Nkulunkulu Ukuyo Yonkhe Yini Indzawo?

DLALA

Lokushiwo liBhayibheli

Nkulunkulu ubona yonkhe intfo futsi angenta nome yini nobe ngabe ngukuphi. (Taga 15:3; KumaHebheru 4:13) LiBhayibheli alifundzisi kutsi Nkulunkulu ukuyo yonkhe indzawo nobe ukuto tonkhe tintfo. Kunaloko, litsi ungumuntfu futsi unendzawo yakhe yekuhlala.

Umtimba waNkulunkulu: Nkulunkulu ungumuntfu longumoya. (Johane 4:24) Bantfu abakhoni kumbona. (Johane 1:18) Imibono leyabonwa bantfu lemayelana naNkulunkulu lebhalwe eBhayibhelini ihlale imveta asendzaweni yakhe yekuhlala. Akavetwa akuyo yonkhe indzawo.—Isaya 6:1, 2; Sembulo 4:2, 3, 8.
Indzawo yaNkulunkulu yekuhlala: Nkulunkulu uhlala endzaweni yemoya, leyehlukile etintfweni lesitibonako letidaliwe. Kulendzawo yemoya, Nkulunkulu ‘unendzawo lahlala kuyo emazulwini.’ (1 Emakhosi 8:30) LiBhayibheli likhuluma ngesikhatsi lapho khona tidalwa temoya tangena ‘tema etindzaweni tato embikwaJehova,’ a lokusho kutsi Nkulunkulu unendzawo lekhetsekile lahlala kuyo.—Jobe 1:6.

Nangabe Nkulunkulu angekho kuyo yonkhe indzawo, angakhona yini kunginakekela?

Yebo. Nkulunkulu unendzaba kakhulu nemuntfu ngamunye. Ngisho nobe Nkulunkulu ahlala endzaweni yemoya, kodvwa uyababona labo labahlala emhlabeni labafuna kumjabulisa futsi uyabasita. (1 Emakhosi 8:39; 2 Tikhronike 16:9) Cabanga ngendlela Jehova lakhombisa ngayo kutsi unendzaba netikhonti takhe leticotfo:

Nawuthantaza: Jehova uwuva ngaleso sikhatsi umthantazo wakho.—2 Tikhronike 18:31.
Nawucindzetelekile: “Jehova usedvute nalabo labephuke tinhlitiyo; uyabasindzisa labephuke emoyeni.”—Tihlabelelo 34:18.
Nawudzinga sicondziso: Jehova ‘utakunika kucondza futsi akukhombise indlela lokufanele uhambe ngayo’ asebentisa liVi lakhe liBhayibheli.—Tihlabelelo 32:8.

Lokungasilo liciniso ngekuba khona kuyo yonkhe indzawo

Lokungasilo liciniso: Nkulunkulu ukuyo yonkhe intfo layidalile.

Liciniso: Nkulunkulu akahlali emhlabeni nobe kulenye indzawo lebonakala ngemehlo enyama. (1 Emakhosi 8:27) Kuliciniso kutsi tinkhanyeti kanye nato tonkhe tintfo letidaliwe, ‘timemetela imisebenti yetandla takhe.’ (Tihlabelelo 19:1) Nkulunkulu akahlali entfweni layidalile, njengobe nemdvwebi angeke ahlale entfweni layidvwebile. Nobe kunjalo, intfo ledvwetjiwe ingakutjela lokutsite ngemdvwebi wayo. Ngendlela lefanako, buntfu beMdali ‘lobungabonakali’ lobunjengemandla, kuhlakanipha, kanye nelutsandvo, bubonakala etintfweni latidalile.—KubaseRoma 1:20.

Lokungasilo liciniso: Nkulunkulu kufanele abe kuyo yonkhe indzawo kuze ati tonkhe tintfo futsi abe nemandla lamakhulu.

Liciniso: Umoya longcwele waNkulunkulu ungemandla akhe lasebentako. Ngemoya wakhe longcwele, Nkulunkulu angabona futsi ente nome yini, nome ngukuphi, nobe ngabe ngusiphi sikhatsi, ngaphandle kwekutsi abe khona lapho.—Tihlabelelo 139:7.

Lokungasilo liciniso: Tihlabelelo 139:8 tifundzisa kutsi Nkulunkulu ukuyo yonkhe indzawo natitsi: “Kube bengingenyukela ezulwini, wena bewutangibona nalapho, kube bengingehlela eThuneni, wena bewutangitfola nalapho.”

Liciniso: LomBhalo awukhulumi ngendzawo yaNkulunkulu yekuhlala. Kodvwa ngalokusankondlo, ufundzisa kutsi kute indzawo lekhashane kuNkulunkulu kutsi asite bantfu bakhe.

a Jehova ligama laNkulunkulu njengobe livetwe eBhayibhelini.