LiBhayibheli labiketela kutsi ngemalanga ekugcina bekutawuba netifo letinyenti, lokufaka ekhatsi tifo letingumshayabhuce. (Lukha 21:11) Letifo letingumshayabhuce atisiso sijeziso lesivela kuNkulunkulu. Kunaloko, Nkulunkulu utawusebentisa uMbuso wakhe kuze acedze tonkhe tinkinga temphilo, lokufaka ekhatsi netifo letingumshayabhuce.

•  LiBhayibheli lasho yini kutsi bekutawuba netifo letingumshayabhuce?

•  Nkulunkulu wake wabajezisa yini bantfu asebentisa tifo?

•  Tifo letingumshayabhuce letikhona lamuhla tisijeziso lesivela kuNkulunkulu yini?

•  Tiyoke tiphele yini tifo letingumshayabhuce?

•  Emavesi eliBhayibheli lakhuluma ngetifo

 LiBhayibheli alizange likhulume ngalokucondzile ngetifo letifana ne-COVID-19, i-AIDS, nobe umkhuhlane waseSpain, kodvwa labiketela ‘ngetifo letingumshayabhuce.’ (Lukha 21:11; Sembulo 6:8) Letentakalo tiyincenye yeluphawu ‘lwemalanga ekugcina’ laphindze abitwe ngekutsi ‘kuphela kwalelive.’—2 KuThimothi 3:1; Matewu 24:3.

 LiBhayibheli likhuluma ngetikhatsi letimbalwa lapho Nkulunkulu asebentisa khona tifo kuze ajezise bantfu. Sibonelo saloko kutsi wenta bantfu labatsite kutsi babe nebulephelo. (Numeri 12:1-16; 2 Emakhosi 5:20-27; 2 Tikhronike 26:16-21) Nobe kunjalo, letifo atizange tibe ngumshayabhuce tihlasele nebantfu labangenacala. Kunaloko, letifo betisehlulelo lesicondze kulabo bantfu labavukela Nkulunkulu.

 Cha. Labanye bantfu batsi Nkulunkulu usebentisa tifo letingumshayabhuce nalokunye kugula kuze ajezise bantfu lamuhla. Nobe kunjalo, liBhayibheli alikusekeli loko labakushoko. Kungani?

 Kungobe letinye tikhonti taNkulunkulu takadzeni betigula, kantsi netalamuhla nato tiyagula. Sibonelo saloko kutsi indvodza leyetsembekile Thimothi, ‘beyigula kanyenti.’ (1 KuThimothi 5:23) Kodvwa liBhayibheli alisho kutsi loku bekuluphawu lwekungemukelwa nguNkulunkulu. Nalamuhla, letinye tikhonti taNkulunkulu letetsembekile tiyagula nobe titfole tifo. Etikhatsini letinyenti, titfola letifo ngenca yekutsi tisuke tisendzaweni lekabi, ngesikhatsi lesingakafaneli.—Umshumayeli 9:11.

 Ngetulu kwaloko, liBhayibheli lifundzisa kutsi sikhatsi saNkulunkulu sekujezisa bantfu lababi sisengakefiki. Kunaloko, siphila ‘emalangeni ensindziso,’ lokusikhatsi lapho Nkulunkulu amema bonkhe bantfu ngemusa kutsi basondzele kuye futsi basindziswe. (2 KubaseKhorinte 6:2) Lenye indlela labamema ngayo, kusebentisa umlayeto lojabulisako loshunyayelwa emhlabeni wonkhe, ‘lokutindzaba letimnandzi teMbuso.’​—Matewu 24:14.

 Yebo. LiBhayibheli likhuluma ngesikhatsi lesitako lapho khona kutawuba bete kugula. Asebentisa uMbuso wakhe, Nkulunkulu utawelapha konkhe kugula. (Isaya 33:24; 35:5, 6) Utawucedza kuhlupheka, buhlungu, nekufa. (Sembulo 21:4) Futsi utawuvusa labafile kuze bajabulele imphilo lenhle emhlabeni lote tinkinga.—Tihlabelelo 37:29; Imisebenti 24:15.

 Sembulo 6:8: “Ngatsi nangibuka ngabona lihhashi lelihhwabile; lobekaligibele bekaneligama lelitsi Kufa. LiThuna belimlandzela edvute. Loku kwanikwa ligunya . . . kuze kubulale . . . ngesifo lesingumshayabhuce.”

 Lokukushoko: Siphrofetho seSembulo sebagibeli bemahhashi labane, sikhombisa kutsi tifo letingumshayabhuce betitawuba khona esikhatsini setfu.