Tiphrofetho Letimayelana NaMesiya Tiyakufakazela Yini Kutsi Jesu Nguye LoMesiya?

DLALA

Lokushiwo liBhayibheli

Yebo, tiyakufakazela. Ngesikhatsi Jesu alapha emhlabeni, wagcwalisa tiphrofetho letinyenti letimayelana ‘neMbusi Logcotjiwe,’ loyo lobekatawuba “nguMsindzisi welive.” (Danyela 9:25; 1 Johane 4:14) Ngisho nangemuva kwekufa kwakhe, Jesu wachubeka wagcwalisa tiphrofetho letimayelana naMesiya.—Tihlabelelo 110:1; Imisebenti 2:34-36.

Kusho kutsini kutsi “Mesiya”?

Ligama lesiHebheru lelitsi Ma·shiʹach (Mesiya) kanye neligama lesiGriki lelitsi Khri·stos (Khristu), omabili asho kutsi “Logcotjiwe.” Ngako-ke, “Jesu Khristu” usho kutsi “Jesu Logcotjiwe,” nome “Jesu longuMesiya.”

Ngetikhatsi teliBhayibheli, ngalokuvamile umuntfu bekagcotjwa ngekutsi atselwe ngemafutsa enhloko nangabe agcotjelwa sikhundla lesikhetsekile. (Levithikhusi 8:12; 1 Samuweli 16:13) Jesu wagcotjwa nguNkulunkulu kutsi abe nguMesiya, lokusikhundla lesikhulu kunato tonkhe. (Imisebenti 2:36) Kunekutsi Nkulunkulu agcobe Jesu ngemafutsa, wamgcoba ngemoya longcwele.—Matewu 3:16.

Tiphrofetho letiphatsele naMesiya tigcwaliseka kubantfu labanyenti yini?

Cha. Njengoba ema-fingerprints aba emuntfu munye, kanjalo nekugcwaliseka kwetiprofetho kwenteka kuMesiya munye, nome Khristu munye. Nome kunjalo, liBhayibheli licwayisa ngekutsi “Kuyawuvela boKhristu mbumbulu nebaphrofethi bemanga, bente tibonakaliso netimangaliso kute badukise bantfu, ngisho nalabakhetsiwe nakungenteka.”—Matewu 24:24.

Kungenteka yini kutsi Mesiya usetawuvela?

Cha. LiBhayibheli labiketela kutsi Mesiya abetovela esitukulwaneni seNkhosi Davide yaka-Israyeli. (Tihlabelelo 89:3, 4) Noma kunjalo, umlandvo weluhla lwekutalwa lwemaJuda lolusukela kuDavide lwalahleka, lokungenteka lonakala ngesikhatsi umbuso wemaRoma uhlasela iJerusalema nga-70 C.E. a Kusukela ngaleso sikhatsi, kulukhuni kufakazela umuntfu lotalwa emndenini waDavide. Ngenca yekutsi letincwadzi teluhla lwekutalwa tatikhona ngesikhatsi saJesu, titsa takhe tehluleka kuphikisa kutsi Jesu abetalwa emndenini waDavide.—Matewu 22:41-46.

Tingaki tiphrofetho letiseBhayibhelini letikhuluma ngaMesiya?

Akusimelula kwati kutsi tingaki tiphrofetho letikhuluma ngaMesiya. Nasi sibonelo, indlela yekubala tiphrofetho ingehluka ngisho nasetincenyeni letikhuluma ngalokucondzile ngaMesiya. Incenye leku-Isaya 53:2-7 ikhuluma ngemininingwane leminingana yetiphrofetho letiphatselene naMesiya. Letinye tindlela tekubala tingashwambakanya yonkhe lemininingwane tiyente siphrofetho sinye, kantsi letinye titsatsa umniningwane ngamunye tiwente tiphrofetho letehlukene.

Letinye tetiphrofetho letiphatselene naMesiya letagcwaliseka kuJesu

Siprofetho	Lapho sitfolakala khona	Kugcwaliseka
Situkulwane sa-Abrahama	Genesisi 22:17, 18	Matewu 1:1
Situkulwane sendvodzana ya-Abrahama Isaka	Genesisi 17:19	Matewu 1:2
Abetawutalelwa endlini yaJuda	Genesisi 49:10	Matewu 1:1, 3
Abetawuvela eluhlwini lweNkhosi Davide	Isaya 9:7	Matewu 1:1
Abetawutalwa yintfombi-ntfo	Isaya 7:14	Matewu 1:18, 22, 23
Abetawutalelwa eBethlehema	Mikha 5:2	Matewu 2:1, 5, 6
Abetawubitwa ngekutsi ngu-Imanyuweli b	Isaya 7:14	Matewu 1:21-23
Abetawuba nesicalo lesiphansi	Isaya 53:2	Lukha 2:7
Bekutawubulawa bantfwana labancane ngemuva kwekutalwa kwakhe	Jeremiya 31:15	Matewu 2:16-18
Abetawubitwa kutsi aphume eGibhithe	Hoseya 11:1	Matewu 2:13-15
Abetawubitwa ngekutsi nguMnazaretha c	Isaya 11:1	Matewu 2:23
Bekutawuba nemuntfu lomlungisela indlela	Malakhi 3:1	Matewu 11:7-10
Abetawugcotjwa kutsi abenguMesiya Nga-29 C.E. d	Danyela 9:25	Matewu 3:13-17
Abetawuvunywa nguNkulunkulu kutsi uyiNdvodzana yakhe	Tihlabelelo 2:7	Imisebenti 13:33, 34
Abetawushisekela indlu yaNkulunkulu	Tihlabelelo 69:9	Johane 2:13-17
Abetawuba ngummemeteli wetindzaba letimnandzi	Isaya 61:1	Lukha 4:16-21
Abetawushumayela eGalile aletse kukhanya lokukhulu	Isaya 9:1, 2	Matewu 4:13-16
Abetokwenta timangaliso njengaMosi	Dutheronomi 18:15	Imisebenti 2:22
Abetawukhuluma imicabango yaNkulunkulu njengaMosi	Dutheronomi 18:18, 19	Johane 12:49
Abetawelapha tifo letinyenti	Isaya 53:4	Matewu 8:16, 17
Abengeke afune kunakwa	Isaya 42:2	Matewu 12:17, 19
Abetawuvelana nalabahluphekile	Isaya 42:3	Matewu 12:9-20; Makho 6:34
Abetawuveta indlela yaNkulunkulu yekwehlulela ngekungakhetsi	Isaya 42:1, 4	Matewu 12:17-20
Abetawuba nguMeluleki Lomangalisako	Isaya 9:6, 7	Johane 6:68
Abetawukwenta kutsi libito laJehova latiwe	Tihlabelelo 22:22	Johane 17:6
Abetawukhuluma ngemifanekiso	Tihlabelelo 78:2	Matewu 13:34, 35
Abetawuba nguMholi	Danyela 9:25	Matewu 23:10
Bantfu labanyenti bebangeke bamkholelwe	Isaya 53:1	Johane 12:37, 38
Abetawuba Lidvwala lekugileka	Isaya 8:14, 15	Matewu 21:42-44
Abetawulahlwa bantfu	Tihlabelelo 118:22, 23	Imisebenti 4:10, 11
Abetawutondvwa ngaphandle kwesizatfu	Tihlabelelo 69:4	Johane 15:24, 25
Bantfu bebatawumemeta ngekujabula nakangena eJerusalema agibele imbongolo	Zakhariya 9:9	Matewu 21:4-9
Abetawudvunyiswa bantfwana	Tihlabelelo 8:2	Matewu 21:15, 16
Abetawukuta ngeligama laJehova	Tihlabelelo 118:26	Johane 12:12, 13
Abetawutsengiswa ngumuntfu lametsembako	Tihlabelelo 41:9	Johane 13:18
Abetawutsengiswa ngetinhlavu letingu-30 telisiliva e	Zakhariya 11:12, 13	Matewu 26:14-16; 27:3-10
Bangani bakhe bebatamhlamuka	Zakhariya 13:7	Matewu 26:31, 56
Bofakazi bemanga bebatawufakaza emanga ngaye	Tihlabelelo 35:11	Matewu 26:59-61
Abengeke abaphendvule bamangaleli bakhe	Isaya 53:7	Matewu 27:12-14
Bekatawukhafulelwa ngematse	Isaya 50:6	Matewu 26:67; 27:27, 30
Bekatawushaywa enhloko	Mikha 5:1	Makho 15:19
Bekatawushaywa emtimbeni	Isaya 50:6	Johane 19:1
Abengeke alwisane nalabo bebamshaya	Isaya 50:6	Johane 18:22, 23
Babusi bebatawumelana naye	Tihlabelelo 2:2	Lukha 23:10-12
Bebatawubetsela tandla netinyawo takhe elugodvweni	Tihlabelelo 22:16	Matewu 27:35; Johane 20:25
Bantfu bebatawukwenta inkatho ngetembatfo takhe	Tihlabelelo 22:18	Johane 19:23, 24
Bekatawubalwa kanye netoni	Isaya 53:12	Matewu 27:38
Abetawutondvwa aphindze etfukwe	Tihlabelelo 22:7, 8	Matewu 27:39-43
Abetawuhlupheka ngenca yetoni	Isaya 53:5, 6	1 Phetro 2:23-25
Bekutawubonakala shengatsi ulahlwe nguNkulunkulu	Tihlabelelo 22:1	Makho 15:34
Bekatawunatsiswa viniga nenyongo	Tihlabelelo 69:21	Matewu 27:34
Bekatawukomela kunatsa ngaphambi nje kwekufa kwakhe	Tihlabelelo 22:15	Johane 19:28, 29
Abetawunikela umoya wakhe kuNkulunkulu	Tihlabelelo 31:5	Lukha 23:46
Abetawunikela ngekuphila kwakhe	Isaya 53:12	Makho 15:37
Abetawuba yinhlawulo lesusa sono	Isaya 53:12	Matewu 20:28
Kute litsambo lakhe lebelitawephulwa	Tihlabelelo 34:20	Johane 19:31-33, 36
Abetawugwazwa	Zakhariya 12:10	Johane 19:33-35, 37
Abetawungcwatjwa netinjinga	Isaya 53:9	Matewu 27:57-60
Abetawuvuswa ekufeni	Tihlabelelo 16:10	Imisebenti 2:29-31
Sikhundla semuntfu lowamtsengisa besitawutsatfwa ngulomunye	Tihlabelelo 109:8	Imisebenti 1:15-20
Abetawuhlala ngesekudla saNkulunkulu	Tihlabelelo 110:1	Imisebenti 2:34-36

a I-Cyclopedia ya-McClintock na-Strong itsi: “Manyenti ematfuba ekutsi tincwadzi temlandvo wetive temaJuda kanye neluhla lwekutalwa lwemindeni yawo lonakala nakubhujiswa iJerusalema, hhayi ngembikwaloko.”

b Ligama lesiHebheru lelitsi Imanyuweli, lelisho kutsi “Nkulunkulu unatsi,” liyichaza kahle indzima yaJesu yekuba nguMesiya. Kuphila kwakhe emhlabeni kanye nemisebenti layenta kufakazela kutsi Nkulunkulu uhlala anato tikhonti takhe.—Lukha 2:27-32; 7:12-16.

c Ligama lelitsi “Nazaretha” livela egameni lesiHebheru lelitsi neʹtser, lelisho kutsi “lihlumela.”

d Kuze utfole imininingwane leseBhayibhelini ngekulandzelana kwayo kuze kufike ku-29 C.E. lokungumnyaka Mesiya labetawuvela ngawo, fundza sihloko lesitsi “Indlela Lesiphrofetho SaDaniyela Lesibiketela Ngayo Kufika KwaMesiya.”

e Lesiphrofetho sibhalwe encwadzini yaZakhariya, noko umbhali weliBhayibheli Matewu utsi lesiphrofetho ‘sakhulunywa ngemphrofethi Jeremiya.’ (Matewu 27:9) Kubonakala shengatsi incwadzi yaJeremiya ngaletinye tikhatsi beyibekwa ekucaleni eluhlwini lwemiBhalo lebitwa ngekutsi tincwadzi “tebaPhrofethi.” (Lukha 24:44) Kungenteka Matewu wasebentisa “Jeremiya” kuze abhekisele kuto tonkhe letincwadzi, letifaka ekhatsi nencwadzi yaZakhariya.

Lokunye Longatsandza Kukuhlola

SICONGOSEKULINDZA

https://cms-imgp.jw-cdn.org/img/p/502018132/univ/art/502018132_univ_sqr_xl.jpg

ijwbq sihloko 146

BoFakazi BaJehova

Tiphrofetho Letimayelana NaMesiya Tiyakufakazela Yini Kutsi Jesu Nguye LoMesiya?

Lokushiwo liBhayibheli

Kusho kutsini kutsi “Mesiya”?

Tiphrofetho letiphatsele naMesiya tigcwaliseka kubantfu labanyenti yini?

Kungenteka yini kutsi Mesiya usetawuvela?

Tingaki tiphrofetho letiseBhayibhelini letikhuluma ngaMesiya?

Letinye tetiphrofetho letiphatselene naMesiya letagcwaliseka kuJesu

Lokunye Longatsandza Kukuhlola

Jesu—Kungani Afa?

Yetama luhlelo lwetfu lwekudadisha liBhayibheli