Nkulunkulu ufuna bantfu bakujabulele kuphila emhlabeni. Ngesizatfu sekutsi uyabatsandza bantfu, wadala umhlaba nako konkhe lokukuwo. Madvutane, utawutsatsa sinyatselo kute aletsele bonkhe bantfu likusasa lelincono kakhulu. Utawukhulula bantfu kuto tonkhe tintfo letibabangela kutsi bahlupheke.​—Fundza Jeremiya 29:11.

Kute hulumende lowake waphumelela kucedza budlova, tifo, kanye nekufa. Kepha tikhona tindzaba letimnandzi. Madvutane nje, Nkulunkulu utawubasusa bonkhe bohulumende bebantfu, bese ubeka hulumende wakhe. Bantfu labatawuba ngephansi kwalohulumende batawujabulela kuthula nemphilo lenhle.​—Fundza Isaya 25:8; 33:24; Danyela 2:44.

Kuhlupheka kutawuphela lapho Nkulunkulu sekasuse bonkhe bantfu lababi emhlabeni. (Zefaniya 2:3) Kutakwenteka nini loko? LiVi laNkulunkulu lakhuluma ngetimo nyalo lesetenta kuphila kwebantfu kube lukhuni. Tintfo letentekako nyalo tikhombisa kutsi sikhatsi sekutsi Nkulunkulu atsatse sinyatselo sesisedvute.​—Fundza 2 Thimothi 3:1-5.

Kufanele sifundze ngaNkulunkulu eVini lakhe liBhayibheli. Lifanana nencwadzi lesiyibhalelwe ngubabe lositsandzako. Lisitjela kutsi singayitfola njani indlela lencono yekuphila nyalo nekutsi singakutfola njani kuphila lokuphakadze emhlabeni esikhatsini lesitako. Kuliciniso kutsi labanye kungenteka bangatsandzi kukubona utfola lusito lwekwati liBhayibheli. Kepha njengobe Nkulunkulu asetsembisa likusasa lelincono kakhulu, akukafaneli sivumele labanye basiyekelise kufundza ngalo.​—Fundza Taga 29:25; Sembulo 14:6, 7.