•  Lokushiwo liBhayibheli

•  Bekungenteka njani kutsi umuntfu longakaze alale nendvodza abe nemntfwana?

•  Kungani kwadzingeka kutsi Jesu atalwe yintfombi-ntfo?

•  Mariya wachubeka ayintfombi-ntfo yini?

•  Kungashiwo yini kutsi Jesu “watalwa ngumuntfu lote sono”?

•  Kufanele simtsatse njengemuntfu lonjani Mariya?

 LiBhayibheli litsi Mariya, make waJesu waba nelilungelo lelingakavami lekutala Jesu aseyintfombi-ntfo. LiBhayibheli lakhuluma kusenesikhatsi ngalesimangaliso encwadzini ya-Isaya futsi sagcwaliseka evangelini laMatewu nelaLukha.

 Nasi siphrofetho lesashiwo ngu-Isaya mayelana nekutalwa kwaMesiya: “Intfombi iyawukhulelwa itale indvodzana, yetsiwe libito kutsiwe ngu-Imanyuweli.” (Isaya 7:14) Umbhali welivangeli laMatewu waphefumlelwa nguNkulunkulu kuze achaze kutsi siphrofetho sa-Isaya sagcwaliseka ngesikhatsi Mariya akhulelwa Jesu. Ngemuva kwekubika kutsi Mariya wakhulelwa ngalokusimangaliso, Matewu wachubeka watsi: “Konkhe loku kwenteka kute kugcwaliseke loko lokwashiwo nguJehova ngemphrofethi wakhe, nakatsi: “Intfombi-ntfo a itawutetfwala, ibeleke indvodzana letawubitwa ngekutsi ngu-Imanuweli,” lokusho kutsi ‘Nkulunkulu Unatsi.’”​—Matewu 1:22, 23.

 Umvangeli Lukha naye wabhala ngekukhulelwa kwaMariya lokusimangaliso. Wabhala kutsi Nkulunkulu watfuma ingilosi Gabriyeli “kutsi iye entfombini lebeyitawushada nendvodza lokutsiwa nguJosefa, yasemndenini waDavide, futsi libito lalentfombi kwakunguMariya.” (Lukha 1:26, 27) Mariya cobo lwakhe wavuma kutsi uyintfombi-ntfo. Ngemuva kwekuva kutsi utawuba ngumake waJesu, longuMesiya, wabuta watsi: “Loku kutawukwenteka njani, njengobe ngingakase ngilale nendvodza?”​—Lukha 1:34.

 Mariya wakhuleliswa ngemandla aNkulunkulu, lokungumoya longcwele. (Matewu 1:18) Ingilosi yatsi kuMariya: “Umoya longcwele utakwehlela kuwe, futsi emandla aLosetikwako Konkhe atakusibekela. Ngaleso sizatfu, loyo lotamtala kutawutsiwa ungcwele futsi uyiNdvodzana yaNkulunkulu.” b (Lukha 1:35) Nkulunkulu wenta simangaliso sekutsi andlulisele kuphila kweNdvodzana yakhe esibeletfweni saMariya, lokwabangela kutsi akhulelwe.

 Nkulunkulu wenta kutsi Jesu atalwe yintfombi-ntfo kuze atotalwa angenaso sono futsi akhone kusindzisa bantfu esonweni nasekufeni. (Johane 3:16; Hebheru 10:5) Nkulunkulu wafaka kuphila kwaJesu esibeletfweni saMariya. Ngemuva kwaloko, umoya longcwele waNkulunkulu wawuvikela lombungu lobewusakhula kutsi ungatfoli sono.​—Lukha 1:35.

 Ngaleyondlela Jesu watalwa ete sono, afana na-Adamu ngaphambi kwekutsi ente sono. LiBhayibheli nalikhuluma ngaJesu, litsi: “Akentanga sono.” (1 Phetro 2:22) Njengobe bekete sono, Jesu bekangakhokha inhlawulo kuze ahlenge sintfu esonweni nasekufeni.​—1 Khorinte 15:21, 22; 1 Thimothi 2:5, 6.

 LiBhayibheli alifundzisi kutsi Mariya wachubeka ayintfombi-ntfo kuphila kwakhe konkhe. Kunaloko, litsi Mariya waba nalabanye bantfwana.​—Matewu 12:46; Makho 6:3; Lukha 2:7; Johane 7:5.

 Cha. Ngekusho kwe-New Catholic Encyclopedia, lemfundziso Yekutalwa Ngumuntfu Lote Sono “isho kutsi iNtfombi Mariya ayizange isitfole SONO SEKUCALA sa-Adamu lasindlulisela kubantfwana bakhe kusukela Mariya akheka esiswini senina. Sonkhe sintfu sitfola sono njengelifuto . . . Kodvwa NGEMUSA lokhetsekile, Mariya wavikeleka ekutfoleni leso sono.” c

 Ngalokuphambene naloko, liBhayibheli alikufundzisi sanhlobo kutsi Mariya akazange asitfole sono sa-Adamu. (Tihlabelelo 51:5; Roma 5:12) Liciniso likutsi kwanaye Mariya waniketa bufakazi bekutsi unesono ngesikhatsi anikela ngemhlatjelo wekubuyisana lebekulindzeleke kutsi bonkhe bomake bawente kulandzela uMtsetfo waMosi. (Levithikhusi 12:2-8; Lukha 2:21-24) I-New Catholic Encyclopedia itsi: “Imfundziso yekutsi Mariya bekete sono ayitfolakali eBhayibhelini . . . Yimfundziso nje lisontfo lelimane latentela yona.”

 Mariya usibonelo lesihle sekukholwa, sekulalela, sekutfobeka, neselutsandvo lolujulile ngaNkulunkulu. Usekhatsi kwebantfu labetsembekile lesenta kahle nasibalingisa.​—Hebheru 6:12.

 Ngisho noma Mariya aba nendzima lebalulekile yekuba ngumake waJesu, liBhayibheli alisifundzisi kutsi kufanele simkhonte nome sithantaze kuye. Jesu akazange aphatse unina ngendlela lekhetsekile, nebafundzi bakhe akabatjelanga kutsi bamphatse ngendlela lekhetsekile. Liciniso likutsi, kukhulunywa ngaMariya emaVangelini kanye nasencwadzini yeMisebenti kuphela kantsi tincwadzi tekugcina letingu-22 teliBhayibheli letatiwa ngekutsi liThestamente Lelisha atikhulumi ngaye.​—Imisebenti 1:14.

 EmiBhalweni kute bufakazi bekutsi Mariya bekaphatfwa ngendlela lekhetsekile ingasaphatfwa ke indzaba yekutsi akhontwe ngemaKhristu angesikhatsi sebaphostoli. Kunaloko liBhayibheli lifundzisa kutsi emaKhristu akhonte Nkulunkulu kuphela.​—Matewu 4:10.