EBhayibhelini, ligama lelihunyushwe ngekutsi “kuvuswa kwalabafile” livela egameni lesiGriki lelitsi a·naʹsta·sis, lelisho “kuvuswa” nobe “kuphindze ume.” Umuntfu lovuswe ekufeni uphindze aphile, abe ngulomuntfu lebekanguye asengakafi.​—1 KubaseKhorinte 15:12, 13.

 Ngisho nobe ligama lelitsi “kuvuswa kwalabafile” lingekho emiBhalweni yesiHebheru, levame kubitwa ngekutsi Lithestamente Lelidzala, lemfundziso yekuvuswa kwalabafile ikhona. Sibonelo nje, asebentisa umphrofethi Hoseya, Nkulunkulu wetsembisa: “Bantfu bami ngitabakhulula eThuneni; ngitabavusa ekufeni.”​—Hoseya 13:14; Jobe 14:13-15; Isaya 26:19; Danyela 12:2, 13.

 Bantfu batawuvuselwa kuphi? Labanye bantfu batawuvuselwa ezulwini kuze babuse njengemakhosi bakanye naKhristu. (2 KubaseKhorinte 5:1; Sembulo 5:9, 10) LiBhayibheli likubita ngekutsi ‘kuvuka kwekucala’ nangekutsi ‘kuvuswa kwekucala,’ kokubili loku kuchaza kutsi kunekuvuswa lokunye lokutawulandzela. (Sembulo 20:6; KubaseFiliphi 3:11) Lokuvuswa kwesibili kwalabo labatawuphila emhlabeni, kutawujatjulelwa ngulabanyenti labatawuvuswa.​—Tihlabelelo 37:29.

 Batawuvuswa njani bantfu? Nkulunkulu unike Jesu emandla ekuvusa labafile. (Johane 11:25) Jesu utawuvusa “bonkhe labasemathuneni,” ente ngamunye wabo abukeke, abenebuntfu kanye nenkhumbulo lebekavele anayo asengakafi. (Johane 5:28, 29) Labo labatawuvuselwa ezulwini batawuba nemitimba yemoya, kantsi labo labatawuvuselwa emhlabeni batawutfola imitimba yenyama lephile saka.​—Isaya 33:24; 35:5, 6; 1 KubaseKhorinte 15:42-44, 50.

 Bobani labatawuvuswa? LiBhayibheli litsi “labalungile nalabangakalungi batawuvuswa ekufeni.” (Imisebenti 24:15) Bantfu labalungile bafaka ekhatsi Nowa, Sara kanye Abrahama. (Genesisi 6:9; KumaHebheru 11:11; Jakobe 2:21) Labangakalungi bafaka ekhatsi labo labehluleka kuphila ngetimiso taNkulunkulu ngobe abazange babe nelitfuba lekutifundza kuze baphile ngato.

 Nobe kunjalo, labo lababi ngendlela yekutsi abasalungiseki angeke bavuswe. Bantfu labanjalo nabafa, kufana nekutsi babhujiswe ngalokuphelele, bete litsemba lekuphindze baphile.​—Matewu 23:33; KumaHebheru 10:26, 27.

 Batawuvuswa nini bantfu labafile? LiBhayibheli laphrofetha kutsi kuvuselwa ezulwini bekutawukwenteka ngesikhatsi sekubusa kwaKhristu, lokwacala nga-1914. (1 KubaseKhorinte 15:21-23) Kuvuswa kwalabo labatawuphila emhlabeni kutawukwenteka ngesikhatsi sekubusa kwaJesu Khristu Kweminyaka Leyinkhulungwane, lapho umhlaba utawube sewentiwe lipharadisi.​—Lukha 23:43; Sembulo 20:6, 12, 13.

 Kungani kukholelwa ekuvusweni kwalabafile kunengcondvo? LiBhayibheli liniketa imininingwane lecacile ngekuvuswa kwebantfu labangu-9 futsi lokuvuswa ngakunye kunabofakazi bekutibonela. (1 Emakhosi 17:17-24; 2 Emakhosi 4:32-37; 13:20, 21; Lukha 7:11-17; 8:40-56; Johane 11:38-44; Imisebenti 9:36-42; 20:7-12; 1 KubaseKhorinte 15:3-6) Kuvuswa kwaLazaro ngiko lokuhamba embili ngobe besekuphele emalanga lamane afile futsi lesimangaliso Jesu wasenta phambi kwebantfu labanyenti. (Johane 11:39, 42) Ngisho nalabo lebebaphikisa Jesu bebangeke basiphike lesimangaliso, ngako bahlela kumbulala, yena naLazaro.​—Johane 11:47, 53; 12:9-11.

 LiBhayibheli liveta kutsi Nkulunkulu unesifiso futsi angakhona kuvusa labafile. Uyigcine enkhumbulweni yakhe lengapheli yonkhe imininingwane yemuntfu ngamunye latamvusa asebentisa emandla akhe lamakhulu. (Jobe 37:23; Matewu 10:30; Lukha 20:37, 38) Nkulunkulu angakhona kuvusa bantfu labafile futsi uyafuna kubavusa! Nalikhuluma ngekuvuswa kwalabafile lokutako, liBhayibheli litsi ngaNkulunkulu: “Utawulangatelela kubona umsebenti wetandla takho.”​—Jobe 14:15.

Lokungesilo liciniso ngekuvuswa kwalabafile

 Lokungesilo liciniso: Kuvuswa kwalabafile kukuhlanganiswa kwemphefumulo nemtimba.

 Lokuliciniso: LiBhayibheli lifundzisa kutsi umphefumulo ngumuntfu, hhayi lokutsite lokuchubeka kuphila umuntfu nakafa. (Genesisi 2:7, umbhalo longentasi; Hezekeli 18:4) Umuntfu lovuswa ekufeni akahlanganiswa nemphefumulo wakhe, kunaloko, udalwa kabusha abe ngumphefumulo lophilako.

 Lokungesilo liciniso: Labanye bantfu bavuswa ekufeni bese bayabhujiswa ngekushesha.

 Lokuliciniso: LiBhayibheli litsi ‘labo labente lokubi bavuselwa ekwehlulelweni.’ (Johane 5:29) Nobe kunjalo, lesehlulelo basitfola ngenca yalabakwente nasebavusiwe, hhayi basengakafi. Jesu watsi: “Labafile batawuva livi leNdvodzana yaNkulunkulu nalabo labalilalele batawuphila.” (Johane 5:25) Labo ‘labalalelako’ baphindze bente loko labafundziswa kona nasebavusiwe, emagama abo atawubhalwa ‘emculwini wekuphila.’​—Sembulo 20:12, 13.

 Lokungesilo liciniso: Umuntfu nakavuswa, uvuswa nalomtimba lafa nawo.

 Lokuliciniso: Umuntfu nasekafile, umtimba wakhe uyabola uphele.—Umshumayeli 3:19, 20.