LiBhayibheli likhuluma kanye nje kuphela ngema-tattoo kuLevithikhusi 19:28, lotsi: “Ningayidvwebi imitimba yenu.” Nkulunkulu waniketa sive sema-Israyeli lomyalo kuze asehlukanise etiveni letibomakhelwane lebetidvweba emagama netimphawu tabonkulunkulu bato emitimbeni yato. (Dutheronomi 14:2) Nanobe emaKhristu angaphili ngemtsetfo lowaniketwa ema-Israyeli, kodvwa kufanele asinake simiso lesikuwo.

Kufanele yini umKhristu advwebe umtimba (i-tattoo nobe i-body art)?

 Lamavesi eliBhayibheli angakusita ucabangisise ngalendzaba:

•   “Labasikati kufanele batihlobise . . . ngekuzitsa.” (1 KuThimothi 2:9) Lesimiso sisebenta kubesifazane nakubesilisa. Kufanele sihloniphe imiva yalabanye futsi singatidvonseli emehlo ebantfu.

•   Labanye benta ema-tattoo kuze bativete kutsi baluhlobo luni lwebantfu, kantsi labanye bawentela kukhombisa kutsi bangenta labakutsandzako ngemitimba yabo. Nobe kunjalo, naku liBhayibheli lelikukhutsata emaKhristu: “Ninikele imitimba yenu ibe ngumhlatjelo lophilako, longcwele nalowemukelekako kuNkulunkulu. Nanenta njalo nitawube nikhonta Nkulunkulu ngayo yonkhe ingcondvo yenu.” (KubaseRoma 12:1) Sebentisa ‘ingcondvo yakho yonkhe’ kuze uhlole kutsi yini lekwenta ufune i-tattoo. Nangabe kungenca yekutsi ufuna kulandzela sitayela lesitsite nobe ufuna kuba lilunga lelicembu lelitsite, khumbula kutsi indlela lotiva ngayo ingashintja, kantsi i-tattoo itawuhlale ikhona. Kuhlolisisa tisusa takho kungakusita wente tincumo letihlakaniphile.—Taga 4:7.

•   “Tinhloso talabakhutsele tibenta baphumelele, kodvwa bonkhe labenta tintfo bangakacabangi batawuphuya.” (Taga 21:5) Sincumo sekwenta i-tattoo sivame kwentiwa kungakacatjangwa kahle, kantsi singaba nemiphumela lehlala sikhatsi lesidze lengona buhlobo umuntfu lanabo nalabanye futsi lengenta kube matima kutsi atfole umsebenti. Kususa i-tattoo kungaba buhlungu futsi kudule kakhulu. Luhlolo kanye nebhizinisi lechumako yekususa ema-tattoo, kukhombisa kutsi bantfu labanyenti labente ema-tattoo bafisa ungatsi ngabe abazange bawente.