KWENDLULA iminyaka lengu-10, 20, 30, nalengu-39, solo asehlane ema-Israyeli. Yonkhe leminyaka Jehova, abebanakekela bantfu bakhe. Abebondla ngemana. Emini abebahola ngensika yelifu kantsi ebusuku abebahola ngensika yemlilo. Yonkhe leminyaka timphahla tabo betingagugi ngisho netinyawo tabo betingabi buhlungu.

Enyangeni yekucala ngemnyaka wesi-40 ema-Israyeli aphumile eGibhithe, aphindze ahlala eKhadeshi. Phela abehlala lapho nangalesikhatsi kutfunyelwa tinhloli letingu-12 kutsi tiyewuhlola live laseKhenani, eminyakeni lecishe ibe ngu-40 leyendlulile. Kukulelo live lapho Miriyamu sisi waMosi afela khona. Njengoba kwakunjalo nasekucaleni, ema-Israyeli aphindze ahlangana netinkinga nawefika kulelo live.

Bantfu bebete emanti. Bakhonona kuMosi batsi: ‘Bekungaba ncono kube mane savele safa. Nasikhiphelani lena eveni laseGibhithe nasiletsa lapha kulelive lelibi kangaka? Lelive lite kudla, emakhiwa, emagelebisi, emahananandza, kute ngisho nemanti ekunatsa.’

BoMosi na-Aroni batsi baya ethendeni lekukhontela bayothandaza, Jehova watsi kuMosi: ‘Butsela sonkhe sive ndzawonye, bese ukhuluma kulelidvwala embikwaso sibuka, litawube selikhipha emanti. Lelidvwala litawukhipha emanti, kuze sonkhe sive kanye netimfuyo taso kunatse.’

Ngako Mosi wabutsa bantfu watsi kubo: ‘Lalelani-ke, nine mahlubuka, sinikhokhele yini emanti lulelidvwala?’ Mosi washaya lidvwala kabili ngendvuku, kwaphuma emanti lamanyenti banatsa bantfu nemfuyo.

Kodvwa Jehova wabatfukutselela boMosi na-Aroni. Uyati yini kutsi kungani abatfukutselela? Kungoba benta shengatsi ngabo labebatawukhipha lamanti kulelidvwala. Kodwa kwakunguJehova lona lowawakhipha. Njengoba bangazange balikhulume liciniso, Jehova watsi utawubajezisa. Watsi kubo: ‘Angeke nisasihola lesive nize nisifikise eveni laseKhenani.’

Sonkhe sive sema-Israyeli sesuka eKhadeshi, sahamba saya eNtsabeni iHori. Aroni wafike wafela kuleyontsaba. Abesaneminyaka lengu-123 budzala nakafa. Eva buhlungu kakhulu ema-Israyeli, kangangekutsi aze amkhalela emalanga langu-30. Indvodzana yakhe lengu-Eleyazare yabese ibangumphristi lomkhulu wesive saka-Israyeli esikhundleni sakhe.