Cha, tinkholo atifani. LiBhayibheli linetibonelo letinyenti tetinkholo letingamjabulisi Nkulunkulu. Tehlukaniswe taba tinhlobo letimbili.

Luhlobo lwekucala: Kukhonta bonkulunkulu bemanga

 LiBhayibheli lichaza kukhonta bonkulunkulu bemanga ngekutsi ‘kulite’ futsi ‘akunamsebenti.’ (Jeremiya 10:3-5; 16:19, 20) Nkulunkulu Jehova a wayala sive sema-Israyeli asendvulo watsi: “Ungacali ube nalabanye bonkulunkulu ngaphandle kwami.” (Eksodusi 20:3, 23; 23:24) ‘Jehova watfukutsela kakhulu’ ngesikhatsi ema-Israyeli akhonta labanye bankulunkulu.​—Numeri 25:3; Levithikhusi 20:2; Tikhulu 2:13, 14.

 Nkulunkulu solo usativa ngendlela lefanako ngekukhontwa kwalabo ‘labatibita ngekutsi bonkulunkulu.’ (1 KubaseKhorinte 8:5, 6; KubaseGalathiya 4:8) Uyala labo labafuna kumkhonta kutsi bangatihlanganisi nalabo labasenkholweni yemanga, utsi: “Phumani kubo, nitehlukanise nabo.” (2 KubaseKhorinte 6:14-17) Nangabe tonkhe tinkholo tifana futsi temukelwa nguNkulunkulu, pho yini leyamenta wakhipha lomyalo?

Luhlobo lwesibili: Kukhonta Nkulunkulu weliciniso ngendlela langayemukeli

 Ngaletinye tikhatsi, ema-Israyeli bekakhonta Nkulunkulu asebentisa tinkholelo netintfo lebetisetjentiswa nakukhontwa bonkulunkulu bemanga, kodvwa Jehova akazange akwemukele lokubhica kukhonta kweliciniso nekukhonta kwemanga. (Eksodusi 32:8; Dutheronomi 12:2-4) Jesu wabalahla baholi benkholo bangesikhatsi sakhe ngenca yendlela lebebakhonta ngayo Nkulunkulu, ngobe bebenta ngatsi bayakholwa kantsi bayatentisa futsi abatinaki “tintfo letibaluleke kakhulu eMtsetfweni, njengekulunga, sihawu nekwetsembeka.”​—Matewu 23:23.

 Ngendlela lefanako lamuhla, yinkholo lesekelwe ecinisweni kuphela leyemukelwa nguNkulunkulu. Leliciniso litfolakala eBhayibhelini. (Johane 4:24; 17:17; 2 KuThimothi 3:16, 17) Tinkholo letifundzisa tintfo letingavumelani neliBhayibheli tikhweshisa bantfu kuNkulunkulu. Timfundziso letinyenti bantfu labacabanga kutsi titsetfwe eBhayibhelini, letifaka ekhatsi Mtsatfu Amunye, kungafi kwemphefumulo, nekuhlushwa phakadze, tisuselwa ekukhonteni bonkulunkulu bemanga. Kukhonta lokukhutsata letimfundziso “kulite,” futsi akunamsebenti ngenca yekutsi kukhutsata emasiko enkholo esikhundleni saloko Nkulunkulu lakufunako.​—Makho 7:7, 8.

 Nkulunkulu uyakwenyanya kutentisa kwenkholo. (KuThithusi 1:16) Kute isite bantfu basondzele kuNkulunkulu, inkholo kufanele itsintse indlela labaphila ngayo futsi ingagcwali emasiko nekutentisa. Sibonelo saloko, liBhayibheli litsi: “Nangabe umuntfu acabanga kutsi ukhonta Nkulunkulu kodvwa abe angalulawuli lulwimi lwakhe, usuke atiyenga enhlitiyweni, kantsi nekukhonta kwakhe Nkulunkulu kulite. Kukhonta lokuhlantekile nalokungakangcoli embikwaNkulunkulu longuBabe wetfu nguloku: Kunakekela tintsandzane nebafelokati elusizini lwabo, nekutsi umuntfu atigcine ete libala eveni.” (Jakobe 1:26, 27) I-King James Version isebentisa inkhulumo letsi “kukhonta lokuhlantekile” nayichaza lokukhonta lokute kutentisa.