Ngemuva kwesikhatsi Jesu abonwe baphostoli, Phetro wahamba wayodweba timfishi eLwandle laseGalile. BoTomase, Jakobe, Johane kanye nalabanye bafundzi baJesu bahamba naye. Badweba busuku bonkhe kodvwa abazange babambe ngisho nayinye imfishi.

Ngelilanga lelilandzelako ekuseni, babona indvodza ime elugwini lwelwandle. Yamemeta yatsi: ‘Kukhona yini timfishi lenitibambile?’ Bayiphendvula batsi: ‘Cha!’ Lendvodza yatsi: ‘Jikani lelinethi ngesekudla salesikebhe.’ Ngako balijika, kodvwa abazange basakhona kulidvonsa ngobe beseligcwele timfishi letinyenti. Ngekushesha Johane wabona kutsi lendvodza bekunguJesu, futsi watsi: ‘YiNkhosi!’ Phetro nakeva kutsi yiNkhosi watijika elwandle wahlamba waya kuJesu, lalabanye bafundzi beta ngesikebhe.

Nabefika elugwini, babona emalahle lavutsako, futsi kwakubekwe  timfishi nesinkhwa etikwawo. Jesu watsi kubo abaletse letinye taletimfishi labatibambile. Wase utsi: ‘Wotani nitewukudla.’

Nasebacedzile kudla, Jesu wabuta Phetro watsi: ‘Ungitsandza kwendlula letimfishi yini?’ Phetro watsi: ‘Yebo Nkhosi, uyati kutsi ngiyakutsandza.’ Jesu watsi: ‘Yondla timvu tami.’ Jesu waphindze wambuta watsi: ‘Phetro uyangitsandza yini?’ Phetro watsi: ‘Yebo Nkhosi, uyati kutsi ngiyakutsandza.’ Jesu watsi: ‘Yelusa timvu tami.’ Jesu wambuta kwesitsatfu. Phetro weva buhlungu kakhulu. Watsi: ‘Nkhosi, wena wati tonkhe tintfo; uyati kutsi ngiyakutsandza.’ Jesu watsi: ‘Yondla timvu tami.’ Wase utsi kuPhetro: ‘Chubeka ungilandzela.’