Ngekusho kwembiko we-U.S. Centers for Disease Control and Prevention hhafu webantfu labaneminyaka lengu-15 kuya ku-19 bake balalana ngemlomo. Sharlene Azam, umbhali wencwadzi letsi Oral Sex Is the New Goodnight Kiss, utsi “Nawukhuluma nebantfu labasha [ngekulalana ngemlomo] batakutjela kutsi yintfo lengasho lutfo leyo. Ecinisweni, abakutsatsi njengekulalana.”

•  Wena ucabangani?

•  Ayini emaciniso?

•  Kungani kuyindzaba lebalulekile?

 Phendvula lemibuto lelandzelako nga-yebo nobe cha.

1.   Intfombatane ingakhulelwa yini ngenca yekulala lomunye ngemlomo?

   1.   Yebo

   2.   Cha

2.   Kungakugulisa yini kulalana ngemlomo?

   1.   Yebo

   2.   Cha

3.   Kulalana ngemlomo kusento sekuya ecansini yini vele?

   1.   Yebo

   2.   Cha

 Catsanisa timphendvulo takho nanati letilandzelako.

1.   Intfombatane ingakhulelwa yini ngenca yekulala lomunye ngemlomo?

    Imphendvulo: Cha. Lesi ngulesinye sizatfu lesenta bantfu labanyenti baphetse ngekutsi kulalana ngemlomo akusikubi.

2.   Kungakugulisa yini kulalana ngemlomo?

    Imphendvulo: Yebo. Bantfu labalalana ngemlomo bangatfola tifo letinjenge hepatitis (A or B), genital warts, gonorrhea, herpes, HIV, kanye ne-syphilis.

3.   Kulalana ngemlomo kusento sekuya ecansini yini vele?

    Imphendvulo: Yebo. Tonkhe tento letiphatselene netitfo temuntfu tangasense tikulalana, lokufaka ekhatsi kulalana kwendvodza nemfati, kulalana ngemlomo, emantanyula (anal sex) kanye nekuphotholoza titfo tangasense talomunye umuntfu.

 Cabanga ngemavesi eliBhayibheli lambalwa lahlobene nekulalana ngemlomo.

 LiBhayibheli litsi: “Nkulunkulu ufuna kutsi nibe ngcwele futsi nibubalekele bugwadla.”​—1 KubaseThesalonika 4:3.

 Ngelulwimi lwekucala, ligama lelihunyushwe ngekutsi “bugwadla” lisho tonkhe tinhlobo tekulalana kwebantfu labangakashadi, lokufaka ekhatsi kulalana kwemuntfu wesilisa newesifazane, kulalana ngemlomo, emantanyula (anal sex) kanye nekuphotholoza titfo tangasense talomunye umuntfu. Umuntfu logwadlako angatfola imiphumela lebuhlungu, lobuhlungu kakhulu kunayo yonkhe kulimala kwebuhlobo bakhe naNkulunkulu.​—1 Phetro 3:12.

 LiBhayibheli litsi: “Loyo logwadlako wona umtimba wakhe.”​—1 KubaseKhorinte 6:18.

 Kulalana ngemlomo kungalimata umtimba wakho kanye nebuhlobo bakho naNkulunkulu. Kungaphindze kulimate imiva yakho. Incwadzi letsi Talking Sex With Your Kids itsi, “Kutiva ungatsi kudlalwe ngawe, kutisola kanye nekutiva ungakavikeleki, kutintfo letivamile ekulalaneni kwemuntfu wesilisa newesifazane. Yonkhe imiva lemibi umuntfu langaba nayo ngemuva kwesento sekulalana lokungakafaneli, angaphindze abe nayo nakente nobe nganguluphi luhlobo lwekulalana lolungakafaneli. Kulalana kukulalana nje.”

 LiBhayibheli litsi: “Mine Jehova, nginguNkulunkulu wakho,Loyo lokufundzisako kuze uzuze”​—Isaya 48:17.

 Uyakholwa yini kutsi imitsetfo yaNkulunkulu lemayelana nekuya ecansini ingakuzuzisa? Nobe ucabanga kutsi ikuncisha injabulo? Kukusita uphendvule lemibuto, cabanga ngemgwaco lophitsitelako lonetimphawu telitubane lokufanele uhambe ngalo, emarobhothi kanye nema-stop signs. Letimphawu utitsatsa njengetintfo letikuncisha inkhululeko yini nobe letikuvikelako? Bekungentekani kube wena nalabanye bashayeli beningete natinaka?

 Kungulokufanako nangetimiso taNkulunkulu. Nawungatinaki, utawuvuna lokuhlanyelako. (KubaseGalathiya 6:7) Incwadzi letsi Sex Smart itsi, “Nawungakunaki loko lokukholelwako nendlela yekutiphatsa bese wenta tintfo lowatiko kutsi atikalungi, utawugcine ungasatihloniphi.” Ngalokuphambene naloko, nawuphila ngetimiso taNkulunkulu tekutiphatsa, utawutiphatsa kahle. Ngetulu kwaloko, utawuba nanembeza lohlantekile.​—1 Phetro 3:16.