YINI loyibonako kulesitfombe? Libutfo leligibele emahhashi lamhlophe. Kodvwa ase ubukisise kutsi lichamuka kuphi. Lamahhashi ayagijima achamuka ezulwini ngelifu. Akhona yini emahhashi ezulwini?

Cha, lawa akusiwo emahhashi sibili. Sikwati loku ngoba emahhashi ngeke akwati kugijima emafini, angitsi? Kodvwa liBhayibheli liyakhuluma ngemahhashi lasezulwini. Uyati kutsi kungani likhuluma ngawo?

Kungenca yekutsi emahhashi abesetjentiswa kakhulu nakuyoliwa timphi. LiBhayibheli lisitjela ngebantfu labagibele emahhashi lasuka ezulwini, kute lisitjengise kutsi Nkulunkulu unemphi latayilwa nebantfu emhlabeni. Uyati kutsi lendzawo yalemphi ibitwa ngekutsini? I-Amagedoni. Lemphi itawucedza bonkhe bubi emhlabeni.

Jesu Nguye lotawube ahola ekulweni kulemphi e-Amagedoni. Khumbula, kutsi Jesu wakhetfwa nguJehova kutsi abe yinkhosi yahulumende Wakhe. Kungako Jesu afake lomchele wemakhosi enhloko yakhe. Lenkemba ikhombisa kutsi utawubulala tonkhe titsa taNkulunkulu. Kufanele kusimangalise yini kutsi Nkulunkulu utawubhubhisa bonkhe bantfu lababi?

Ase ubuke emuva eNdzabeni 10. Ubonani lapho? Ubona Zamcolo lomkhulu lowabhubhisa bantfu lababi. Ngubani lowabangela loZamcolo? NguNkulunkulu Jehova. Phindze ubuke iNdzaba 15. Kwentekani lapho? ISodoma neGomora ibhujiswa ngemlilo lowatfunyelwa nguJehova.

Vula iNdzaba 33. Uyabona kutsi kwentekani kulamahhashi, nakuletincola temphi temaGibhithe? Ngubani lowabangela lamanti kutsi abambonye? NguJehova. Wakwenta loku kuze avikele bantfu bakhe. Buka iNdzaba 76. Utawubona kuyo kutsi Jehova waphindze wavumela ema-Israyeli kutsi abhujiswe ngenca yebubi bawo.

Ngako, akukafanele kusimangalise kutsi Jehova utawutfumela emabutfo akhe asezulwini kutsi atewucedza bonkhe bubi lobusemhlabeni. Kodvwa asewucabange kutsi loko kuyosho kutsini. Vula likhasi lelilandzelako ubone.