Modimo ke yena ya kgethang Bakreste ba mmalwa ba tshepahalang bao ka mora hore ba hlokahale ba tla tsosetswa hore ba ilo phela lehodimong. (1 Petrose 1:​3, 4) Hang fela ha ba qeta ho kgethwa, ba lokela ho tswela pele ba itshwere hantle ebile ba ena le tumelo e matla e le hore ba se ke ba amohuwa lefa la bona la ho phela lehodimong.​—Baefese 5:5; Bafilipi 3:​12-​14.

Batho ba yang lehodimong ba ilo etsang moo?

 Ba tla sebetsa mmoho le Jesu e le marena le baprista ka dilemo tse 1 000. (Tšenolo 5:​9, 10; 20:6) Ba tla theha mmuso lehodimong e leng “mahodimo a matjha” mme mmuso oo o tla busa batho lefatsheng e leng “lefatshe le letjha.” Babusi bao ba tla thusa hore batho ba phele ka tsela eo Modimo a neng a batla hore batho ba phele ka yona ho tloha qalong.​—Esaia 65:17; 2 Petrose 3:​13.

Ke batho ba bakae ba tla tsosetswa lehodimong?

 Bibele e re ke batho ba 144 000 ba tla tsosetswa lehodimong. (Tšenolo 7:4) Ponong e ngotsweng lengolong la Tšenolo 14:​1-3, moapostola Johanne o ile a bona “Konyana e emeng Thabeng ya Sione, e ena le ba dikete tse lekgolo le mashome a mane a metso e mene.” Ponong ena, “Konyana” e emela Jesu. (Johanne 1:​29; 1 Petrose 1:​19) ‘Thaba ya Sione’ e emela boemo bo phahameng ba Jesu le ba Bakreste ba 144,000 ba tla busa le yena lehodimong.​—Pesaleme 2:6; Baheberu 12:22.

 “Ba bitsitsweng le ba kgethilweng” ho busa le Kreste Mmusong wa Modimo ba bitswa “mohlatswana.” (Tšenolo 17:14; Luka 12:32) Sena se bontsha hore e tla be e le palo e nyenyane haholo ha e bapiswa le palo ya mohlape wohle wa Jesu.​—Johanne 10:16.

Dintho tseo e seng nnete tse buuang ka batho ba yang lehodimong

 Seo e seng nnete: Palo ya 144,000 e hlahang lengolong la Tšenolo, empa feela e le tshwantshetso.

 Nnete: Le hoja dipalo tse ding tse bukeng ya Tšenolo di emela ntho e itseng, empa tse ding tsona ha di jwalo. Ka mohlala, buka ena e bua ka “mabitso a leshome le metso e mmedi a baapostola ba leshome le metso e mmedi ba Konyana.” (Tšenolo 21:​14) Ela hloko bopaki bo bontshang hore na ke hobaneng ha re ka re palo ya 144,000 ha se ya tshwantshetso.

 Tšenolo 7:4 e bua ka ‘palo ya ba neng ba tiisitswe [kapa ba tla phela lehodimong], ba dikete tse lekgolo le mashome a mane a metso e mene.’ Buka ena ha e tswela pele e bua ka sehlopha sa bobedi e leng “bongata bo boholo, boo ho seng motho ya neng a kgona ho bo bala.” Ba “bongata bo boholo” le bona ba fumana poloko e tswang ho Modimo. (Tšenolo 7:​9, 10) Haeba palo ena ya 144,000 e ne e le ya tshwantshetso mme e bolela feela hore ke batho ba bangata, e ne e tla ba ho sa utlwahaleng ha ho buuwa ka sehlopha sa bobedi sa bongata bo boholo. a

 Ho ekelletsa moo, ba 144,000 ba hlaloswa “ba rekilwe hara moloko wa batho jwalo ka ditholwana tsa pele.” (Tšenolo 14:4) Ha ho buuwa ka “ditholwana tsa pele,” ho bolelwa sehlotshwana se senyenyane sa batho. Bana ke batho ba tla busa le Kreste lehodimong mme ba buse bongata bo tla phela lefatsheng.​—Tšenolo 5:10.