1, 2. (a) Buyini bufakazi bekutsi usakhamuti seMbuso waNkulunkulu? (b) Kungani ngalesinye sikhatsi kudzingeke kutsi BoFakazi BaJehova balwele inkhululeko yekukhonta?

 USAKHAMUTI seMbuso waNkulunkulu yini? Njengobe ungulomunye waBoFakazi BaJehova ungiso. Ngubuphi bufakazi bekutsi ungulesakhamuti? Akusiyo ipasipoti nobe timphepha letivela kuhulumende. Kunaloko, lobufakazi buhambisana nendlela lokhonta ngayo Jehova Nkulunkulu. Kukhonta kweliciniso kusho lokungetulu kwekumane ukholwe. Kutsintsa loko lokwentako, lokusho kulalela imitsetfo yeMbuso waNkulunkulu. Kitsi sonkhe, loku kutsintsa konkhe kuphila kwetfu lokufaka ekhatsi indlela lesikhulisa ngayo imindeni yetfu kanye nendlela lesenta ngayo etindzabeni letitsintsa kuphila kwetfu.

² Nobe kunjalo, live lesiphila kulo alikuhloniphi ngaso sonkhe sikhatsi kuba kwetfu takhamuti teMbuso nobe loko lokulindzelekile kitsi. Labanye bohulumende betamile kuvimbela kukhonta kwetfu nobe kukumisa ngalokuphelele. Ngalesinye sikhatsi, tikhonti taKhristu kudzingeke kutsi tilwele inkhululeko yekuphila ngemtsetfo weNkhosi LenguMesiya. Kuyasimangalisa yini loko? Cha, akusimangalisi. Bantfu baJehova bangetikhatsi tekubhalwa kweliBhayibheli bebavame kulwela inkhululeko yekukhonta Jehova.

3. Ngukuphi kulwa bantfu baNkulunkulu labahlangabetana nako ngesikhatsi seNdlovukazi Esta?

³ Sibonelo saloko kutsi ngesikhatsi seNdlovukazi Esta, bantfu baNkulunkulu kwadzingeka kutsi balwele kuphila kwabo. Kungani loko bekudzingeka? Ndvunankhulu lomubi Hamani waveta umbono eNkhosini yasePheresiya Ahashiveroshi wekutsi onkhe emaJuda labekaphila endzaweni lebeyibuswa yinkhosi abulawe, ngobe imitsetfo yawo ‘beyingafani nemasiko ato tonkhe letinye tive.’ (Esta 3:8, 9, 13) Jehova watilahla yini tinceku takhe? Cha-ke, kodvwa wabusisa imetamo ya-Esta kanye naModekhayi ngobe bafaka sikhalo enkhosini yasePheresiya sekutsi bantfu baNkulunkulu bavikelwe.​—Esta 9:20-22.

4. Yini lesitawucoca ngayo kulesehluko?

⁴ Kutsiwani ngasetikhatsini talamuhla? Njengobe sifundzile esehlukweni lesendlulile, bohulumende ngalesinye sikhatsi bayabaphikisa BoFakazi BaJehova. Kulesehluko sitawucoca ngaletinye tindlela letisetjentiswe bohulumende emetameni yabo yekuvimba indlela lesikhonta ngayo. Sitawucoca ngalamaphuzu lamatsatfu lalandzelako: (1) lilungelo lekuba khona njengenhlangano nekukhonta ngendlela lesiyikhetsile, (2) lilungelo lekukhetsa indlela  yekwelashwa lehambisana netimiso teliBhayibheli, (3) kanye nelilungelo lebatali lekhulisa bantfwababo ngekuvumelana netimiso taJehova. Ephuzwini ngalinye sitawubona indlela takhamuti letetsembekile teMbuso waNkulunkulu lobuswa nguMesiya, letitfole ngayo bumatima emetameni yato yekuvikela kuba takhamuti taloMbuso kanye netibusiso letititfolile.

5. Kwatiwa ngalokusemtsetfweni kuniketa emaKhristu eliciniso tiphi tinzuzo?

⁵ Siyayidzinga yini imvume lesemtsetfweni levela kubohulumende kuze sikhonte Jehova? Cha asiyidzingi, kodvwa kwatiwa ngalokusemtsetfweni kwenta kube melula kutsi sikhonte Nkulunkulu. Sibonelo saloko kutsi siyakhona kuhlanganyela emaHholweni eMbuso, nasemaHholweni Emhlangano, siyakhona kushicilela kanye nekutfola tincwadzi letisekelwe eBhayibhelini letivela kulamanye emave, siphindze sihlanganyele tindzaba letimnandzi nabomakhelwane betfu sikhululekile ngaphandle kwekuvinjelwa. Emaveni lamanyenti, BoFakazi BaJehova babhaliswe ngalokusemtsetfweni futsi bajabulela inkhululeko yekukhonta lefanana naleyo lejatjulelwa nguletinye tinkholo letibhaliswe ngalokusemtsetfweni. Kusuke sekwentekeni ngesikhatsi bohulumende basivimbela kutsi satiwe ngalokusemtsetfweni, nobe betame kuvimba inkhululeko yetfu yekukhonta?

6. Nguyiphi insayeya BoFakazi BaJehova e-Australia labahlangabetana nayo ekucaleni kwabo-1940?

⁶ E-Australia. Ekucaleni kwabo-1940, ndvunankhulu wase-Australia watsi tinkholelo tetfu “timelene” nemphi. Umsebenti wetfu wavinjelwa. BoFakazi bese bangakhoni kuhlangana nobe kushumayela bakhululekile futsi nemisebenti leyentiwa egatjeni yavalwa nemaHholwa eMbuso avalwa. Bekungekho emtsetfweni kuphatsa tincwadzi tetfu letisekelwe eBhayibhelini. Ngemuva kwekuchuba inkholo yabo ngasese iminyaka leminyenti, BoFakazi BaJehova e-Australia bagcine bakhululekile. NgaJune 14, 1943, iNkantolo Lenkhulu yase-Australia yatsi akukho emtsetfweni lokuvinjelwa kwaBoFakazi.

7, 8. Chaza kulwela inkhululeko yekukhonta bazalwane betfu eRussia labakwenta eminyakeni leyendlulile.

⁷ ERussia. BoFakazi BaJehova bacitsa iminyaka leminyenti ngaphansi kwekuvinjelwa ngemaKhomanisi, kodvwa bagcine babhalisiwe nga-1991. Ngemuva kwekwehlukana kwemave eSoviet Union, semukelwa ngalokusemtsetfweni nguHulumende waseRussia nga-1992. Kungakapheli sikhatsi lesidze, labanye baphikisi betfu ikakhulukati labo labatihlanganisa neliSontfo lema-Orthodox laseRussia, baphatseka kabi ngenca yekukhula kwelinani letfu. Baphikisi babeka BoFakazi BaJehova emacala lasihlanu lalandzelanako ebugebengu, emkhatsini wa-1995 kuya ku-1998. Sikhatsi ngasinye, umshushisi abengabutfoli bufakazi belicala letfu. Ngemnyaka wanga-1998 baphikisi lebebangapheli emandla baphindze betfula tikhalo bantfu lebebanato mayelana natsi. Ekucaleni BoFakazi baphumelela, kodvwa baphikisi betfu abasemukelanga lesijubo, kwase kutsi ngaMay 2001 BoFakazi balahlwa licala ngemuva kwekufaka sikhalo. Laphindze latekwa njalo lelicala nga-October ngawo lowomnyaka, lokwaholela esijubeni sanga-2004  sekutsi kucedvwe kuba semtsetfweni kwenhlangano yaBoFakazi eMoscow, futsi kuvinjelwe imisebenti yabo.

⁸ Ngemuva kwaloko kwalandzela kuhlushwa lokukhulu. (Fundza 2 Thimothi 3:12.) BoFakazi bahlukunyetwa baphindze bashaywa. Tincwadzi tetfu tatsatfwa; kucasha nobe kwakha tindzawo tekukhontela kwavinjelwa. Ase ucabange indlela bazalwane nabodzadzewetfu labativa ngayo ngalobumatima lebebabhekene nabo. BoFakazi bebafake sikhalo eNkantolo Yemalungelo Ebantfu YaseYurophu (ECHR) nga-2001, futsi baphindze bafaka lokunye kwatiswa eNkantolo nga-2004. Nga-2010, i-ECHR yenta sijubo. LeNkantolo yaphawula kutsi kungabeketelelwa kwenkholo ngiko lebekubangela kuvinjelwa kwaBoFakazi eRussia, futsi besingekho sizatfu sekubambelela etijubeni tenkantolo lencane ngobe bebungekho bufakazi belicala lebelibekwe BoFakazi. LeNkantolo yaphindze yaphawula kutsi lokuvinjelwa bekwentelwe kucedza emalungelo lasemtsetfweni aBoFakazi. Sijubo saleNkantolo savuna lilungelo laBoFakazi lekukhonta ngekukhululeka. Nanobe letinye tiphatsimandla taseRussia tehluleka kuhlonipha lesijubo se-ECHR, bantfu baNkulunkulu kulelive babe nesibindzi ngenca yekuncoba lokufanana naloku.

9-11. EGreece, bantfu baJehova bahlangabetane njani nebumatima ngenkhululeko yabo yekukhonta bandzawonye, futsi ibe yini imiphumela?

⁹ EGreece. Nga-1983, Titos Manoussakis wacasha likamelo eHeraklion, eCrete, kuze licembu lelincane laBoFakazi BaJehova lihlanganyele kulo. (Heb. 10:24, 25) Ngemuva kwesikhashana, umphristi wema-Orthodox wafaka sikhalo etiphatsimandleni tahulumende, akhala ngekusebentisa kwaBoFakazi lelikamelo kuze bakhontele kulo. Kungani enta loko? Kungobe tinkholelo taBoFakazi atifanani neteliSontfo lema-Orthodox. Tiphatsimandla tabatsatsela tinyatselo letisemtsetfweni boTitos Manoussakis kanye nalabanye BoFakazi labatsatfu bendzawo. Bahlawuliswa baphindze bagwetjwa tinyanga letimbili babhadla ejele. Njengobe batakhamuti letetsembekile teMbuso waNkulunkulu, laBoFakazi batsatsa lesijubo senkantolo njengaleso lesiphambene nenkhululeko yabo yekukhonta, ngako batsatsa lelicala baliyisa etinkantolo letincane futsi bagcine baliyise ku-ECHR.

¹⁰ Ngemnyaka wanga-1996, i-ECHR yetfula sijubo lesabavisa buhlungu baphikisi bekukhonta kweliciniso. INkantolo yaphawula kutsi “BoFakazi BaJehova nabo ‘bayinkholo leyatiwako’ ngekuvumelana nemtsetfo wemaGriki,” futsi tincumo lebetitsatfwe tinkantolo letincane “betiyitsintsa ngalokucondzile inkhululeko yaBoFakazi yekukhonta.” INkantolo yaphindze yatsi bekungasiwo umsebenti wahulumende waseGreece “kuncuma kutsi tinkholelo nobe indlela letichutjwa ngayo isemtsetfweni yini nobe cha.” Tigwebo lebetiniketwe BoFakazi tahociswa futsi banikwa inkhululeko yekukhonta.

¹¹ Lokuncoba kwasilungisa yini simo eGreece? Kuyadzabukisa kutsi akusilungisanga. Nga-2012, licala lelifanako laphotfulwa eKassandreia, Greece, ngemuva kwekutsi selitsatse iminyaka lecishe ibe ngu-12 litekwa. Kulelicala umphikisi lomkhulu bekungumbhishobhi welisontfo lema-Orthodox. Umkhandlu Welive,  lokuyinkantolo lenkhulu yaseGreece, waphetsa lelicala ngekuvuna bantfu baNkulunkulu. Lesincumo sacaphuna umtsetfosisekelo waseGreece lobewuvuna inkhululeko yenkholo waphindze walahla kumangalela BoFakazi BaJehova ngalokuphindzaphindziwe ngekutsi bayinkholo lengatiwa. LeNkantolo yatsi: “Timfundziso ‘taBoFakazi BaJehova’ atikafihleki futsi ngesizatfu saloko inkholo yabo iyatiwa.” Emalunga alelibandla lelincane ayajabula ngobe sewayakhona kubamba imihlangano yekukhonta Nkulunkulu eHholweni lawo leMbuso.

12, 13. EFulansi, baphikisi balisebentise njani lichinga ‘lekwenta bubi kube shangatsi ngumtsetfo,’ futsi kwaba namuphi umphumela?

¹² EFulansi. Labanye baphikisi bebantfu baNkulunkulu basebentisa lichinga ‘lekwenta bubi kube shangatsi ngumtsetfo.’ (Fundza Tihlabelelo 94:20.) Sibonelo saloko kutsi emkhatsini wabo-1990, baphatsi bemtselo baseFulansi bacala kuhlolisisa emabhuku etimali alenye yetinhlangano letisemtsetfweni, i-Association Les Témoins de Jéhovah (ATJ), lesetjentiswa BoFakazi BaJehova eFulansi. Indvuna yemaphakelo yembula umgomo walokuhlolwa kwemabhuku yatsi: “Lokuhlolwa kwemabhuku kungaholela ekuvalweni kwalenhlangano ngumtsetfo nobe ibekwe emacala ebugebengu . . . , lokungabangela kutsi intengantengiswe kuphindze kucedze imisebenti leyentiwa ngulenhlangano eveni letfu.” Nanobe lokuhlolwa kwemabhuku kungazange kutfole kuphulwa kwemtsetfo, tikhulu temtselo tafuna kutselisa lenhlangano lesemtsetfweni i-ATJ umtselo lomkhulu. Kube loku kwaphumelela, lelicebo belitawenta bazalwane balivale lihhovisi leligatja baphindze batsengise netakhiwo talo kuze babhadale lomtselo lomkhulu. Lesi kwakusimo lesimatima kodvwa bantfu baNkulunkulu abaphelelwanga ngemandla. Ngekutimisela, BoFakazi bafaka sikhalo sekuphatfwa kabi kwabo ngekundlulisela licala ku-ECHR nga-2005.

¹³ INkantolo yakhipha sijubo salelicala ngaJune 30, 2011. LeNkantolo yaphawula kutsi lilungelo lenkhululeko yenkholo kufanele livimbe hulumende ekutseni ahlolisise kuba semtsetfweni kwaloko lokukholelwa tinkholo nobe indlela letichuba ngayo inkholo yato, ngaphandle kuphela nangabe kunesimo lesecisako. LeNkantolo yachubeka yatsi: “Kubhadaliswa lomtselo . . . kungabangela kutsi unciphe umnotfo lobalulekile walenhlangano lokungaholela ekuvimbeni tikhonti tayo ekukhonteni ngekukhululeka ngendlela letingatsandza ngayo.” Ngekuvumelana, iNkantolo yavuna BoFakazi BaJehova. Kwabajabulisa kakhulu bantfu baJehova kutsi hulumende waseFulansi wayibuyisa seyihambisana nentalo imali labeyitselise inhlangano i-ATJ, futsi ngekuvumelana nesijubo seNkantolo, waphindze wasusa umtsetfo lobewushayiwe wekudla takhiwo teligatja.

14. Ungayifeza njani indzima yakho ekulweleni inkhululeko yekukhonta?

¹⁴ Njenga-Esta naModekhayi bakadzeni, bantfu baJehova lamuhla bayayilwela inkhululeko yekukhonta Jehova ngendlela lafuna bamkhonte ngayo. (Esta 4:13-16) Ungaba nayo yini incenye? Yebo ungaba nayo. Ungabathantazela njalo bazalwane nabodzadze labasebumatimeni ngenca yekungaphatfwa kahle kusetjentiswa umtsetfo. Imithantazo lenjalo ingaba lusito lolukhulu kubazalwane  nabodzadzewetfu lababhekene nebumatima nekuhlushwa. (Fundza Jakobe 5:16.) Jehova uyayiphendvula yini imithantazo lenjalo? Kuncoba kwetfu emacala etinkantolo kubufakazi bekutsi uyayiphendvula.​—Heb. 13:18, 19.

15. Ngumaphi emaphuzu bantfu baNkulunkulu labawacabangelako mayelana nekumpontjelwa ingati?

¹⁵ Njengobe siphawulile eSehlukweni 11, takhamuti teMbuso waNkulunkulu titfole sicondziso lesicacile lesivela emiBhalweni sekubalekela kumpontjelwa ingati, lesekuyintfo levamile lamuhla. (Gen. 9:5, 6; Lev. 17:11; fundza Imisebenti 15:28, 29.) Nanobe singakwemukeli kumpontjelwa ingati, sitifunela indlela yekwelashwa lencono kitsi nakulabo lesisondzelene nabo, nangabe leyo ndlela ingashayisani nemitsetfo yaNkulunkulu. Tinkantolo letinkhulu temave lamanyenti setiyacondza kutsi bantfu banalo lilungelo lekukhetsa nome lekwala indlela letsite yekulashwa, ngekuvumelana nanembeza nobe tinkholelo tabo. Kulamanye emave, bantfu baNkulunkulu bahlangabetane netinsayeya letinkhulu kulendzaba. Ase sicoce ngetibonelo letimbalwa.

16, 17. Nguyiphi indlela yekwelashwa dzadze waseJapan layitfola yaphindze yametfusa, futsi imithantazo yakhe yaphendvuleka njani?

¹⁶ EJapan. Misae Takeda, umfati loneminyaka lengu-63 lobekahlala eJapan, bekadzinga kuhlindvwa lokukhulu. Njengobe bekasakhamuti lesetsembekile seMbuso waNkulunkulu, watjela dokotela wakhe kutsi angeke kumlungele kutsi ampontjelwe ingati. Ngemuva kwetinyanga letimbalwa, kwammangalisa kuva kutsi wampontjelwa ingati ngesikhatsi ahlindvwa. Dzadze Takeda wabeka bodokotela kanye nesibhedlela licala ngaJune 1993, ngobe anemuva wekutsi ukhohlisiwe waphindze woniwa. Lodzadze lohloniphekile nalokhulumela phansi, bekanekukholwa lokucinile. Waniketa bufakazi ngesibindzi enkantolo, asebhokisini lalabetfula bufakazi, lokwamtsatsa sikhatsi lesingetulu kweli-awa nanobe imphilo yakhe beseyibutsakatsaka. Wavela enkantolo kwekugcina kusasele inyanga ngembikwekutsi ashone. Sibindzi nekukholwa kwakhe kusikhutsata kakhulu! Dzadze Takeda watsi bekachubeka njalo ancusa Jehova kutsi ambusise kulelicala. Bekaciniseka kutsi imithantazo yakhe itawuphendvulwa. Yaphendvuleka yini imithantazo yakhe?

¹⁷ Ngemuva kweminyaka lemitsatfu Dzadze Takeda ashonile, iNkantolo Lephakeme yaseJapan yakhipha sincumo lesimvunako—yavuma kutsi bekungakafaneli kutsi ampontjelwe ingati, lokuyintfo lephambene netifiso takhe. Sincumo lesatsatfwa yiNkantolo ngaFebruary 29, 2000, satsi “lilungelo lekutikhetsela” etimeni letinjengaleti “kufanele lihlonishwe, litsatfwe njengelilungelo lemuntfu.” Simbonga kakhulu Dzadze Takeda ngekutimisela kulwela lilungelo lekukhetsa indlela yekwelashwa levumelana nanembeza wakhe loceceshwe liBhayibheli. BoFakazi eJapan sebangakhona kwemukela indlela yekwelashwa ngaphandle kwekwesaba kutsi batawumpontjelwa ingati ngenkhani.

18-20. (a) Inkantolo yekundlulisela emacala e-Argentina yabambelela njani elungelweni lemuntfu lekungavumi kumpontjelwa ingati kusentjentiswa likhadi i-medical directive? (b) Mayelana nekusetjentiswa kabi kwengati, singakhombisa njani kutsi siyatitfoba ekuholeni kwaKhristu?

¹⁸ E-Argentina. Njengobe sitakhamuti teMbuso, singatilungiselela njani simo lapho kudzingeka kutsi kwentiwe sincumo sendlela lesifisa kwelashwa ngayo, ngisho nome sesingasakhoni  kutikhulumela? Singaphatsa liphepha lelitasisita ngalokusemtsetfweni futsi lisikhulumele, njengobe kwenta Pablo Albarracini. NgaMay 2012, wabanjwa inkunzi akhonjwe ngesibhamu, futsi wadutjulwa emahlandla lamanyenti. Waphutfunyiswa esibhedlela aculekile, futsi ngaleyo ndlela akakhonanga kutikhulumela ngesimo sakhe endzabeni yekumpontjelwa ingati. Nanome kunjalo, bekaphetse likhadi lokutsiwa yi-medical directive lebekaligcwalise kahle waphindze walisayina eminyakeni lemine ngaphambili. Nanome simo sakhe besibucayi futsi labanye bodokotela banemuva wekutsi kudzingeka ampontjelwe ingati kuze kusindziswe kuphila kwakhe, letisebenti tasesibhedlela betikulungele kuhlonipha sifiso sakhe. Nanobe kunjalo, babe waPablo lobekangasiye lomunye waBoFakazi BaJehova, watfola imvume yasenkantolo legunyata kutsi indvodzana yakhe impontjelwe ingati.

¹⁹ Ummeli wemfati waPablo naye wafaka sikhalo enkantolo ngekushesha. Esikhatsini lesingaba ngema-awa lambalwa, sikhalo lebesifakwe ngummeli wemfati waPablo saphumelela, senta kutsi lebekushiwo yinkantolo lencane kungasalandzelwa, kunaloko kuhlonishwe sifiso saPablo njengobe sibhalwe kulelikhadi i-medical directive. Babe waPablo wafaka sikhalo eNkantolo Lephakeme yase-Argentina. INkantolo Lephakeme “ayisitfolanga sizatfu sekungabata kutsi [i-medical directive yakhe leveta kutsi akakwemukeli kumpontjelwa ingati] beyibhalwe ngekucondza, ngenhloso asebentisa nenkhululeko yakhe.” INkantolo yatsi: “Nome ngabe ngubani lonengcondvo nalokhulile unalo likhono lekusho indlela lafisa kulashwa ngayo, futsi angalwemukela nome angalwemukeli luhlobo lolutsite lwekwelashwa . . . Indlela lekhetfwe nguloyo muntfu yekwelashwa, kufanele kutsi dokotela ayihloniphe.”

²⁰ Umzalwane Albarracini sewalulama ngalokuphelele. Yena akanye nemfati wakhe bajabula kakhulu ngekutsi abeyigcwalise kahle i-medical directive. Ngekutsatsa lesinyatselo lesilula kodvwa lesibalulekile, wakhombisa kutsi uyatitfoba ekubuseni kwaKhristu ngeMbuso waNkulunkulu. Wena kanye nemndeni wakho seniligcwalisile yini lelikhadi?

21-24. (a) INkantolo Lephakeme yaseCanada yafinyelela njani esincumeni lesacopha umlandvo lesimayelana nebantfwana kanye nekusetjentiswa kwengati? (b) Lelicala lingase litikhutsate njani tinceku taJehova letisetincane?

²¹ ECanada. Ngalokuvamile, tinkantolo tiyalihlonipha lilungelo lebatali lekukhetsela bantfwana babo indlela lencono yekulashwa. Ngaletinye tikhatsi, tinkantolo tize tenta sincumo sekutsi bantfwana lesebakhulile kufanele bahlonishwe nakutiwa ekutikhetseleni indlela yekwelashwa. Kwenteka lokufanako ku-April Cadoreth. Nakaneminyaka lengu-14, April wafakwa esibhedlela ngobe bekophela ngekhatsi kakhulu. Etinyangeni letimbalwa kungakenteki loko, bekagcwalise likhadi i-Advance Medical Directive, leneticondziso tekutsi akukafaneli ampontjelwe ingati ngisho nome kungaba nesimo lesiphutfumako. Dokotela labekamelapha wakhetsa kungasemukeli sifiso sa-April lebesibhalwe ngalokucacile, wabese ufuna imvume yenkantolo yekutsi ampompele ingati. Wampontjelwa ngenkhani emaphayindi lamatsatfu etinhlayiya letibovu tengati. Ngemuva kwesikhatsi, April wafananisa kumpontjelwa kwakhe ingati nekudlwengulwa.

 ²² April kanye nebatali bakhe baya etinkantolo kuze batfole lusito. Ngemuva kweminyaka lemibili lelicala layiswa eNkantolo Lephakeme eCanada. Nanobe kungase kubonakale ngatsi April wehluleka kuwushintja umtsetfosisekelo, iNkantolo yambhadalela tindleko telicala, futsi yakhipha sijubo lesavuna yena kanye nalabanye bantfwana labancane labafuna kusebentisa lilungelo labo lekutikhetsela nakutiwa endleleni labafisa kwelashwa ngayo. INkantolo yatsi: “Endzabeni yetekwelapha, bantfwana labaneminyaka lengephansi kwa-16 kufanele banikwe litfuba lekuveta imibono yabo ngeluhlobo lekwelashwa labalukhetsako, nangabe loko kukhombisa lizinga lelitsite lekutimela kanye nekuvutfwa.”

²³ Lelicala libalulekile ngobe iNkantolo Lephakeme yakhona kukhuluma ngemalungelo ebantfwana lahambisana nemtsetfosisekelo. Ngembikwekutsi kuphume lesijubo, inkantolo yaseCanada beyingakuvumela kwelashwa lokutsite kutsi kuniketwe umntfwana loneminyaka lengephansi kwa-16, nangabe inkantolo inemuva wekutsi lolo hlobo lekwelapha litamsita umntfwana. Ngemuva kwalesijubo, inkantolo sengeke ikhone kugunyata nobe ngabe nguluphi luhlobo lekwelashwa loluphambene nesifiso semntfwana loneminyaka lengephansi kwalengu-16, ngaphandle  kwanangabe acale wanikwa litfuba lekuveta kutsi ukhule ngalokwenele kutsi ente leso sincumo.

²⁴ Lelicala lelatsatsa iminyaka lemitsatfu enkantolo laba lusito yini? April utsi “lwaba lusito!” Nyalo sewulihlahlandlela lelivamile futsi leliphila kahle, utsi: “Kwati kutsi ngaba nencenye lencane emetameni yekukhatimulisa libito laNkulunkulu nekuveta kutsi Sathane ngumcambimanga, kungente ngajabula.” Lokwenteka ku-April kuveta kutsi labasha betfu bangakhona kumelela ngesibindzi kukholwa kwabo, bakhombise kutsi batakhamuti teMbuso waNkulunkulu leticotfo.​—Mat. 21:16.

25, 26. Ngusiphi simo lesihle sivela nangabe kuchume idivosi?

²⁵ Jehova uphatsise batali umtfwalo wekukhulisa bantfwana babo ngekuvumelana netimiso takhe. (Dut. 6:6-8; Ef. 6:4) Lomsebenti umatima, kodvwa ungase ube matima kakhulu nakwenteka kuchuma idivosi. Batali bangase babe nemibono lengafani ngendlela lencono yekukhulisa bantfwana. Sibonelo saloko kutsi umtali longuFakazi uba nembono locinile wekutsi bantfwana kufanele bakhuliswe kusetjentiswa timiso tebuKhristu, kantsi umtali longasiye Fakazi angase angavumelani naloko. Nanome kunjalo, umtali longuFakazi kufanele ngenhlonipho aphawule kutsi nanobe kudivosa kungase kulimate umshado, buhlobo bebatali nebantfwana solo busekhona.

²⁶ Umtali longasiye Fakazi angase acele inkantolo kutsi imnike imvume yekuhlala nemntfwana wakhe nobe bantfwana, kuze akhone kubalawula endzabeni yenkholo. Labanye batsi kukhuliswa njengalomunye waBoFakazi BaJehova kuyingoti. Bangase bakhale ngekutsi bantfwana babo batawuvinjelwa kugubha emalanga ekutalwa nemaholide, futsi nakwenteka kuba nesimo lesiphutfumako setemphilo, bangampontjelwa ingati “lesindzisa kuphila.” Sibonga kakhulu ngekutsi tinkantolo letinyenti ticabangela loko lokutawusita umntfwana kunekutsi tente sijubo sekutsi inkholo yamunye kulabatali iyingoti. Ase sicoce ngaletinye tibonelo.

27, 28. Ngusiphi sincumo lesatsatfwa yiNkantolo Lephakeme yase-Ohio ecaleni lebelimayelana nekutsi kukhuliswa njengalomunye waBoFakazi BaJehova kuyingoti kumntfwana?

²⁷ EMelika. Nga-1992, iNkantolo Lephakeme yase-Ohio, yateka licala lebelitsintsa babe longasiye Fakazi lowakhala ngekutsi bekuyingoti kutsi indvodzana yakhe ikhuliswe njengalomunye waBoFakazi BaJehova. Inkantolo lencane yavumelana naye, yamniketa imvume yekutsi ahlale nemntfwana wakhe. Make walomntfwana, Jennifer Pater, waniketwa imvume yekuvakashela umntfwana, kodvwa wayalwa kutsi angacali “afundzise nobe akhulume nemntfwana ngetimfundziso taBoFakazi BaJehova, nganobe nguyiphi indlela.” Lesincumo lebesitsatfwe yinkantolo lencane besibanti ngobe besingachazwa ngekutsi sisho kutsi Dzadze Pater akukafaneli akhulume nendvodzana yakhe Bobby, ngeliBhayibheli nobe timiso talo letilungile. Ungakhona yini kucabanga indlela bekativa ngayo? Jennifer bekacindzetelekile, kodvwa utsi wafundza kubeketela nekulindzela Jehova kutsi atsatse sinyatselo. Utsi: “Jehova bekahlale anami.” Ummeli wakhe, asitwa yinhlangano  yaJehova, wafaka sikhalo eNkantolo Lephakeme yase-Ohio.

²⁸ LeNkantolo Lephakeme ayizange ivumelane nesincumo senkantolo lencane, ngobe yatsi “batali banelilungelo lekufundzisa bantfwana babo, lokufaka ekhatsi kukhulumisana nabo ngendlela lokufanele batiphatse ngayo kanye nangetimiso tenkholo.” Inkantolo yaveta kutsi ngaphandle kwanangabe kungaletfwa bufakazi bekutsi timfundziso tenkholo taBoFakazi BaJehova titamlimata lomntfwana emtimbeni nasengcondvweni, yona ite lilungelo lekuvimbela batali kutsi bangahlali nebantfwana babo ngenca yenkholo yemtali. Inkantolo ayibutfolanga bufakazi bekutsi tinkholelo taBoFakazi titawuphatamisa ingcondvo kanye nemphilo yemntfwana.

29-31. Yini leyabangela kutsi lomunye dzadze eDenmark alahlekelwe lilungelo lekukhulisa indvodzakati yakhe, futsi ngusiphi sincumo lesatsatfwa yiNkantolo Lephakeme yaseDenmark kulendzaba?

²⁹ EDenmark. Anita Hansen waba sesimeni lesifanako ngesikhatsi loyo lobekayindvodza yakhe afaka sikhalo enkantolo sekutsi aniketwe imvume yekuhlala nemntfwanabo Amanda, lobekaneminyaka lesikhombisa. Nanobe inkantolo yesigodzi beyinikete Dzadze Hansen imvume yekuhlala nemntfwana nga-2000, babe wa-Amanda wafaka sikhalo enkantolo lenkhulu leyabese iyasishintja sincumo lebesentiwe yinkantolo yesigodzi ngekutsi imnikete imvume yekuhlala nemntfwana. Inkantolo lenkhulu yatsi njengobe kunekungaboni ngaso linye emkhatsini walabatali ngenca yetinkholelo tabo, babe walomntfwana nguye labesesimeni lesikahle sekulungisa lenkinga. Ngaleyondlela, Dzadze Hansen  walahlekelwa lilungelo lekuhlala nemntfwana wakhe ngobe angulomunye waBoFakazi BaJehova.

³⁰ Kuso sonkhe lesikhatsi lesimatima, Dzadze Hansen bekahle acindzeteleka kakhulu kangangekutsi bekangati nekutsi utawuthantaza atsini. Utsi: “Kodvwa ngadvudvutwa kakhulu ngumbhalo waRoma 8:26 na-27. Bengihlale ngiva kutsi Jehova uyakucondza loko lengikushoko. Bekahlala njalo anginakile aphindze angisekela.”​—Fundza Tihlabelelo 32:8; Isaya 41:10.

³¹ Dzadze Hansen wafaka sikhalo eNkantolo Lephakeme yaseDenmark. Esincumeni leyasikhipha, iNkantolo yatsi: “Sijubo sekutsi ngubani lokufanele anikwe lilungelo lekukhulisa umntfwana kufanele sitsatfwe kucatjangelwe loko lokutamzuzisa kakhulu umntfwana.” Ngetulu kwaloko, iNkantolo yatsi sincumo sekutsi ngumuphi umtali lokufanele aniketwe imvume yekuhlala nemntfwana kufanele sitsatfwe ngemuva kwekucabangela kutsi umtali ngamunye ukhona kangakanani kulungisa kungaboni ngaso linye kunekutsi kucatjangelwe “tinkholelo kanye nesimo” saBoFakazi BaJehova. Kwamkhulula kakhulu Dzadze Hansen kutsi iNkantolo iyalihlonipha likhono lakhe lekuba ngumtali futsi yamniketa lilungelo lekukhulisa Amanda.

32. INkantolo Yemalungelo Ebantfu YaseYurophu ibavikele njani batali labaBoFakazi ekubandlululweni?

³² Emave lehlukahlukene aseYurophu. Kuletinye timo, kusetjentiswe umtsetfo kuze kuncunywe kutsi ngubani lokufanele abe nelilungelo lekukhulisa umntfwana kwaze kwayiwa etinkantolo letiphakeme kunato tonkhe eveni. INkantolo Yemalungelo Ebantfu YaseYurophu (ECHR) nayo iwatekile emacala lanjalo. Emacaleni lamabili, i-ECHR yaphawula kutsi tinkantolo telive letincane tiphatse batali labaBoFakazi kanye nalabangasibo BoFakazi ngendlela lengafani isebentisa inkholo yabo njengesisekelo. Ibita lokuphatfwa lokunjalo ngekutsi lubandlululo, i-ECHR yancuma kutsi “akukemukeleki kutsi tinkantolo tente sincumo ngesisekelo sekwehluka ngekwenkholo kuphela.” Lomunye make longuFakazi lowazuza kulesincumo lesentiwa yi-ECHR waveta indlela lesamkhulula ngayo lesincumo ngekutsi atsi: “Bekungivisa buhlungu kumangalelwa ngekutsi ngiyingoti kubantfwana bami kantsi mine ngenta konkhe lokusemandleni kuze ngibanikete lokuncono kakhulu, lokusho kubakhulisa ngetimiso tebuKhristu.”

33. Batali labaBoFakazi bangasisebentisa njani simiso lesikuFiliphi 4:5?

³³ Kuliciniso kutsi batali labaBoFakazi lababhekene netinkinga letisemtsetfweni telilungelo labo lekufaka timiso teliBhayibheli etinhlitiyweni tebantfwana babo, benta konkhe lokusemandleni kutsi babonise umoya wekucabangela. (Fundza Filiphi 4:5.) Njengobe bakujabulela kakhulu kuba nelilungelo lekucecesha bantfwana babo ngetindlela taNkulunkulu, baphindze bacaphele kutsi umtali longasiye Fakazi naye unalo lilungelo lekufundzisa umntfwana nangabe akhetsa kwenta njalo. Umtali longuFakazi uwutsatsa njengalobaluleke kangakanani umtfwalo wekucecesha umntfwana?

34. Batali labangemaKhristu lamuhla bangazuza njani esibonelweni semaJuda angesikhatsi saNehemiya?

³⁴ Sibonelo salokwenteka ngesikhatsi saNehemiya sisinika kwatiswa lokulusito. EmaJuda asebenta kamatima kute alungise aphindze akhe kabusha lubondza lwaseJerusalema. Bekacondza  kahle kutsi kwenta loko bekutawuvikela wona kanye nemindeni yawo etiveni letititsa lebetiwakakile. Ngaleso sizatfu, Nehemiya wawakhutsata watsi: “Nilwe nivikele bantfu besive sakini, nebantfwabenu, nebafati benu kanye nemakhaya enu.” (Neh. 4:14) Kulawo maJuda, kulwa lokunjalo kwakubaluleke kakhulu. Ngalokufananako lamuhla, batali labaBoFakazi BaJehova basebenta matima kute bakhulise bantfwana babo ngendlela yeliciniso. Bayati kutsi bantfwababo bahlangabetana nekuyengwa etikolweni kanye nasendzaweni. Kuyenga lokunjalo kungase kungene ngisho nasemakhaya ngemtfombo wetindzaba. Batali, khumbulani kutsi kubalulekile kwenta konkhe lokusemandleni kulwela emadvodzana nemadvodzakati enu kuze nibanikete indzawo lephephile letabenta bakhule kahle ebuhlotjeni babo naNkulunkulu.

35, 36. Ngutiphi tinzuzo letitfolwe BoFakazi BaJehova ngenca yekulwela emalungelo etfu ngalokusemtsetfweni, futsi yini lotimisele kuyenta?

³⁵ Jehova uyibusisile imetamo yenhlangano yakhe yalamuhla yekulwela lilungelo lekukhonta ngekukhululeka. Ngekulwela emalungelo abo emtsetfo, bantfu baNkulunkulu batfole litfuba lekuniketa bufakazi lobukhulu etinkantolo kanye nasemmangweni. (Rom. 1:8) Lenye inzuzo yekuphumelela kwemacala labawayise etinkantolo kutsi aphindze acinisa nemalungelo ebantfu labanyenti labangasibo BoFakazi. Nanobe kunjalo, tsine njengebantfu baNkulunkulu site umgomo wekushintja imimango nobe umgomo wekutivikela. Ngetulu kwaloko, BoFakazi BaJehova balwele emalungelo abo ngekuya etinkantolo emetameni yabo yekucalisa nekutfutfukisa kukhonta lokuhlantekile.​—Fundza Filiphi 1:7.

³⁶ Shengatsi singatitsatsa njengaletibalulekile tibonelo tekukholwa talabo labalwele inkhululeko yekukhonta Jehova. Asihlale setsembekile, siciniseka kutsi Jehova uyawusekela umsebenti wetfu futsi uyachubeka asinika emandla kuze sente intsandvo yakhe.​—Isa. 54:17.