Mariya waseMagdala beketsembekile futsi angumlandzeli waJesu Khristu. Magdala, bekuligama lelidolobha lebelisedvutane neLwandle lwaseGalile lokungenteka Mariya wake wahlala kulo.

 Mariya waseMagdala bekangulomunye walabesifazane lebebahamba naJesu kanye nebafundzi bakhe futsi babanakekela ngetintfo lebebatidzinga. (Lukha 8:1-3) Bekakhona ngesikhatsi kubulawa Jesu, futsi bekangulomunye walabo bekucala lababona Jesu lobesekavusiwe.—Makho 15:40; Johane 20:11-18.

•  Bekayingwadla yini Mariya waseMagdala?

•  “Bekangumphostoli webaphostoli” yini Mariya waseMagdala?

•  Bekangumfati waJesu yini Mariya waseMagdala?

•  Bangakhi boMariya lokukhulunywa ngabo eBhayibhelini?

 LiBhayibheli alisho kutsi Mariya waseMagdala bekayingwadla. Lelikushoko nje kutsi Jesu wakhipha kuye emadimoni lasikhombisa.—Lukha 8:2.

 Yini leyenta bantfu bacabange kutsi bekayingwadla? Ngemuva kweminyaka leminyenti Mariya waseMagdala afile, bantfu labanyenti bacabanga kutsi nguye lowesifazane lobekayingwadla lowageza tinyawo taJesu ngetinyembeti takhe futsi watisula ngetinwele. (Lukha 7:36-38) Nobe kunjalo, liBhayibheli alikusekeli loko labakushoko.

 Cha. Lisontfo lemaKatolika libita Mariya ngekutsi ngu-“St. Mary Magdalene,” nekutsi “ngumphostoli webaphostoli” ngobe bekunguye umuntfu wekucala lowatjela baphostoli kutsi Jesu uvusiwe. (Johane 20:18) Kodvwa loko akusho kutsi bekangumphostoli, kantsi neliBhayibheli alisho kutsi bekangumphostoli.—Lukha 6:12-16.

 LiBhayibheli lacedvwa kubhalwa ngasekupheleni kwelikhulu lekucala C.E. Ngemuva kweminyaka leminyenti emasontfo aniketa Mariya waseMagdala sikhundla lesisetulu. Kunemibhalo leyabhalwa ngeminyaka yesi-100 kuya kuyesi-300 letsi baphostoli baJesu bebanemona naMariya waseMagdala, kodvwa lemibhalo ayikho eBhayibhelini. Leti tindzaba leticanjiwe letingekho eBhayibhelini.

 Cha. Ecinisweni liBhayibheli likwenta kucace kutsi Jesu akazange ashade. a