LiPharadisi ngeke lifane nalelive lesiphila kulo nyalo. Bekungasiso sifiso saNkulunkulu kutsi umhlaba ugcwale tinkinga, lusizi, buhlungu kanye nekuhlupheka. Esikhatsini lesitako, Nkulunkulu utawenta umhlaba ube liPharadisi. Liyawube linjani? Ase sibuke loko liBhayibheli lelikushoko:

Bantfu labalungile. LiPharadisi litawuba likhaya lebangani baNkulunkulu. Batawentelana tintfo letinhle futsi baphile ngetindlela taNkulunkulu letilungile.—Taga 2:21.

Inala yekudla. EPharadisi, kutawubate indlala. LiBhayibheli litsi: “[Kutawuba] nenala emasimini.”—Tihlabelelo 72:16.

Tindlu letikahle nemsebenti lowenetisako. Emhlabeni loliPharadisi, umndeni nemndeni utawuba nelikhaya lawo. Wonkhe umuntfu utawenta umsebenti loniketa injabulo sibili.—Isaya 65:21-23.

 Kuthula emhlabeni wonkhe. Bantfu ngeke basalwa futsi bafe etimphini. LiVi laNkulunkulu litsi: “[Nkulunkulu] uvimba acedze timphi kutsi tichubeke emhlabeni wonkhe jikelele.”—Tihlabelelo 46:8, 9.

Imphilo lenhle. LiBhayibheli liyetsembisa: “Kute lohlala [ePharadisi] loyakutsi: ‘Ngiyagula.’” (Isaya 33:24) Kantsi futsi kute lotawube akhubatekile, ayimphumphutse, asihhulu, nome simungulu.—Isaya 35:5, 6.

Kuphela kwebuhlungu, lusizi, nekufa. LiVi laNkulunkulu litsi: “Sekuyawubate kufa, nekulila, nekukhala, nebuhlungu, ngobe kwakucala sekwendlulile.”—Sembulo 21:4.

Bantfu lababi batawube sebangekho. Jehova uyetsembisa: “Kodvwa lababi . . . bayawususwa eveni, nalabanemacebo bayawusishulwa kulo.”—Taga 2:22.

Bantfu batawutsandzana futsi bahloniphane. Ngeke kusaba nekungalungi, kucindzetelwa kwebantfu, kuhaha, nenzondo. Bantfu batawuba munye futsi batawuphila ngekuvumelana netindlela taNkulunkulu letilungile.—Isaya 26:9.