DAVIDE nasekacalile kubusa eJerusalema, Jehova wenta kutsi emabutfo akhe aphumelele kanyenti etitseni tawo. Abetsembise kunika ema-Israyeli live laseKhenani. Ema-Israyeli alitsatsa lonkhe live laseKhenani, ngelusito lwakhe.

Davide abengumbusi lokahle, futsi abemtsandza Jehova. Ngako intfo yekucala layenta nakatsatsa liJerusalema, waletsa libhokisi lesivumelwane laJehova. Abefuna kwakha lithempeli lapho abetalibeka khona.

Watsi sekamdzala Davide, wenta liphutsa lelikhulu. Bekati kutsi kubi kutsatsa intfo yalomunye umuntfu angakakuniki. Kwatsi ngalelinye lilanga ebusuku, asetulu endlini yakhe, watsi ubuka phasi wabona umfati lomuhle. Ligama lakhe kwakunguBhatisheba. Indvodza yakhe kwakungulelinye lisotja laDavide. Ligama lalo kwakungu-Uriya.

Davide abefuna kulala naBhatisheba, kungako wamlandza wamletsa endlini yakhe. Phela indvodza yakhe yayingekho isemphini. Davide walala naye, futsi Bhatisheba abetawuba nemntfwana. Abekhatsateke kakhulu Davide. Watfumela Jowabe, indvuna yakhe yemphi kutsi ibeke Uriya embili emphini, lapho kwakutawuba melula khona kutsi abulawe. Nasekafile Uriya, Davide wabese ushada naBhatisheba.

Jehova wamtfukutselela kakhulu Davide. Ngako wavele watfumela inceku yakhe Nathani kutsi iyomtjela ngesono sakhe. Uyambona yini Nathani kulesitfombe akhuluma naDavide? Weva buhlungu kakhulu Davide ngaloko labekwentile, ngako Jehova akazange ambulale, kodvwa watsi kuye: ‘Njengoba wente loku lokubi kangaka, ngitakwehlisela inhlekelele letawuvela emndenini wakho.’ Impela Davide abetawehlelwa tinhlekelele letinkhulu!

Kwekucala, umntfwana wabo naBhatisheba wafa. Litubulo laDavide Amnoni lalala nadzadzewalo Thamari ngenkhani. Absalomu umnakabo watfukutsela kakhulu kangangekutsi waze wambulala Amnoni. Ngemuva kwesikhatsi, Absalomu wenta kutsi bantfu bamsekele, futsi watenta inkhosi. Ekugcineni Davide waphumelela emphini yakhe na-Absalomu, ngoba Absalomu wabulawa. Yebo, Davide wangena etinkingeni letinyenti.

Kwatsi kusenteka konkhe loku, Bhatisheba watala Solomoni. Watsi sekamdzala Davide futsi sekagula, indvodzana yakhe Adoniya yetama kutenta inkhosi. Davide wavele wabita umphristi Sadoki lowatsela emafutsa enhloko yaSolomoni kuze akhombise kutsi nguye lotawuba yinkhosi. Ngekushesha ngemuva kwaloko, Davide wafa aneminyaka lengu-70 budzala. Abesabuse iminyaka lengu-40, kodvwa Solomoni wase uba yinkhosi yaka-Israyeli.