UYAYIBONA yini lentfo lembi leyentekako lapha? Jesu uyabulawa. Bamuphanyeke elugodvweni. Kushayelwe tipikili etandleni takhe nasetinyaweni. Bantfu bebangayenta kanjani intfo lenjena kuJesu?

Kungenca yekutsi labanye bantfu bebamenyanya. Uyati yini kutsi kwakubobani? Lomunye wabo kwakuyingilosi lembi lenguSathane Develi. Nguye lowabangela kutsi bo-Adamu na-Eva bangamlaleli Jehova. Sathane nguye futsi lowenta kutsi titsa taJesu tente lentfo lembi kangaka.

Nangembi kwekuba abetselwe, titsa takhe betisolo tenta tintfo letimbi kuye. Uyayikhumbula indlela lebamtsatsa ngayo nabefika ensimini yaseGetsemane? Tatibobani leto titsa? Kwakubaholi benkholo. Ase sibone kutsi kwentekani emuva kwaloko.

Ngesikhatsi Jesu atsatfwa ngulabaholi benkholo, baphostoli bakhe babaleka. Bamshiya kanye netitsa takhe ngenca yekutsi bebesaba. Kodvwa Phetro naJohane ababalekanga, kepha bebalandzela ngemuva kute babone kutsi kwentekani kuJesu.

Baphristi bayisa Jesu ku-Anasi, lowake waba ngumphristi lomkhulu. Abahlalanga sikhatsi lesidze lapho naJesu, kepha base bayesuka bamyisa kuKhayafase labengumphriti lomkhulu. Baholi benkholo labanyenti bebahlangene lapho.

Bebatekisa Jesu licala. Kwaletfwa bantfu kute batewufakaza emanga ngaJesu. Bonkhe baholi benkholo batsi: ‘Kufanele abulawe.’ Base bayamkhafulela futsi bamshaya ngetibhakela ebusweni.

Ngalesikhatsi konkhe loku kwenteka, Phetro abehleti ebaleni. Kwakungusebusuku, futsi kubandza, ngako-ke bantfu bebabase umlilo. Batsi basotsa umlilo, intfombatana letsite yabuka Phetro, yabese itsi: ‘Nalendvodza beyihamba naye loJesu!’

Phetro waphendvula watsi: “Cha! Angisiye.”

Kwaze kwaba tikhatsi letintsatfu solo bantfu batsi kuPhetro abenaJesu. Sikhatsi ngasinye, Phetro abekuphika loko. Lapho aphika kwesitsatfu, Jesu wagucuka wambuka. Phetro weva buhlungu kakhulu ngenca yekutsi ucambe emanga, futsi waphumela ngephandle wakhala kabuhlungu.

Njengoba lilanga liphuma ngaLesihlanu ekuseni, baphristi bamtsatsa Jesu bamyisa endzaweni yabo yekuhlangana. Befika bacoca ngekutsi batawumentani. Base bayamtsatsa bamyisa kuPhontiyu Philatu labengumbusi wesifundza saseJudiya.

Baphristi batjela Philatu batsi: ‘Lona ungumuntfu lomubi, ngako-ke kufanele abulawe.’ Ngemuva kwekubuta Jesu imibuto, Philatu wase utsi: ‘Angilitfoli licala kulomuntfu.’ Philatu wase utfumela Jesu kuHerodi Antipasi, labebusa sifundza saseGalile, kodvwa ahlala eJerusalema. Herodi naye akalitfolanga licala kuJesu, ngako-ke wambuyisela kuPhilatu.

Philatu abefuna kukhulula Jesu. Kepha titsa taJesu tona betifuna kukhululwe lesinye siboshwa lokwakutsiwa nguBharaba kunekutsi kukhululwe Jesu. Kwakusemini lapho Philatu akhiphela Jesu ngephandle, wase utsi kubantfu: ‘Nanso inkhosi yenu!’ Kepha baphristi labakhulu bamemeta ngentfukutselo batsi: ‘Msuse! Msuse! Mbetsele!’ Ngako-ke Philatu wase ukhulula Bharaba, futsi base bayamtsatsa Jesu baya kuyombulala.

NgaLesihlanu ntsambama, Jesu wabetselwa elugodvweni. Eluhlangotsini ngalunye lwakhe, kwakunaletinye tigelekece letimbili nato lebetibetselwe njengaye, kepha atibonakali lapha esitfombeni. Kusasele sikhatsi lesincane nje afe, lesinye saletigelekece satsi kuye: ‘Uze ungikhumbule embusweni wakho.’ Jesu wasiphendvula watsi: ‘Ngiyakwetsembisa kutsi utawuba nami ePharadisi.’

Akusiso yini setsembiso lesijabulisako leso? Uyalati yini lelipharadisi Jesu labekhuluma ngalo? Kantsi belikuphi lelipharadisi lelentiwa nguNkulunkulu ekucaleni? Lalisemhlabeni. Ngesikhatsi Jesu sekabusa ezulwini, utayivusa lendvodza, kute ijabulele kuphila ePharadisi emhlabeni. Akufanele yini kusijabulise loko?