na-1 KubaseKhorinte 10:21, bese nicoca ngalombuto:
-
Kubaluleke ngani kulahla yonkhe intfo lehlobene nekusebentisa imimoya?
6. Yincobe imphi loyilwa naSathane nemadimoni akhe
Emadimoni abuswa nguSathane. Tingilosi letetsembekile tona ticondziswa nguMikhayeli ingilosi lenkhulu, lokungulelinye ligama laJesu. Unemandla kangakanani Mikhayeli? Fundza Sembulo 12:7-9, bese nicoca ngalemibuto:
-
Ngubani lonemandla lamakhulu? NguMikhayeli netingilosi takhe nobe nguSathane nemadimoni akhe?
-
Ucabanga kutsi balandzeli baJesu kufanele bamesabe yini Sathane nemadimoni akhe?
Ungayincoba imphi loyilwa naSathane nemadimoni akhe. Fundza Jakobe 4:7, bese nicoca ngalombuto:
-
Ungativikela kanjani kuSathane nasemadimonini?
LABANYE BANTFU BATSI: “Kute lokubi ngekudlala imidlalo nobe kubukela ema-movie lanekusebentisa imimoya. Kumane kukutijabulisa nje.”
-
Yini leyenta kutijabulisa lokunjalo kube yingoti?
LOKO LESICOCE NGAKO
Tingilosi letetsembekile tiyasisita. Sathane nemadimoni akhe batitsa taJehova futsi basebentisa imimoya kuze badukise bantfu.
Yini Loyifundzile?
-
Tingilosi taJehova tibasita njani bantfu kutsi bafundze ngaye?
-
Ungubani Sathane nemadimoni akhe?
-
Kungani kufanele sikubalekele kusebentisa imimoya?
LOKUNYE LONGAKUHLOLA
Buka bufakazi bekutsi Jesu nguMikhayeli ingilosi lenkhulu.
“Ngubani Mikhayeli Ingilosi Lenkhulu?” (Sihloko lesiku-internet)
Buka bufakazi bekutsi Develi ungumuntfu mbamba.
Fundza indlela lomunye wesifazane laphunyula ngayo ekudukisweni ngemadimoni.
“Wathola Injongo Ekuphileni” (Sicongosekulindza, saJuly 1, 1993 lesitfolakala ngesiZulu)
Fundza indlela Sathane lasebentisa ngayo imimoya kuze adukise bantfu.
Lokunye Longatsandza Kukuhlola
IMIBUTO BANTFU LABAVAMISE KUYIBUTA
Siyini Sifundvo SeliBhayibheli Lesichutjwa BoFakazi BaJehova?
Ungasebentisa nobe ngabe nguliphi lihumusho leliBhayibheli nawutadisha naBoFakazi BaJehova. Ukhululekile kumema umndeni wakho wonkhe nobe bangani bakho kutsi babe khona nawufundza.
