LiBhayibheli litsi kumcoka kutitsandza wena ngelizinga lelitsite. Kutitsandza wena kufaka ekhatsi kutinakekela, kutihlonipha, kanye nekutetsemba. (Matewu 10:31) Kunekuticabangela wena kuphela, liBhayibheli libeka kutitsandza endzaweni lefanele.

Ngubani lokufanele simtsandze kucala?

1.   Kutsandza Nkulunkulu kufanele kute kucala etinhlitiyweni tetfu. LiBhayibheli lifundzisa kutsi umyalo lomkhulu kunayo yonkhe ngulotsi: “Kufanele utsandze Jehova Nkulunkulu wakho ngayo yonkhe inhlitiyo yakho.”—Makho 12:28-30; Dutheronomi 6:5.

2.   Umyalo wesibili lomkhulu ngulotsi: “Kufanele utsandze makhelwane wakho njengobe utitsandza wena.”—Makho 12:31; Levithikhusi 19:18.

3.   Nanobe liBhayibheli lingasiyali ngalokucondzile kutsi sititsandze tsine, lomyalo lotsi ‘tsandza makhelwane wakho njengoba utitsandza wena’ ubonisa kutsi kutitsandza wena ngalokusesilinganisweni nekutihlonipha kuyintfo levamile nalezuzisako.

Ngubani Jesu lamtsandza kucala?

 Jesu wasibekela sibonelo sekutsandza Nkulunkulu ngendlela lefanele, nekutsandza makhelwane, kanye nekutitsandza wena, waphindze wayala nebafundzi bakhe kutsi bamlingise.—Johane 13:34, 35.

1.   Jesu watsandza Nkulunkulu Jehova kucala waphindze watinikela ekwenteni umsebenti waNkulunkulu. Jesu watsi: “Ngenta njengobe nje Babe angiyalile, khona lelive litewukwati kutsi ngiyamtsandza Babe.”—Johane 14:31.

2.   Jesu wakhombisa kutsi uyabatsandza bomakhelwane bakhe, loku wakwenta ngekutsi anakekele tidzingo talabanye kangangekutsi waze wanikela ngekuphila kwakhe.—Matewu 20:28.

3.   Wakhombisa kutsi abetitsandza naye ngelizinga lelisesilinganisweni ngekutsi atinike sikhatsi sekuphumula, sekudla, kanye nesikhatsi sekujabulela budlelwane nebalandzeli bakhe kanye nebaphostoli bakhe.—Makho 6:31, 32; Lukha 5:29; Johane 2:1, 2; 12:2.

Kungakucedzela yini injabulo nekuhlonipheka kutsandza labanye kucala kunawe?

 Cha, ngobe sadalwa ngemfanekiso waNkulunkulu, futsi buntfu lobugcamile lutsandvo lwakhe lolute umona. (Genesisi 1:27; 1 Johane 4:8) Loku kukhombisa kutsi sadalwa ngendlela yekutsi sikwati kutsandza labanye. Kutitsandza wena kukahle, kodvwa sijabula kakhulu nangabe sitsandza Nkulunkulu ngetulu kwako konkhe futsi sinaka kakhulu kwentela labanye tintfo letinhle. LiBhayibheli litsi, “kunenjabulo lenyenti ekupheni kunasekwemukeleni.”—Imisebenti 20:35.

 Lamuhla bantfu labanyenti batsi injabulo ungayitfola ngekutsi uticabangele wena kucala. Kubo ‘kutitsandza wena’ kutsetse indzawo ‘yekutsandza makhelwane.’ Noma kunjalo, lokwenteka ekuphileni lamuhla kufakazela kutsi imphilo lenhle nenjabulo kutfolwa ngulabo labalandzela seluleko lesiseBhayibhelini lesitsi: “Nguloyo naloyo akangatifuneli lokusita yena, kodvwa akachubeke afuna lokusita lomunye umuntfu.”—1 Khorinte 10:24.