Sathane nemadimoni akhe abafuni kutsi ukhonte Nkulunkulu. Bafuna kutsi nabangakhona bente bonkhe bantfu behlukane naNkulunkulu. Benta miphi imetamo yekukwenta loko? Lenye indlela yinkholo yemanga. (2 Khorinte 11:13-15) Inkholo lengafundzisi liciniso leliseBhayibhelini iyinkholo yemanga. Ifanana nemali-mbumbulu—ingabonakala ifana nemali sibili, kepha kute lengakutsenga. Ingakubangela tinkinga letinyenti.

Emanga lavela enkholweni awayuze amjabulise Jehova, longuNkulunkulu weliciniso. Ngesikhatsi Jesu alapha emhlabeni, licembu lenkholo lelitsite belifuna kumbulala. Belicabanga kutsi indlela yalo yekukhonta Nkulunkulu beyilungile. Latsi: “SinaBabe munye, nguNkulunkulu lucobo.” Jesu wavumelana nalo yini? Cha! Watsi kulo: “Nine nibeyihlo Sathane.” (Johane 8:41, 44) Lamuhla bantfu labanyenti bacabanga kutsi bakhonta Nkulunkulu, kepha empeleni bakhonta Sathane nemadimoni akhe!—1 Khorinte 10:20.

 Sihlahla lesibi sitsela titselo letimbi, ngendlela lefanako inkholo yemanga iveta bantfu labenta lokubi. Live ligcwele tinkinga ngenca yetintfo letimbi letentiwa bantfu. Kunekutiphatsa kabi etindzabeni tekulalana, kulwa, kweba, kucindzetelwa kwebantfu, kubulalana, nekugagadlela. Linyenti lalabo labenta letintfo letimbi liyaya emasontfweni, kepha tinkholo tabo atibakhutsati kutsi bente lokulungile. Angeke baze babe bangani baNkulunkulu ngaphandle kwekutsi bayekele kwenta lokubi.—Matewu 7:17, 18.

Inkholo yemanga ifundzisa bantfu kutsi bathandaze etithicweni. Nkulunkulu utsi singathandazi etithicweni. Loku kunengcondvo. Bewungatsandza yini kutsi umuntfu angakukhulumisi wena kepha akhulumise sitfombe sakho? Bekangaba yini ngumngani wakho sibili? Cha, abengeke. Jehova ufuna kutsi bantfu bakhulume naye, hhayi tithico nome titfombe letingaphili.—Eksodusi 20:4, 5.

Inkholo yemanga ifundzisa kutsi kulungile kubulala labanye ngetikhatsi temphi. Jesu watsi bangani baNkulunkulu bebatawutsandzana. Asibabulali bantfu lesibatsandzako. (Johane 13:35) Akukalungi ngisho nekutsi sibulale bantfu lababi. Ngesikhatsi titsa taJesu titewumbopha, akazange avumele bafundzi bakhe kutsi balwe kuze bamvikele.—Matewu 26:51, 52.

Inkholo yemanga ifundzisa kutsi lababi batawuhlushwa emlilweni wesihogo. Kepha liBhayibheli lifundzisa kutsi sono siholela ekufeni. (Roma 6:23) Jehova nguNkulunkulu welutsandvo. Nkulunkulu lonelutsandvo abengabahlupha yini bantfu kuze kube phakadze? Angeke! EPharadisi, kutawube kunayinye kuphela inkholo, inkholo levunyelwa nguJehova. (Sembulo 15:4) Tonkhe tinkholo letisekelwe emangeni aSathane titawube setiphelile.