Ngisho nobe liBhayibheli lingawasebentisi egama latsi “kukhipha sisu,” kodvwa emavesi lamanyenti aveta umbono waNkulunkulu ngekuphila kwebantfu, lokufaka ekhatsi nekwemntfwana longakatalwa.

 Kuphila kusipho lesivela kuNkulunkulu. (Genesisi 9:6; Tihlabelelo 36:9) Konkhe kuphila kuligugu kuye, ngisho nekwemntfwana losengakatalwa. Ngako nangabe umuntfu abulala umntfwana losengakatalwa ngemabomu, kufana nekutsi ungumbulali.

 Umtsetfo waNkulunkulu kuma-Israyeli bewutsi: “Nangabe emadvodza alwa futsi alimate umfati lotetfwele bese ubeleka sisengakefiki sikhatsi kodvwa yena naloluswane bangafi, loyo lowente loku kufanele ahlawule, kuye ngekwaloko lokushiwo yindvodza yalomfati. Loko lakukhokhako kufanele akukhokhe embikwebehluleli. Kodvwa nangabe kuba khona lofako emkhatsini waloluswane namake walo, kufanele kwenanwe kuphila ngekuphila.”—Eksodusi 21:22, 23. a

•  Kuphila kwemuntfu kucala nini?

•  Nkulunkulu utamtsetselela yini umuntfu lowake wakhipha sisu?

•  Kubi yini kukhipha sisu nangabe kuphila kwamake nobe kwemntfwana kusengotini?

 Kusukela ngesikhatsi make abamba sisu, kuNkulunkulu loko sekuvele kungumuntfu. EVini lakhe liBhayibheli, Nkulunkulu uveta ngalokuphindzaphindziwe kutsi umntfwana losengakatalwa sewuvele ungumuntfu. Cabanga ngetibonelo letikhombisa kutsi kuNkulunkulu, umntfwana losengakatalwa uyafana nemntfwana losatelwe.

•   Icondziswa ngumoya waNkulunkulu, iNkhosi Davide yatsi: “Emehlo akho angibona ngesikhatsi ngisesiswini samake.” (Tihlabelelo 139:16) Nkulunkulu bekatsatsa Davide njengemuntfu mbamba ngisho asengakatalwa nekutalwa.

•   Ngetulu kwaloko, Nkulunkulu wati umphrofethi Jeremiya asengakatalwa kutsi utawuba nemsebenti lokhetsekile. Nkulunkulu watsi kuye: “Mine ngakwati ngisengakakubumbi esiswini samake wakho, futsi ngaphambi kwekutsi utalwe ngakukhetsa kutsi wente umsebenti longcwele. Ngakwenta umphrofethi etiveni.”—Jeremiya 1:5.

•   Umbhali weliBhayibheli Lukha, lobekangudokotela, wasebentisa ligama lesiGriki lelifanako kuze achaze umntfwana longakatalwa kanye neluswane.—Lukha 1:41; 2:12, 16.

 Nkulunkulu angabatsetselela labo labake bakhipha tisu. Nangabe sebawemukela umbono waNkulunkulu ngekuphila, akudzingeki bakhatsateke ngaloko labakwenta. “Jehova unesihawu neluvelo . . . Njengobe imphumalanga ikhashane kakhulu nenshonalanga, naye utikhweshise kangako-ke tono tetfu kitsi.” b (Tihlabelelo 103:8-12) Jehova utawubatsetselela bonkhe labaphendvuka ngekubucotfo etonweni tabo tangaphambili, lokufaka ekhatsi kukhipha sisu.—Tihlabelelo 86:5.

 Ngenca yaloko liBhayibheli lelikushoko ngekuphila kwemntfwana losengakatalwa, umuntfu angeke akhiphe sisu bese uvika ngekutsi kuphila kwakhe nobe kwemntfwana losengakatalwa kungenteka bekusengotini.

 Kutsiwani nakubelekwa umntfwana bese kuvela simo lesingakavami futsi lesiphutfumako lesiphocelela kutsi kukhetfwe kutsi kusindziswa kuphila kwemntfwana yini nobe kwamake wakhe? Esimeni lesinjalo, umndeni kufanele utikhetsele kutsi usindzisa kuphila kwabani.