LABANTFU labakulesitfombe babalandzeli baJesu. Bamlalela futsi bahlala eJerusalema. Ngalesikhatsi bonkhe basalindzile ndzawonye, kwevakala umsindvo lomkhulu endlini. Wawuvakala shengatsi ngumoya lomkhulu lohhusha ngemandla. Kwabonakala umlilo enhloko yemfundzi ngamunye. Uyawubona yini lomlilo lokumuntfu ngamunye lana esitfombeni? Kwakusho kutsini konkhe loku?

Kwakusimangaliso! Jesu abesabuyele kuBabe wakhe ezulwini, futsi watfululela umoya longcwele waNkulunkulu kubalandzeli bakhe. Uyati kutsi lomoya longcwele wababangela kutsi benteni? Bonkhe bacala kukhuluma tilwimi letehlukene.

Bantfu labanyenti eJerusalema bawuva lomsindvo lonjengemoya lomkhulu lohhushako, futsi beta batewubuka kutsi kwentekani. Labanye kubo bebasuka kuletinye tive, futsi bebete edzilini lema-Israyeli lePhentekhoste. Loku kwaba simangaliso kuletivakashi, ngoba teva bafundzi bakhuluma tilwimi takubo. Bebakhuluma ngemisebenti lemangalisako Nkulunkulu abeyentile.

Letivakashi tatsi: ‘Bonkhe labantfu baseGalile, pho kwentiwa yini kutsi sibeve nabakhuluma tilwimi tasemaveni lesiphuma kuwo?’

Phetro wasukuma watichazela. Wakhuluma ngelivi lelikhulu futsi watjela labantfu kutsi Jesu wabulawa njani nekutsi Jehova wamvusa kulabafile. Ngako watsi kubo: ‘Nyalo Jesu usezulwini ngasesandleni sekudla saNkulunkulu, futsi usitfululele lomoya longcwele lasetsembisa wona. Kungako nibone futsi neva ngaletimangaliso.’

Ngalesikhatsi Phetro akhuluma, labanyenti bantfu batsintseka etinhlitiyweni nabeva ngaloko lokwentiwa kuJesu. Ngako babuta: ‘Sitakwenta njani?’ Phetro wabaphendvula watsi: ‘Phendvukani endleleni leniphila ngayo, nibhajatiswe.’ Ngalo lelolanga kwabhajatiswa bantfu labacishe babengu-3 000 futsi baba balandzeli baJesu.