Ho Baroma 1:1-32
1 Lengolo lena le tswa ho nna Pauluse, lekgoba la Jesu Kreste. Ke bitseditswe ho ba moapostola ebile ke kgethetswe ho bolela ditaba tse monate tsa Modimo.+
2 Modimo o ile a phatlalatsa ditaba tsena esale pele ka Mangolong a halalelang a sebedisa baprofeta ba hae.
3 Ke ditaba tse mabapi le Mora wa hae eo e neng e le setloholo sa Davida.+
4 Ho ile ha hlaka hore ke Mora Modimo+ ha Modimo a sebedisa matla a moya o halalelang ho mo tsosa bafung.+ Enwa ke yena Jesu Kreste Morena wa rona.
5 Ke ka lebaka la hae Modimo a ileng a ba mosa* ho rona, ka ba ka kgethwa hore ke be moapostola+ e le hore ke thuse batho ba ditjhaba tsohle ho mamela,+ ho ba le tumelo le ho hlompha lebitso la hae.
6 Le lona le tswa ditjhabeng tseo Modimo a di bitsitseng hore di latele Jesu Kreste.
7 Ke ngolla lona bohle ba ratwang ke Modimo ba leng Roma, ba kgethetsweng ho ba bahalaledi:
E se eka Modimo Ntate wa rona le Morena Jesu Kreste ba ka ba mosa ho lona le ho le fa kgotso.
8 Pele ho tsohle, ke leboha Modimo wa ka ka lebitso la Jesu Kreste ka lebaka la lona kaofela hobane batho lefatsheng lohle ba bua ka tumelo ya lona.
9 Etswe Modimo eo ke mo sebeletsang ka pelo yohle* ka ho phatlalatsa ditaba tse monate ka Mora wa hae, a ka mpakela hore ka mehla ke bua ka lona dithapelong tsa ka.+
10 Ke rapella hore haeba ho kgoneha ebile e le thato ya Modimo, ke qetelle ke tlile ho lona.
11 Ke labalabela ho le bona e le hore ke le fe mpho e tswang ho Modimo hore le tle le matlafale
12 kapa e le hore nna le lona re ka kgothatsana+ ka tumelo ya rona.
13 Bana beso, ke batla hore le tsebe hore ke ile ka rera ho tla ho lona ka makgetlo a mangata empa ka nna ka hloleha ho tla ho fihlela hona jwale. Ke ne ke batla ho tla bona ditholwana tse ntle tsa mosebetsi oo re o entseng moo jwalo ka ha ho bile le ditholwana le ditjhabeng tse ding.
14 Ke kolota Bagerike le batho bao e seng Bagerike,* batho ba rutehileng le ba sa rutehang.
15 Ka hoo, ke labalabela ho le bolella ditaba tse monate moo Roma.+
16 Ha ke swabele ho phatlalatsa ditaba tse monate tsa Modimo.+ Ditaba tsena ke bopaki ba matla a Modimo mme a ka pholosa bohle ba nang le tumelo.+ O qala ka Bajuda pele+ ebe o fetela ho Bagerike.+
17 Modimo o tsebahatsa ditsela tsa hae tse lokileng ho batho ba nang le tumelo mme ho etsa jwalo ho matlafatsa tumelo ya bona+ feela jwalo ka ha Mangolo a re: “Ya lokileng o tla phela hobane a ena le tumelo.”+
18 Modimo o ntse a senola kgalefo ya hae+ a le lehodimong, o halefisitswe ke dintho tsohle tse sa lokang tseo batho ba di etsang. Batho bao ba thibela nnete+ hore e se ke ya tsebahala.
19 Ba tlameha hore ebe ba tseba Modimo hobane o se a ntse a ba bontshitse dintho tse ngata ka yena.+
20 Le hoja Modimo a ke ke a bonwa, makgabane a hae a bonwa ka ho hlaka dinthong tseo a di bopileng lefatsheng hobane batho ba ka a bona ha ba di sheba.+ Dintho tseo a di bopileng ke bopaki ba matla a hae a sa feleng+ le hore ke Modimo.+ Batho ba hanang bopaki boo ha ba na mabaka a ho ikemela.
21 Le hoja ba tsebile Modimo, ha ba a ka ba mo tlotlisa kapa ba mo leboha empa ba ile ba nahana dintho tse se nang thuso, le dikelello* tsa bona tsa hloka kutlwisiso.+
22 Le hoja ba ne ba re ba bohlale, e ne e le dithoto.
23 Ho ena le hore ba rorise Modimo ya sa shweng, ba kgetha ho rorisa ditshwantsho tsa batho, dinonyana, dihahabi le diphoofolo tse maoto a mane.+
24 Ka hona, Modimo o a ba tlohela hore ba phethe ditakatso tse ditshila tsa dipelo tsa bona mme ba etse dintho tse swabisang ka mmele ya bona.
25 Ba kgethile ho dumela leshano ho ena le ho dumela nnete e tswang ho Modimo. Ba rorisa le ho sebeletsa* dintho tseo Modimo a di bopileng ho ena le ho rorisa Mmopi wa tsona. O lokela ho roriswa ka ho sa feleng. Amen.
26 Ka hoo, Modimo o ba tlohetse hore ba laolwe ke ditakatso tsa bona tse swabisang tsa thobalano.+ Basadi ba tlohetse ho etsa thobalano ka tsela ya tlhaho mme ba sebedisa mmele ya bona ka tsela eo e seng ya tlhaho.+
27 Banna le bona ba se ba tlohetse ho robala le basadi mme ba lakatsana ka bobona, banna ba etsa dintho tse nyonyehang le banna ba bang+ mme ba fumana kotlo* e feletseng bakeng sa diphoso tsa bona.+
28 Ka ha ba nkile ho se bohlokwa ho tseba Modimo,* o ba tlohetse hore ba nahane ka dintho tse se nang thuso le hore ba etse dintho tseo ba sa lokelang ho di etsa.+
29 Ha ba a loka ho hang,+ ba kgopo, ba meharo,+ ba mona,+ ke babolai,+ ba rata ntwa, ba leshano,+ ba rata ho utlwisa batho bohloko+ ebile ba rata ho seba batho ba bang.
30 Ba bua batho ba bang hampe,+ ba hloile Modimo, ke banyefodi, ba a ikgohomosa, ba rata ho ithorisa, ba rera dintho tse mpe* ebile ha ba mamele batswadi.+
31 Ba dihlooho di thata,+ ha ba tshepahalle ditumellano, ha ba rate batho ba bang ebile ha ba na mohau.
32 Ba tseba hantle hore Molao wa Modimo o re ba tlwaetseng ho etsa dintho tseo ba tshwanelwa ke lefu+ empa ba tswela pele ho di etsa ebile ba dumellana le batho ba di etsang.
Dintlha tse qetellong ya sehloho
^ Ka Segerike: “ka moya wa ka.”
^ Kapa: “baditjhaba.” Ka Segerike: “Babarebare.”
^ Ka Segerike: “dipelo.”
^ Kapa: “rapela.”
^ Kapa: “moputso.”
^ Kapa: “ha ba a ka ba batla ho ba le tsebo e nepahetseng ka Modimo.”
^ Kapa: “ba qapa dintho tse mpe.”
