Kudzinga umetamo kwenta umngani futsi kudzinga umetamo kuhlala unemngani. Imetamo yakho yekuba ngumngani waNkulunkulu kanye nekuhlala ungumngani wakhe itawubusiswa kakhulu. Jesu watjela labo labebakholwa kuye: “Liciniso liyawunikhulula.” (Johane 8:32) Kusho kutsini loko?

Ungajabulela inkhululeko nyalo. Ungakhululeka etimfundzisweni temanga kanye nasemangeni lasakatwe nguSathane. Ungakhululeka nasekuphelelweni litsemba lokuhlupha tinkhulungwane tebantfu labangamati Jehova. (Roma 8:22) Bangani baNkulunkulu bakhululekile ‘nasekwesabeni kufa.’—Hebheru 2:14, 15.

Ungajabulela inkhululeko eveni lelisha laNkulunkulu. Cabanga nje ngenkhululeko lenkhulu longaba nayo esikhatsini lesitako! Emhlabeni loliPharadisi, sitawukhululeka etimphini, ekuguleni, nasebugebengwini. Sitawube sikhululekile ekuhluphekeni nasendlaleni. Siphindze sikhululeke ekugugeni nasekufeni. Sikhululeke nasekwesabeni, kucindzeteleka, nekungalungi. Naku liBhayibheli lelikushoko ngaNkulunkulu: “Uvula sandla sakho, wesutsise tonkhe tifiso talokuphilako.”—Tihlabelelo 145:16.

 Bangani baNkulunkulu batawuphila phakadze. Kuphila lokuphakadze kusipho lesiligugu Nkulunkulu latawusipha bonkhe labalwela kuba bangani bakhe. (Roma 6:23) Cabanga nje kutsi kuphila lokungapheli kukuphatseleni!

Utawuba nesikhatsi sekwenta tintfo letinyenti. Mhlawumbe utawuba nesifiso sekufundza kudlala insimbi yemculo letsite, kudvweba titfombe nome kubata. Ungase ufise kufundza ngetilwane nome titjalo. Encenye ungafuna kuvakashela tindzawo nebantfu labehlukene. Kuphila lokuphakadze kuphela lokungakunika litfuba lako konkhe loku!

Utawuba nesikhatsi sekutakhela bangani labanyenti. Kuphila phakadze kutawukwenta kutsi wati bantfu labanyenti lababangani baNkulunkulu. Utawati emakhono netici tebuntfu babo letinhle. Nabo batawuba bangani bakho. Utawubatsandza futsi nabo bakutsandze. (1 Khorinte 13:8) Kuphila lokungapheli kutakuniketa sikhatsi lesenele sekwakha bungani nabo bonkhe labaphila emhlabeni! Lokuncono kunako konkhe, bungani bakho naJehova butawuchubeka bukhula njengoba iminyaka ihamba. Shengatsi ungaba ngumngani waNkulunkulu kuze kube phakadze!