Litsini LiBhayibheli Ngekushiswa Kwemuntfu Lofile?
Lokushiwo liBhayibheli
LiBhayibheli alikhulumi ngalokucondzile ngekushiswa kwebantfu labafile. Kute sicondziso lesiseBhayibhelini lesitsi bantfu labafile abangcwatjwe noma bashiswe.
Noma kunjalo, liBhayibheli liyakhuluma ngetinceku taNkulunkulu letetsembekile letangcwaba tihlobo tato. Nasi sibonelo: Abrahama wenta konkhe lokusemandleni akhe kute atsenge indzawo yekungcwaba umfati wakhe, Sara.—Genesisi 23:2-20; 49:29-32.
LiBhayibheli liphindze likhulume ngaletinye tinceku taNkulunkulu letetsembekile letashisa tihlobo tato letifile. Nasi sibonelo saloko, ngesikhatsi iNkhosi Sawula yaka-Israyeli kanye nemadvodzana ayo lamatsatfu babulawa emphini, tidvumbu tabo tasala etandleni taletitsa futsi letitsa tatiphatsa ngendlela lete inhlonipho. Ngesikhatsi eva loku, emasotja letsembekile aka-Israyeli ahamba ayolandza letidvumbu, atishisa ase angcwaba loko bekusele. (1 Samuweli 31:8-13) LiBhayibheli liveta kutsi lena bekuyindlela leyemukelekile yekunakekela tidvumbu talawo madvodza.—2 Samuweli 2:4-6.
Tintfo letingasilo liciniso letivame kushiwo ngekushiswa kwebantfu labafile
Lokungasilo liciniso: Kushisa sidvumbu kukhombisa kungawuhloniphi umtimba wemuntfu.
Lokuliciniso: LiBhayibheli litsi bantfu labafile babuyela elutfulini, lokuyintfo letentakalelako nangabe leso sidvumbu sibola. (Genesisi 3:19) Ngako kusishisa lesidvumbu, kusenta sisheshe sibe ngumlotsa noma lutfuli.
Lokungasilo liciniso: Ngetikhatsi teliBhayibheli, bekushiswa kuphela tidvumbu tebantfu labebangamukeleki kuNkulunkulu.
Lokuliciniso: Tidvumbu tebantfu labangazange betsembeke kuNkulunkulu, lokufaka ekhatsi sidvumbu sa-Akhani netemndeni wakhe, tashiswa. (Joshuwa 7:25) Noma kunjalo, loku bekungasiwo umtsetfo. (Dutheronomi 21:22, 23) Njengobe sesibonile, netidvumbu tebantfu labebatsembekile, letifaka ekhatsi indvodzana yeNkhosi Sawula Jonathani, tashiswa.
Lokungesilo liciniso: Nkulunkulu ngeke akhone kuvusa umuntfu loshisiwe.
Lokuliciniso: Mayelana nekuvuswa kwebantfu labafile, Nkulunkulu angabavusa ngisho nome bangcwatjiwe, bashisiwe, bafele elwandle, nome badliwe tilwane. (Sembulo 20:13) UMninimandla Onkhe angakhona kuniketa umuntfu umtimba lomusha kamelula nje.—1 Khorinte 15:35, 38.
Lokunye Longatsandza Kukuhlola
TIMFUNDZISO TELIBHAYIBHELI LETIBALULEKILE
Labafile Bakusiphi Simo?
LiBhayibheli letsembisa kutsi kutawuba nesikhatsi lapho bantfu labafile batawuvuswa ekufeni njengaLazaro.
TIMPHENDVULO TEMIBUTO LEMAYELANA NELIBHAYIBHELI
Kuyini Kuvuswa Kwalabafile?
Kungahle kukumangalise kwati kutsi bobani labatawuvuswa ekufeni.
MAYELANA NATSI
Cela Kuvakashelwa
Coca ngembuto lomayelana neliBhayibheli nobe ufundze lokunyenti ngaBoFakazi BaJehova.