Ho Baheberu 13:1-25
13 Le dule le ratana jwalo ka bana ba motho.+
2 Le se ke la lebala ho amohela baeti*+ hobane ba bang ba entseng jwalo ba ile ba amohela mangeloi ba sa tsebe.+
3 Le dule le nahana ka bana ba bo rona ba diteronkong+ jwalo ka ha eka le kwaletswe le bona.+ Hape le dule le nahana ka ba tshwarwang hampe hobane le lona le ntse le phela lefatsheng.*
4 Batho bohle ba hlomphe lenyalo mme monna le mosadi ba lokela ho tshepahallana*+ hobane Modimo o tla ahlola ba etsang boitshwaro bo bobe bo amanang le thobalano* le ba febang.+
5 Le se ke la rata tjhelete+ empa le kgotsofalle dintho tseo le nang le tsona+ hobane Modimo o itse: “Ho hang nke ke ka o tlohela kapa ka o furalla.”+
6 Ka hona, a re beng sebete mme re re: “Nke ke ka tshoha letho hobane Jehova* ke mothusi wa ka. Motho a ka nketsang?”+
7 Hopolang ba le etellang pele,+ ba le boleletseng lentswe la Modimo mme ha le ntse le nahanisisa ka melemo ya boitshwaro ba bona, le etsise tumelo ya bona.+
8 Jesu Kreste o a tshwana maobane, kajeno le ka ho sa feleng.
9 Le se ke la kgeloswa ke dithuto tse fapaneng tse sa tlwaelehang. Ntho e tla le thusa hore le dule le tiile* ke mosa* wa Modimo eseng dijo* hobane ha di na molemo wa letho ho batho ba amehileng ka tsona.+
10 Re na le aletare eo batho ba sebeletsang tabernakeleng ba sa tshwanelang ho ja letho le ho yona.+
11 Ditopo tsa diphoofolo tse nyehetsweng di ne di tjhesetswa ka ntle ho diahelo empa moprista ya phahameng o ne a isa madi a tsona sebakeng se halalelang hore a etse nyehelo ya sebe ka ona.+
12 Ka hoo, Jesu le yena o ile a hlokofatswa a le ka ntle ho motse*+ e le hore a ka halaletsa batho ka madi a hae.+
13 A re yeng ho yena ka ntle ho diahelo, re mamelle ho tlotlollwa jwalo ka ha le yena a ile a etsa+
14 ka ha hona jwale ha re na motse o tshwarellang empa re ntse re batlana le o tlang.+
15 Ka lebaka la tumelo eo re nang le yona ho Jesu, re lokela ho dula re rorisa Modimo. Ho etsa jwalo ho tshwana le ho mo etsetsa sehlabelo.+ Re bolela lebitso la hae phatlalatsa+ ka melomo ya rona.+
16 Le se ke la lebala ho etsa dintho tse molemo le ho arolela ba bang dintho tseo le nang le tsona+ hobane Modimo o thabiswa ke mahlabelo a jwalo.+
17 Mamelang ba le etellang pele+ le be le ikokobeletse bona+ hobane ba dula ba le hlokometse ka ha Modimo o tla ba ahlola.+ Haeba le etsa jwalo, ba tla etsa mosebetsi wa bona ba thabile eseng ba utlwile bohloko. Haeba ba ne ba ka o etsa ba utlwile bohloko, le ne le tla ba kotsing.
18 Le dule le re rapella hobane re dumela hore re na le matswalo a kgutsitseng* ebile re lakatsa ho etsa dintho tsohle ka botshepehi.+
19 Haholoholo ke kopa le rapelle hore ke kgutlele ho lona haufinyane.
20 Modimo wa kgotso o ile a tsosa Morena wa rona Jesu bafung. Jesu ke yena ya ileng a tlisa madi a selekane se sa feleng ebile ke yena modisa e moholo.+ E se eka Modimo wa kgotso
21 a ka le fa ntho e nngwe le e nngwe e molemo e le hore le ka etsa thato ya hae. Ke rapella hore a sebedise Jesu ho re susumetsa hore re etse dintho tse mo kgahlisang. Modimo a ke a tlotliswe ka ho sa feleng. Amen.
22 Bana beso, ke le kopa hore le mamele mantswe ana a kgothatsang hobane ke le ngoletse lengolo le lekgutshwanyane.
23 Ke batla hore le tsebe hore Timothea ngwanabo rona o lokolotswe. Haeba a ka tla kapele, ke tla tla le yena re tlo le bona.
24 Le ntumedisetse bohle ba le etellang pele le bana ba bo rona bohle. Bana ba bo rona ba Italy+ ba re le dumele.
25 E se eka Modimo a ka ba mosa ho lona kaofela.
Dintlha tse qetellong ya sehloho
^ Kapa: “ho ba mosa ho batho bao le sa ba tsebeng.”
^ Kapa mohlomong: “jwalo ka ha eka le utlwa bohloko le bona.”
^ Kapa: “diphate tsa lenyalo di hloke ditshila.”
^ Sheba Ntlha ya A5.
^ E leng melao ya dijo.
^ Ka Segerike: “le matlafatse dipelo.”
^ Ka Segerike: “ka ntle ho keiti ya motse.”
^ Kapa: “a tshepahalang.”
