Ngemuva kwekuhola sive sema-Israyeli iminyaka leminyenti, Mosi besekatawufa. Jehova watsi kuye: ‘Angeke uwahole ema-Israyeli nakewela iJordane ayongena eVeni Lesetsembiso. Kodvwa ngitakuvumela ulibuke lelive.’ Mosi wacela Jehova kutsi akhetse lomunye umuntfu lotawuhola sive sema-Israyeli. Jehova watsi kuye: ‘Hamba utjele Joshuwa kutsi nguye lengimkhetsile.’

Mosi watjela lesive kutsi yena sewutakufa futsi Jehova sewukhetse Joshuwa kutsi asihole size siyongena eVeni Lesetsembiso. Mosi wase utsi kuJoshuwa: ‘Ungesabi. Jehova Nkulunkulu wakho unawe. Ngemuva kwekusho lamavi, Mosi waya eNtsabeni iNebo lapho Jehova amkhombisa khona lelive lebekaletsembise Abrahama, Isaka naJakobe. Mosi wafa aneminyaka lengu-120.

Jehova watsi kuJoshuwa: ‘Tilungiselele kuze newele uMfula iJordane, niye eKhenani. Ngitawuba nawe, njengobe nje benginaMosi. Incwadzi yeMtsetfo kufanele uyifundze imini nebusuku. Bani nesibindzi futsi ucine. Hamba ukwente konkhe lengikuyale kona.’

 Joshuwa watfumela tinhloli letimbili edolobheni laseJerikho. Kulesihloko lesilandzelako, sitawucoca kabanti ngaloko lokwenteka natifika eJerikho. Natibuya, tabika kutsi bekusikhatsi lesikahle kutsi lesive singaya eKhenani. Ngakusasa, Joshuwa watjela lesive kutsi silungiselele kuhamba. Ngako watjela baphristi kutsi betfwale libhokisi lesivumelwane bewele nalo uMfula iJordani. Lomfula bewugcwele. Kodvwa ngekushesha nje baphristi nabafaka tinyawo tabo emantini, lamanti ancipha futsi ehlukana ekhatsi. Baphristi bahamba emhlabatsini lowomile base bamela ema-Israyeli kutsi ewele. Ucabanga kutsi lesimangaliso sawakhumbuta yini loko Jehova lawentela kona eLwandle Lolubovu?

Ekugcineni ngemuva kwayo yonkhe leminyaka, ema-Israyeli angena eVeni Lesetsembiso. Akha tindlu nemadolobha. Alima emasimu, ahlanyela imivini kanye netihlahla. Bekulive leligeleta lubisi neluju.