KWATSI lapho iNkhosi Jerobowamu seyifile, inkhosi ngayinye lebeyibusa umbuso wasenyakatfo wetive letingu-10 taka-Israyeli, beyingakalungi. INkhosi Ahabi kwakungulembi kakhulu kunawo onkhe. Uyati yini kutsi kungani? Sizatfu lesikhulu kwakungumfati wayo, aJezebeli lobekayiNdlovukati lembi.

Jezebeli abengesuye umIsrayeli, abeyindvodzakati yenkhosi yaseSidoni. Abekhulekela Bhali longunkulunkulu wemanga, futsi wenta Ahabi kanye nalamanye ema-Israyeli kutsi nawo amkhulekele. Jezebeli abemzonda Jehova, futsi wabulala nebaphrofethi bakhe labanyenti. Labanye kwadzingeka kutsi babhace emihumeni kuze bangabulawa. Uma afuna lokutsite, abengaze abulale ngisho umuntfu kuze akutfole.

Ngalelinye lilanga iNkhosi Ahabi yatfukutsela kakhulu. Ngako Jezebeli wayibuta watsi: ‘Utfukutseleleni namuhla?’

Ahabi wamphendvula watsi: ‘Kungenca yaloko Nabothi lakukhulumile kimi. Ngitsite akangitsengisele sivini sakhe, kodvwa yena wangitjela kutsi angeke angitsengisele.’

Jezebeli watsi kuye: ‘Ungakhatsateki, ngitakutfolela sona.’

Ngako Jezebeli wabhala tincwadzi watitfumela kubaholi, edolobheni Nabothi labehlala kulo. Watsi kubo: ‘Tfolani emacili lamabili afakaze kutsi Nabothi ucalekise Nkulunkulu nenkhosi. Nibomtsatsa nimkhiphele ngephandle kwelidolobha, bese nimgcoba ngematje aze afe.’

Jezebeli watsi nasekeva kutsi Nabothi sewufile, watjela Ahabi loku: ‘Hamba uyewutsatsa sivini saNabothi.’ Uyabona yini kutsi Jezebeli kwakufanele ajeziswe ngenca yekwenta intfo lembi kangaka?

Ngalelinye lilanga Jehova watfuma Jehu kutsi ayomjezisa. Ngalesikhatsi Jezebeli eva kutsi Jehu uyeta, watipenda emehlo akhe, futsi watilungisa kuze abemuhle. Kodvwa watsi Jehu nakachamuka wabona Jezebeli eme efasitelweni, wamemeta emadvodza lakulendlu watsi: ‘Mphoseni phasi!’ Lamadvodza akwenta loko, njengoba ubona kulesitfombe. Amphosela phasi, futsi wafa. Yafa kanjalo-ke leNdlovukati lembi lenguJezebeli.