UYASATI yini lesakhiwo losibonako? Leli lithende lelikhetsekile lebekukhulekelwa kulo Jehova. Liphindze libitwe ngekutsi lithende lekukhontela. Ema-Israyeli acedza kulakha ngemuva kwemnyaka ahambile eGibhithe. Uyati kutsi ngubani lowatsi alakhiwe?

NguJehova. Ngalesikhatsi Mosi aseNtsabeni iSinayi, Jehova wamtjela kutsi kwakufanele lakhiwe njani lelithende. Wamtjela nekutsi alakhe ngendlela lebeyiyokwenta kube melula kulihlukanisa libe tincenye. Letincenye talo betiyotfwalwa ngekwehlukana nasekutfutselwa kulenye indzawo, bese tiphindze tiyahlanganiswa. Ngalesikhatsi ema-Israyeli asesehlane abehamba nalo lelithende nakatfutsa, asuka kulenye indzawo aya kulenye.

Nawubuka ekhatsi ekamelweni lelincane lelingasekugcineni kwelithende, ubona libhokisi. Libitwa ngekutsi libhokisi lesivumelwane. Etikwalo kwakunetingilosi nobe emakherubi lamabili lentiwe ngegolide, lelinye belima ngala lelinye lime ngale. Nkulunkulu waphindze wayibhala iMiyalo Lelishumi etibhelekeceni tematje, ngobe Mosi abetiphihlitile leti tekucala. Letibhelekece tematje tatifakwa ekhatsi ebhokisini lesivumelwane, kanye nelijeke lelinemana. Usakhumbula kutsi iyini imana?

UmnakaboMosi, Aroni nguye lowakhetfwa nguJehova kutsi abe ngumphristi lomkhulu. Abehola bantfu ekukhonteni Jehova. Nemadvodzana akhe nawo abebaphristi.

Nyalo buka lelikamelo lelikhulu, lona likhulu ngalokuphindvwe kabili kunaleli lelincane. Uyalibona yini lelibhokisi lelincane lelisekhatsi kulo, lelishunca intfutfu? Leli li-altare, lapho baphristi bashisela khona imphepho lenuka kamnadzi. Kwakukhona nelutsi lwesibane, lolwalunetibane letisikhombisa. Intfo yesitsatfu leyayikhona kulelikamelo, kwakulitafula. Etikwalo kwakubekwe tinkhwa letingu-12.

Ebaleni lelisedvute nelithende lekukhontela, kwakubekwe bheseni nobe sitja lesikhulu lesasigcwaliswa ngemanti. Baphristi babesisebentisela kugeza tandla tabo netinyawo. Kwakukhona neli-altare lelikhulu, lapho kwakwentiwa khona umnikelo wetilwane wekushiswa loya kuJehova. Lelithende lalakhiwe laba semkhatsini walenkambu, futsi ema-Israyeli abehlala emathendeni lalitungeletile.