BATJHA BA A BOTSA
Ke Shebahala Jwang?
Ke hobaneng ha o lokela ho ela hloko tsela eo o aparang ka yona? Diaparo di a bontsha hore na o motho ya jwang. Ebe tsa hao di o hlahisa o le motho ya jwang?
Diphoso tse tharo tseo batho ba di etsang ha ba kgetha moaparo le ka moo re ka di qobang ka teng
Phoso ya #1: Ho susumetswa ke metjha ya phatlalatso.
Motjha ya bitswang Theresa o re: “Ka dinako tse ding ke kgahlwa ke diaparo tse itseng hobane ke bona di bapatswa haholo. Ha kelello ya hao e dula e bona batho ba fapaneng ba apere ntho e itseng ho thata hore le wena o se ke wa e rata.”
Ha se banana feela ba susumetswang ke dipapatso. Buka ya The Everything Guide to Raising Adolescent Boys e re: “Bashanyana le bona ba kgahlwa ke diaparo tsa moraorao. Ba dula ba bona dipapatso tse ba hohelang hore ba reke dintho.”
Tsela e molemo: Bibele e re: “Mang kapa mang ya se nang phihlelo o beha tumelo lentsweng le leng le le leng, empa ya masene o nahana ka mehato ya hae.” (Liproverbia 14:15) Ho ya ka temana ena, leka ho hlahlobisisa dintho tse hlahang dipapatsong. Ka mohlala, ha o bona ho bapatswa diaparo tseo ho thweng “di ntle,” ebile di tla etsa hore “batho ba shebe wena feela,” ipotse:
‘Ha e le hantle ke mang ya tla rua molemo haeba ke latela feshene eo?’
‘Batho ba tla nahana hore ke phela bophelo bo jwang?’
‘Na ehlile ke bona bophelo boo ke bo phelang?’
Keletso ya moaparo: Qeta beke o shebisisa dipapatso tsa diaparo le metjha e meng ya phatlalatso e bontshang diaparo tsa moraorao. Di kgothalletsa bophelo ba mofuta ofe? Na ka tsela e potelletseng di etsa hore o utlwe eka o tlameha ho apara ka tsela e itseng? Motjha e mong ya bitswang Karen o re: “Hona le kgatello e matla ya hore o shebahale o le motle, o apare hantle le ya hore o hlahise mmele wa hao. Ka ha batho ba rekisang diaparo ba a tseba hore batjha ba tlasa kgatello ena, ba rekisetsa bona.”
Phoso ya #2: Ho apara diaparo tse ratwang hore feela o tshwane le dithaka tsa hao.
Motjha e mong ya bitswang Manuel o re: “Haeba diaparo tse itseng di le fesheneng batho bohle ba tlo apara diaparo tseo. Haeba o sa di apare batho ba tlo o makalla.” Motjha e mong ya bitswang Anna le yena o re: “Bothata ha se ho latella feshene empa ke ho leka ho tshwana le dithaka tsa hao.”
Tsela e molemo: Bibele e re: “Le kgaotse ho ba ka sebopeho sa tsamaiso ena ya dintho.” (Baroma 12:2) O nahanne ka keletso eo, sheba diaparo tseo o nang le tsona ebe o ipotsa dipotso tsena:
‘Ke dintho dife tse etsang hore ke kgethe mofuta o itseng wa diaparo?’
‘Diaparo tsa mabitso di bohlokwa hakae ho nna?’
‘Na ke aparela ho kgahlisa batho?’
Keletso ya moaparo: Ha o nahana ka diaparo, o se ke wa nahana feela ka hore ke tse keneng fesheneng tseo batho ba bangata ba reng di ntle kapa ka hore ke tse tswileng fesheneng tseo batho ba sa di batleng. Empa o nahane ka hore na diaparo tseo di etsa hore o ikutlwe o itshepa ebile o sireletsehile. Haeba o itshepa o ke ke wa tshwenyeha ka hore o tla ba mokgelo ho dithaka tsa hao.
Phoso ya #3: Ha ke apere diaparo tse penyang kapa tse hlahisang mmele ke hona ha ke le motle.
Ngwanana e mong ya bitswang Jennifer o re: “Ka dinako tse ding ke kgalla ho apara diaparo tse kgutshwane, tse penyang kapa tse hlahisang mmele.”
Tsela e molemo: Bibele e re: “Le se ke la dumella mokgabo wa lona hore e be wa . . ka ntle, empa e ke e be motho ya ka sephiring wa pelo.” (1 Petrose 3:3, 4) O nahanne ka temana ena, ipotse hore na keng e etsang hore motho a ratehe, na ke diaparo tsa hae tse ntle kapa ke botho ba hae bo ratehang?
Keletso ya moaparo: Ntho e kgahlisang ka ho fetisisa ke ho apara ka tsela e hlomphehang. Ke nnete hore batho ba bangata mehleng ena ha ba sa rata ho apara ka tsela eo. Empa nahana ka taba ena:
Na o kile wa qoqa le motho ya buang haholo a bile a bua ka yena feela? Ntho e bohloko ke hore hangata motho eo ha a hlokomele le hore o a o tena.
Jwalo ka motho ya dulang a bua ka yena feela a etsa hore batho ba se ke ba thabela ho ba le yena, diaparo tse etsang hore batho ba shebe wena feela le tsona di jwalo
Ha o apara ka tsela e sa hlompheheng o ba jwalo ka motho eo. Haeba o apara diaparo tse etsang hore batho ba shebe wena feela, seo se etsa hore o shebahale eka o motho ya sa itshepeng le ya sa nahaneleng batho ba bang. Hape diaparo tseo di ka etsa hore o bonahale o le mohaung wa hore batho ba o shebe le haeba ba sa o shebe ka tsela e nepahetseng. Haeba o sa batle hore batho ba nahane dintho tse fosahetseng ha ba o shebile, leka ho apara ka tsela e hlomphehang.
Motjha e mong ya bitswang Monica o re, “Ho apara ka tsela e hlomphehang ha ho bolele hore o tshwanetse ho apara jwalo ka bonkgono. Empa ho bolela feela hore o a itlhompha le hore o hlompha batho ba o shebileng.”
