ASESIHLEHLELE emuva eminyakeni lembalwa ngembi kwekuya kwa-Ezra eJerusalema. Modekhayi na-Esta bebangema-Israyeli labalulekile embusweni wase Pheresiya. Esta abeyindlovukati, kantsi Modekhayi longumnakabo ngabobabe abewesibili ngemuva kwenkhosi embusweni. Ase sibone kutsi loko kwenteka njani.

Batali ba-Esta bafa asemncane kakhulu, ngako Modekhayi wamtsatsa wamkhulisa. Ahashiveroshi inkhosi yasePheresiya, abehlala edolobheni laseSusa, futsi Modekhayi abengulomunye wetinceku takhe. Ngalelinye lilanga Vashti loyinkhosikati yenkhosi wayedzelela, ngako kwadzingeka kutsi ikhetse umfati lomusha kutsi abe yindlovukati esikhundleni sakhe. Uyati kutsi yakhetsa bani? Yakhetsa Esta intfombatana lenhle.

Uyayibona lendvodza letigcabhako lekhotsanyelwa ngulabantfu kulesitfombe? Ligama layo nguHamani. Ungumuntfu lotsandvwako ePheresiya. Lana kulesitfombe ufuna naModekhayi lohleti phasi kutsi naye amkhotsamele. Kodvwa Modekhayi abengeke akwente loko. Abengakuboni kulungile kukhotsamela indvodza lembi njengaHamani. Kwamtfukutselisa loku Hamani, ngako naku lakwenta.

Wakhuluma emanga enkhosini ngema-Israyeli, watsi: ‘Asive lesibi lesingayilaleli imitsetfo yakho, ngako kufuneka kutsi sibulawe sonkhe.’ Ahashiveroshi abengati kutsi umkakhe Esta ungumIsrayeli. Ngako walalela Hamani, futsi wakhipha nesimemetelo lesisho lilanga ema-Israyeli lekwakufanele abulawe ngalo.

Watsi kube Modekhayi eve ngalomtsetfo, waphatseka kabi. Watfumela lomlayeto ku-Esta: ‘Hamba uye enkhosini, uyincenge kutsi imane ibe nemusa kitsi.’ Kwakuphambene nemtsetfo wasePheresiya kuyibona inkhosi, ngephandle kwekutsi ikumeme. Kodvwa Esta yena wangena angakamenywa. Inkhosi yaphakamisa indvuku yayo yegolide, lokwakusho kutsi angabulawa. Esta wabese sewumema inkhosi kanye naHamani edzilini. Sebalapho edzilini, inkhosi yambuta kutsi yini lena lafuna imentele yona. Kodvwa watsi utayitjela nangabe bona bobabili naHamani batawuphindze bete edzilini ngakusasa.

Edzilini lesibili Esta watsi enkhosini: “Mine nesive sakitsi sitsengiswe kutsi sibulawe.” Inkhosi yatfukutsela, ngako yambuta yatsi: “Ngubani lowo, ukuphi yena lowo muntfu lowente lesento lesinjalo?”

Esta watsi: ‘Sitsa setfu, ngunangu Hamani, lonenhlitiyo lembi!’

Inkhosi yaseyitfukutsele ibila. Yakhipha umyalo wekutsi Hamani abulawe. Ngemuva kwaloko, yabeka Modekhayi waba wesibili embusweni ngemuva kwakhe. Modekhayi wase umisa umtsetfo lovumela ema-Israyeli kutsi ativikele ngalelilanga lokwakufanele abulawe ngalo. Ngenca yekutsi Modekhayi abesabalulekile, bantfu labanyenti bawasita ema-Israyeli, futsi asindza nasetitseni tawo.