LiBhayibheli alikhulumi ngalokucondzile ngekucedzisela umuntfu logulako. a Noma kunjalo, loko lelikushoko ngekuphila nangekufa kusiniketa umcondvo lokahle. Kubulala akwemukeleki kuNkulunkulu, futsi kute nesidzingo sekukhatsateka ngekwelula kuphila nangabe umuntfu sekafa.

 LiBhayibheli nalichaza Nkulunkulu, uMdali wetfu litsi, ‘ungumtfombo wekuphila.’ (Tihlabelelo 36:9; Imisebenti 17:28) Kuphila kuligugu emehlweni aNkulunkulu. Ngaleso sizatfu, Nkulunkulu uyakulahla kubulala lomunye umuntfu kanye nekutibulala. (Eksodusi 20:13; 1 Johane 3:15) Ngetulu kwaloko, liBhayibheli litsi kufanele sitsatse tinyatselo tekuvikela kuphila kwetfu kanye nekwalabanye bantfu. (Dutheronomi 22:8) Kuyacaca-ke kutsi Nkulunkulu ufuna sisiphatse kahle lesipho lesikuphila.

Kutsiwani nangabe lomuntfu angasindzi noma angelapheki?

 LiBhayibheli alikwemukeli kucedzisela lomunye umuntfu ngenca-nje yekutsi ugulela kufa nobe kuyacaca kutsi vele utawufa. Sibonelo saloko sikubona endzabeni yeNkhosi yaka-Israyeli, lenguSawula. Ngesikhatsi alimele kamatima emphini, wacela inceku yakhe kutsi imcedzisele. (1 Samuweli 31:3, 4) Lenceku yaSawula ayivumanga. Noma kunjalo, lenye indvodza yacala emanga yatsi ngiyo lecedzisele Sawula. Davide wayilahla lendvodza ngekuba nelicala lengati—loko kwakhombisa kutsi Davide abevumelana nekucabanga kwaNkulunkulu kulendzaba.—2 Samuweli 1:6-16.

Kufanele yini kutsi umuntfu agcinwe emshinini kute achubeke aphila ngisho noma litsemba sekute?

 Nangabe kubonakala kutsi lomuntfu angafa nome nini, liBhayibheli alisho kutsi akafakwe emishinini letsite kute achubeke aphila. Kunaloko, lisiniketa umcondvo lofanele. Litsi kufa kusitsa lesikhulu, futsi kungumphumela wekutsi sinesono. (Roma 5:12; 1 Khorinte 15:26) Ngisho nobe singeke sikufise kufa, akukafanele sikwesabe, ngobe Nkulunkulu wetsembisa kutsi utabavusa labo labafile. (Johane 6:39, 40) Umuntfu lokuhloniphako kuphila utawufuna tindlela letincono kakhulu tekwelashwa. Kwenta njalo akusho kutsi kufanele sikhetse kwelashwa ngekusebentisa umshini lotawelula kuphila kwetfu ngisho nobe kubonakala kutsi imphilo ayikho.

Kutibulala kusono lesingatsetseleleki yini kuNkulunkulu?

 Chake, liBhayibheli alisho kutsi kutibulala kusono lesingatsetseleleki. Nanobe kutibulala kusono lesikhulu, b Nkulunkulu uticondza kahle timo letifaka ekhatsi kuphatamiseka kwengcondvo, kucindzeteleka kakhulu, ngisho nelufuto imbala, lokungaholela ekutibulaleni. (Tihlabelelo 103:13, 14) Asebentisa liBhayibheli, Nkulunkulu indvudvuto kulabo labacindzetelekile. Ngetulu kwaloko liBhayibheli litsi “kutawuba neluvuko lwalabalungile nalabangakalungi.” (Imisebenti 24:15) Loko kusitjela kutsi likhona litsemba lekuvuswa kwebantfu labente emaphutsa lamakhulu ekuphileni, lokufaka ekhatsi nalabatibulele.