Haeba o

•   lebelletse hore o tla dula o fumana dimmaraka tse hodimo kamehla

•   qoba ho etsa dintho tse ntjha hobane o nahana hore o ke ke wa atleha

•   nka hore batho ba bang ha ba o rate haeba ba o tshwaya phoso

 . . . , haeba ho le jwalo, karabo potsong ena e ka hodimo e tla ba E!. Na ho na le taba?

•  Ke eng e phoso ka ho ba motho ya jwalo?

•  Na ebe o ka kgona ho ntlafatsa?

•  Seo batjha ba bang ba se buang

 Ha hona phoso ha o leka ho etsa mosebetsi o tswileng matsoho. Le ha ho le jwalo, “ho na le phapang e kgolo pakeng tsa ho hahamalla ntho le ha o tsitlella ho finyella ntho,” ke seo buka ya Perfectionism​—What’s Bad About Being Too Good? e se buang. E boela e re: “Ho ba ya sa batleng ho etsa diphoso ke morwalo o boima haholo hobane ha re bua nnete feela ha hona motho ya sa etseng diphoso.”

 Bibele e dumellana le seo. E re: “Ha ho motho ya lokileng lefatsheng ya tswelang pele ho etsa se molemo mme a sa etse sebe.” (Moeklesia 7:​20) Ka ha kaofela ha rona ha re ya phethahala, ka dinako tse ding re ka etsa dintho ka tsela e fosahetseng.

 Na ka dinako tse ding o thatafalwa ke ho amohela seo? Haeba ho jwalo, hlokomela ditsela tse nne tse ka etsang hore ho be kotsi hore o be motho ya batlang ho etsa se nepahetseng kamehla.

1.   Kamoo o iponang kateng. Batho ba batlang ho etsa se nepahetseng kamehla ba batla ho finyella dintho tseo ho sa kgonahaleng hore motho a ka di finyella. “Bonneteng, ha ho kgonahale hore re ipabole nthong e nngwe le e nngwe, mme haeba re tswela pele ho lwantshana le seo re ka qetella re se re sa itshepe. Seo se ka etsa hore o ikutlwe o hatelehile maikutlong.”​—Alicia.

2.   Tsela eo o amohelang keletso ka yona. Batho ba sa batleng ho fosa kamehla ha ba batle ho mamela ha ba fuwa keletso. Motjha e mong ya bitswang Jeremy o re “Ha ke fuwa keletso ke batho ba bang ke ikutlwa ke le mosesane haholo.” O boela o re, “Ho ba ya sa batleng ho fosa ho etsa hore o se ke wa amohela hore bokgoni ba hao bo fella moeding o itseng mme seo se ka etsa hore ho be thata hore o amohele thuso ya ba bang.”

3.   Kamoo o shebang ba bang kateng. Hangata batho ba sa batleng ho fosa ba nyatsa batho ba bang, mme ho bonolo ho bona lebaka la seo. “Haeba o sa batle ho etsa diphoso, o lebelletse hore le ba bang ba etse se tswanang. O ikutlwa o nyahame haebe ba hlolehile ho etsa seo o neng o se lebelletse.” ke seo Anna ya dilemo di 18 a se buang.

4.   Kamoo ba bang ba o shebang kateng. Haeba o dula o batla hore dintho di etswe ka tsela ya hao o se ke wa makala ha ho se ho se motho ya batlang ho ba motswalle wa hao! “Ho wa kgathatsa ho dula o batla ho finyelle dintho tse sa kgonahaleng, hore feela o thabise motho ya sa batleng ho etsa phoso,” ke seo Beth a se buang. “Ha ho na motho ya ka thabelang ho ba motswalle wa motho ya jwalo!”

 Bibele e re: “Ho ba le kahlolo e molemo ha lona ho ke ho tsejwe.” (Bafilipi 4:5) Batho ba nang le kahlolo e molemo ba tseba seo ba lokelang ho se lebella ho seo ba kgonang ho se etsa, le seo ba lokelang ho se lebella ho batho ba bang.

 “Ho na le diteko tse ngata tseo motho a thulanang le tsona. Ke hobaneng ha o lokela ho baka mathata a sa hlokahaleng ka ho dula o batla hore dintho di etswe ka tsela ya hao kamehla? Hoo ke ho baka morwalo o sa hlokahaleng!”​—Nyla.

 Bibele e re: “O inyenyefatse ha o tsamaya le Modimo!” (Mikea 6:8) Batho ba ikokobeditseng ba tseba moo ba lokelang ho fella teng ha ba etsa dintho. Ha ba ikimetse ka dintho tseo ba sa kgoneng ho di etsa, ebile ha ba qete nako e ngata ho tsona.

 “Haeba ke batla ho ikutlwa eka ke nka boikarabelo, ke etsa feela mosebetsi oo ke ka kgonang ho o etsa. Ke kgona ho etsa ntho e le nngwe ka nako.”​—Hailey.

 Bibele e re: “Sohle seo letsoho la hao le fumanang hore le ka se etsa, o se etse ka matla a hao.” (Moeklesia 9:​10) Tharollo ya hore o kgaotse ho ba ya sa batleng ho etsa diphoso hase hore o be botswa, empa ke ho ba mafolofolo, mme o lokela ho nahana ka di tshobotsi tseo re buileng ka tsona ka hodimo​—E leng ho ba le kahlolo e molemo le ho inyeyefatsa.

 “Ke leka ka hohle kamoo nka kgonang ho etsa mosebetsi o tswileng matsoho, ke etsa sohle se matleng a ka. Ke hlokometse hore mosebetsi wa ka o ke ke wa ba o senang diphoso, empa ke thabiswa ke hore ke entse sohle seo ke kgonang ho se etsa.”​—Joshua.