Ho Baroma 10:1-21
10 Bana beso, takatso ya pelo ya ka le thapelo e matla eo ke e etsang ho Modimo bakeng sa batho ba heso ke hore ba pholoswe.+
2 Ke a ba pakela hore ba tjhesehela Modimo+ empa eseng ho ya ka tsebo e nepahetseng.
3 Ka ha ha ba tsebe hore na Modimo o re ke eng e nepahetseng,+ ba etsa dintho tseo bona ba nahanang hore di nepahetse.+ Ka hoo, ha ba mamele melao ya Modimo e bontshang hore na ke eng e nepahetseng.+
4 Kreste o fedisitse Molao+ e le hore e mong le e mong ya bontshang tumelo a ka nkwa a lokile.+
5 Moshe o ile a re motho ya etsang dintho tse nepahetseng ho ya ka Molao o tla phela.+
6 Empa ha lentswe la Modimo le bua ka motho ya lokileng hobane a bontsha tumelo le re: “O se ke wa re ka pelong ya hao,+ ‘Ke mang ya tla nyolohela lehodimong?’+ Ke hore ke mang ya tla nyolohela lehodimong a theole Kreste?
7 Hape o se ke wa re: ‘Ke mang ya tla theohela botebong ba lefatshe?’+ Ke hore a yo tsosa Kreste bafung?”
8 Mangolo a reng? A re: “Lentswe le haufi le lona, le melomong ya lona mme le ka dipelong tsa lona.”+ Lentswe leo ke molaetsa oo re o bolelang o hlokang hore batho ba be le tumelo.
9 Haeba o bolela phatlalatsa hore Jesu ke Morena+ ebile o dumela ka pelong ya hao hore Modimo o mo tsositse bafung, o tla pholoha.
10 Ha motho a bontsha tumelo e tswang pelong, e ba motho ya lokileng empa ha a bolella ba bang ka tumelo ya hae+ o tla pholoha.
11 Etswe Mangolo a re: “Mang kapa mang ya dumelang ho yena a ke ke a phoqeha.”+
12 Ha ho na phapang pakeng tsa Mojuda le Mogerike.+ Kaofela ha rona re na le Morena a le mong ya thusang bohle ba kopang thuso.
13 Etswe “e mong le e mong ya tshepetseng* lebitsong la Jehova* o tla pholoha.”+
14 Le ha ho le jwalo, ba tla mo tshepa jwang empa ba sa dumele ho yena? Hape ba tla dumela ho yena jwang empa ba eso ka ba utlwela ka yena? Hape ba tla tseba ka yena jwang ho se ya ba bolellang?
15 Hape ba tla bolela jwang empa ho se ya ba rommeng?+ Etswe Mangolo a re: “A matle hakaakang maoto a ba bolelang ditaba tse monate!”+
16 Le ha ho le jwalo, ha se bohle ba ileng ba mamela ditaba tseo. Etswe Esaia o re: “Jehova,* ke mang ya dumetseng ntho eo re e tlalehileng?”+
17 Ka hoo, motho o ba le tumelo ka mora hore a utlwe lentswe+ mme lentswe leo le utluwa ha motho e mong a bua ka Kreste.
18 Na Baiseraele ha ba a ka ba utlwa? E, ba ile ba utlwa. Ebile Mangolo a re: “Batho lefatsheng lohle ba utlwile molaetsa oo mme wa fihla le dikarolong tse hole tsa lefatshe.”+
19 Ke boetse ke a botsa, na Baiseraele ba ne ba sa tsebe?+ Moshe o ile a qala ka ho re: “Ke tla etsa hore o halefele batho bao e seng setjhaba sa ka, ke tla o kgopisa ka setjhaba se se nang kelello.”+
20 Esaia yena o ile a bua ka sebete a re: “Ke ile ka fumanwa ke ba sa mpatleng+ mme ka tsejwa ke ba neng ba sa batle ho ntseba.”+
21 Empa ha a bua ka Baiseraele o re: “Ke otlolotse matsoho a ka letsatsi lohle bakeng sa setjhaba sena se manganga le se sa mameleng.”+
