David o re: “Ho a kgathatsa hore e be ke tla be ke ntse ke shebile ka 1:00 hoseng ke etsa di homework. Ntho feela eo ke e batlang ke hore ke robale.”

 Theresa o re: “Ka dinako tse ding ke ne ke bala ho fihlela ka 4:30 hoseng. Ebe ka 6:00 hoseng ke tlameha ho itokisetsa ho ya sekolong. Ho ne ho ntena!”

 Na o utlwa eka di homework tsa hao di ngata haholo? Haeba ho jwalo, sehlooho sena se tla o thusa hore o imolohe.

•  Ke hobaneng ha matitjhere a fa bana di homework?

•  Dikeletso

•  Dithaka tsa hao di reng?

 A mang a mabaka ke hobane homework e . . .

•   o thusa hore o be le tsebo e eketsehileng

•   o thusa hore o be le boikarabelo

•   o thusa hore o sebedise nako hantle

•   o thusa hore o utlwisise o be o sebedise seo o ithutileng sona sekolong a

 Marie o re: “Matitjhere a fa bana ba sekolo di homework hobane a batla ho etsa bo nnete ba hore ba utlwisisa seo ba ithutileng sona le hore ha ba se lebale.”

 Ka ho kgetheha, math le science di thusa motho hore a kgone ho rarolla mathata. Hape ditsebi di re sena se thusa boko. Ka hoo homework di tshwana le ha eka di kwetlisa boko ba hao!

 Ebang o bona molemo wa ho etsa di homework kapa tjhe, tsona o tlamehile o di etse. Ditaba tse monate ke hore: Le hoja o sa kgone ho kgetha hore na o fuwe di homework tse kae, o ka fokotsa nako eo o e qetang o di etsa. A re boneng hore na jwang.

 Haeba o thatafallwa ke ho qeta di homework tsa hao, o ka fumana hore tharollo ke hore o hlophise dintho. Leka ho etsa dintho tse latelang.

•   Keletso ya 1: Hlophisa dintho tsa hao e sa le ka nako. Bibele e re: “Merero ya ya kgothetseng e tlisa molemo.” (Liproverbia 21:5) Etsa bonnete ba hore o na le ntho e nngwe le e nngwe hore o etse homework ya hao e le hore o qobe ho ema ha ngata.

   Hape, kgetha sebaka seo ho sona o tla kgona ho etsa homework ya hao o sa sitisehe. Batho ba bang ba fumane hore sebaka se thotseng le se nang le kganya e lekaneng se hantle. Ba bang ba kgona ho etsa di homework tsa bona haeba ba di etsetsa library.

   Richard o re: “Ho ba le buka kapa calendara eo o ka ngolang di homework tsa hao ho yona, ho ka o thusa hore o sebedise nako ya hao hantle. Ha o tseba hore na o tlameha ho etsa homework efe le hore na o lokela ho fana ka yona neng, seo se tla o thusa hore o se ke wa tshwenyeha.”

•   Keletso ya 2: Hlophisa mosebetsi wa hao. Bibele e re: “Dintho tsohle di ke di etsahale ka . . . tlhophiso.” (1 Bakorinthe 14:40) O ntse o nahanne ka mantswe ao, etsa qeto ya hore na o tla qala ka ho etsa homework efe.

   Batho ba bang ba rata ho qala ka di homework tse thata. Ha ba bang bona ba thabela kgotsofalo e tliswang ke ho qala ka di homework tse bonolo. Kgetha mokgwa o ka o sebeletsang.

   Heidi o re: “Ho a thusa ho ngola dintho tseo o batlang ho di etsa e le hore o tsebe hore na ke efe eo o lokelang ho e etsa pele. Ka tsela e jwalo, o kgona ho laola hore na o etsa di homework tsa hao jwang mme seo se tla o thusa hore o se ke wa bona di le ngata.”

•   Keletso ya 3: Etsa mosebetsi. Bibele e re: “Le se ke la ba botswa mosebetsing wa lona.” (Baroma 12:11) O ka nna wa utlwa eka o ka etsa dintho tse ding, empa o se ke wa di etsa ka nako eo o tlamehang hore ebe o etsa di homework tsa hao ka yona.

   Batho ba sa rateng ho etsa mosebetsi, hangata ba iphumana ba o etsa ba tatile kapa ha ba o etse ho hang, e leng se etsang hore mosebetsi wa bona o se ke wa ba hantle. Ha o etsa mosebetsi wa hao ka nako, seo se tla etsa hore o se ke wa tshwenyeha ho sa hlokahale.

   Serina o re: “Ha ke etsa di homework tsa ka hang feela ha ke tswa sekolong kapa hang feela ha ke di fumana, seo se etsa hore ke se ke ka tshwenyeha ka tsona hamorao, ebile ha di ntshitisi ho etsa dintho tse ding.”

   SEO O KA SE ETSANG: Beha nako eo o etsang di homework tsa hao ka yona mme o dule o di etsa ka nako eo. Seo se tla o thusa hore o be le boitshwaro mme o tsebe nako eo o lokelang ho etsa dintho ka yona.

•   Keletso ya 4: Qoba ditshitiso. Bibele e re: “Mahlo a hao a kganyang a lokela ho tadimisisa ka ho toba ka pela hao.” (Liproverbia 4:25) E le hore o mamele keletso eo, o lokela ho qoba dintho tse ka o sitisang ha o bala, haholoholo disebediswa tsa elektronike.

   Ho kena Inthaneteng le metjheng ya puisano ho ka nka nako e telele ho feta eo o e qetang ha o etsa di homework. Empa haeba o qala ka di homework pele, o tla hlokomela hore ha o na tshwenyeha ka tsona ebile o ba le nako e eketsehileng.

   Joel o re: “Ho ba thata le ho feta hore motho a qete ho etsa di homework tsa hae haeba a shebile founu, khomphiyutha, TV kapa di game. Ntho e nthusang ke hore ke kwale dintho tsohle tse ka ntshitisang.”

•   Keletso ya 5: Etsa dintho ka tekatekano. Bibele e re: “Ho ba le kahlolo e molemo ha lona ho ke ho tsejwe ke batho bohle.” (Bafilipi 4:5) E le hore ho etsa di homework ho se ke ha o tshwenya, nka kgefu. O ka etsa sena ka hore o tsamaye, o kganne bicycle kapa o mathe.

   Haeba o utlwa eka di homework tsa hao di ngata haholo, bua le matitjhere a hao. Haeba ba hlokomela hore o leka ho etsa sohle seo o ka se kgonang, ba ka nna ba di fokotsa.

   Julia o re: “O se ke wa dumella ho tshwenyeha ho tliswang ke ho etsa di homework ho etse hore o se ke wa thaba. Etsa sohle seo o ka se kgonang. Ha ho hlokahale hore dintho tse ding di etse hore o se ke wa thaba mme homework ke e nngwe ya dintho tseo.”

 Ipotse dipotso tsena:

•   Ke tlo hloka eng e le hore ke etse di homework?

•   Nako e nepahetseng ya hore ke etse di homework tsa ka ke efe?

•   Ke tla kgona ho etsa di homework tsa ka ke sa sitisehe ha ke le hokae?

•   Nka qoba ho se batle ho etsa mosebetsi jwang?

•   Ke dintho dife tse ka ntshitisang hore ke se ke ka qeta ho etsa di homework?

•   Nka qoba dintho tse ka ntshitisang jwang?

•   Nka bontsha tekatekano jwang e le hore di homework tsa ka di se ke tsa ntshwenya?

 KGOPOTSO YA BOHLOKWA: Etsa bonnete ba hore o utlwisisa seo ho thweng o se etse ka homework ya hao. Haeba o sa utlwisise homework ya hao hantle, botsa titjhere pele o tloha sekolong.