KUCHAZWA KWEMAVESI LASEBHAYIBHELINI
Taga 17:17—“Umngani Unelutsandvo Ngaso Sonkhe Sikhatsi”
“Umngani sibili ukutsandza ngaso sonkhe sikhatsi, futsi ungumnakenu longetsembela kuye ngesikhatsi sekuhlupheka.”—Taga 17:17, Lihumusho Lemhlaba Lomusha.
“Umngani unelutsandvo ngaso sonkhe sikhatsi; kantsi umnakenu utalelwe kutsi netfwalisane naye tinhlupheko.”—Taga 17:17, LiBhayibheli LesiSwati Lelivamile.
Tisho kutsini Taga 17:17?
Bangani sibili batsembekile. Bayakhatsalelana ikakhulukati ngetikhatsi letimatima njengoba kwenta bobhuti nabosisi.
“Umngani sibili ukutsandza ngaso sonkhe sikhatsi.” Lamavi angaphindze asho kutsi “bangani bahlale bakhombisa lutsandvo.” Ligama lesiHebheru lelitsi “lutsandvo” lelisetjentiswe kulelivesi lisho lokungetulu nje kwendlela lotiva ngayo ngemuntfu. Lolutsandvo lolute bugovu lubonakala ngetento. (1 KubaseKhorinte 13:4-7) Bangani labatsandzana ngalendlela, bahlala batsembekile kulomunye nalomunye ngisho nobe bangaboni ngaso linye nobe babhekene netimo letimatima tekuphila. Bahlala batsetselelana ngekukhululeka. (Taga 10:12) Umngani lonjalo akabi nemona nangabe tintfo timhambela kahle umngani wakhe. Kunaloko ujabula kanye naye.—KubaseRoma 12:15.
“Umngani sibili . . . ungumnakenu longetsembela kuye ngesikhatsi sekuhlupheka.” Lesaga sisuselwa kulomcondvo wekutsi bantfu labatalwa ndzawonye bangasondzelana kakhulu. Nasisita umngani nakabhekene nebumatima, sisuke senta njengoba sisi nobe bhuti angenta. Ngetulu kwaloko, tinkinga atikuphatamisi kusondzelana kwabo. Kunaloko, bungani babo bucina kakhulu nabanetinkinga ngoba lutsandvo nenhlonipho labanayo ngalomunye nalomunye kuyakhula.
Loko Taga 17:17 letikhuluma ngako
Incwadzi yeTaga inekuhlakanipha lokubhalwe ngendlela lekhangako naleyenta umfundzi acabange. Incenye lenkhulu yalencwadzi yeliBhayibheli yabhalwa yiNkhosi Solomoni. Indlela labhala ngayo bekuyindlela levamile yekubhala tinkhondlo ngesiHebheru, kunekutsi asebentise emagama labiteka ngendlela lephose ifane (rhyming), usebentise imisho legcizelela umcondvo lofanako nobe imisho lephikisanako. Taga 17:17 tisibonelo senkhondlo legcizelela umcondvo lofanako, ngoba umusho wesibili ugcizelela loko lokushiwo ngumusho wekucala. Taga 18:24 tisibonelo semicondvo lephikisanako. “Kunebangani labenta lokubi kulomunye nalomunye, kodvwa kunemngani losondzela kakhulu kwengca umnakenu wengati.”
Solomoni nakabhala Taga 17:17, kungenteka bekacabanga ngebungani lobusedvute bababe wakhe Davide, naJonathani, indvodzana yeNkhosi Sawula. (1 Samuweli 13:16; 18:1; 19:1-3; 20:30-34, 41, 42; 23:16-18) Nanobe boDavide naJonathani bebangasibo bandzawonye kodvwa bebasondzelene kwengca bobhuti. Jonathani bekatimisele kufa kuze avikele umngani wakhe. a
Lamanye Emahumusho Encwadzi YeTaga 17:17
“Umngani ukutsandza ngaso sonkhe sikhatsi, futsi uba ngumnakenu ngetikhatsi tebumatima.”—The Bible in Basic English.
“Umngani uhlale angumngani, ngumnakenu lotalelwe inhlupheko.”—The Moffatt Translation of the Bible.
“Umngani uhlale akhombisa bungani ngaso sonkhe sikhatsi—ungumnakenu lotalelwe tikhatsi tekuhlupheka.”—The Complete Jewish Study Bible.
Bukela le-video lemfishane kuze ubone loko lokukhulunywa ngako kulencwadzi yeTaga.
a Fundza sihloko lesitsi “Baba Abangani Abakhulu,” lesitfolakala ngesiZulu
Lokunye Longatsandza Kukuhlola
IMIDVWEBO YABOPOPAYI
Ngulonjani Umngani Sibili?
Kumelula kutfola bangani mbumbulu, kodvwa ungamtfola kanjani umngani sibili?
TIMFUNDZISO LETISEBHAYIBHELINI
Emathulusi Ekutadisha LiBhayibheli
Khetsa tikhombo letitakwenta kutadisha kwakho liBhayibheli kukhutsate futsi kwenetise.
TIMFUNDZISO LETISEBHAYIBHELINI
Yetama luhlelo lwetfu lwekudadisha liBhayibheli
Tfola sifundvo seliBhayibheli samahhala ukanye nalotakufundzisa.
