SIFUNDVO 74
Jesu Uba NguMesiya
Johane abeshumayela atsi: ‘Kukhona lota emvakwami, lonemandla kunami.’ Ngesikhatsi Jesu aneminyaka lengu-30 budzala wasuka eGalile waya eMfuleni iJordane lapho bekunaJohane khona abhabhatisa bantfu. Jesu abefuna Johane ambhabhatise kodvwa Johane watsi: ‘Ngimi lokufanele ngibhajatiswe nguwe, kodvwa kuya ngani kutsi wena ute kimi kute ngikubhabhatise?’ Jesu watsi kuJohane: ‘Jehova ufuna wena ungibhabhatise.’ Ngako baya eMfuleni iJordane futsi Johane wacwilisa Jesu emantini.
Nakaphuma emantini Jesu wathantaza. Ngaleso sikhatsi, lizulu lavuleka, kwase kwehlela etikwakhe umoya waNkulunkulu unjengelituba. Jehova wakhuluma asezulwini watsi: ‘Wena uyiNdvodzana yami letsandzekako, ngikwemukele.’
Ngesikhatsi umoya waJehova wehlela kuJesu, wabese uba nguKhristu nobe Mesiya. Abesatawucala umsebenti Jehova labemtfume kutsi atowenta emhlabeni.
Ngekushesha nje nakacedza kubhajatiswa, Jesu waya ehlane futsi wahlala khona emalanga langu-40. Nakabuya waya kuJohane. Watsi nakasondzela Jesu, Johane watsi: ‘Leli liWundlu laNkulunkulu lelitawususa sono emhlabeni.’ Ngekusho loku, Johane abetjela bantfu kutsi Jesu unguMesiya. Uyati kutsi kwentekani kuJesu ngesikhatsi asehlane? Asesibone.
“Kwevakala nelivi liphuma ezulwini litsi: ‘Wena uyiNdvodzana yami letsandzekako, ngikwemukele.’”—Makho 1:11
Lokunye Longatsandza Kukuhlola
Fundza Kumfundzisi Lomuhle Kakhulu
“Lena Yindvodzana Yami”
TIMPHENDVULO TEMIBUTO LEMAYELANA NELIBHAYIBHELI
Kuyini Kubhajatiswa?
Kunyenti kubhajatiswa emantini lokukhulunywa ngako eBhayibhelini, lokuveta kutsi kusho kutsini kubhajatiswa kanye nekubaluleka kwako.
