Ho Baroma 13:1-14
13 Motho e mong le e mong a hlomphe balaodi ba phahameng+ ka ha ba teng ka lebaka la Modimo.+ Balaodi ba leng teng ba behilwe maemong a bona a fapaneng ke Modimo.+
2 Ka hona, ya hanyetsang bolaodi o hanyetsa seo Modimo a se thehileng mme ba se hanyetsang ba tla ahlolwa.
3 Balaodi ha ba tshajwe ke batho ba etsang dintho tse ntle empa ba tshajwa ke ba etsang dintho tse mpe.+ Ha o sa batle ho tshaba balaodi,+ o nne o etse dintho tse ntle mme ba tla o rorisa.
4 Ba sebeletsa Modimo molemong wa hao. Empa o lokela ho tshoha haeba o etsa dintho tse fosahetseng hobane ba fuwe matla* le tokelo ya ho otla ba etsang dintho tse fosahetseng. Ke basebeletsi ba Modimo ba otlang batho ba etsang dintho tse fosahetseng.
5 Ka hona, le na le mabaka a le tlamang hore le mamele, eseng feela hore le balehe kotlo empa hape hore le be le matswalo a kgutsitseng.+
6 Ke ka lebaka leo hape le ntshang makgetho hobane Modimo o a ba sebedisa hore ba sebeletse setjhaba ka mehla.
7 Fang bohle tse ba lokelang, ya batlang lekgetho la mofuta ofe kapa ofe le mo fe lona,+ ya batlang ho tshajwa le mo tshabe,+ ya batlang ho hlomphuwa le mo hlomphe.+
8 Le se ke la kolota mang kapa mang letho haese lerato+ ka ha ya ratang wa habo o phethahaditse molao.+
9 Etswe molao o reng, “O se ke wa feba,+ o se ke wa bolaya,+ o se ke wa utswa,+ o se ke wa lakatsa dintho tsa motho e mong”+ le taelo efe kapa efe e teng, e akareditswe polelong ena e reng: “O rate moahisani wa hao jwalo ka ha o ithata.”+
10 Ya ratang wa habo ha a mo etse hampe.+ Ka hoo, ho ba le lerato ke ho etsa seo molao o se laelang.+
11 Le etse dintho tsena hobane le a tseba hore nako e se e fihlile ya hore le tsohe borokong.+ Nako ya hore re pholoswe e haufi haholo ho feta ha re ne re eba badumedi.
12 Bosiu bo se bo tla sa, letsatsi le atametse. Ka hona, a re hloboleng mesebetsi ya lefifi+ mme re apareng dihlomo tsa lesedi.+
13 A re itshwareng hantle+ jwalo ka ha batho ba itshwara hantle motshehare. Re se ke ra tsamaya diphathi tse sa laoleheng, ra tahwa, ra etsa boitshwaro bo bobe bo amanang le thobalano, ra etsa boitshwaro bo bobe re sa swabe,*+ ra lwana kapa ra monela batho ba bang.+
14 Empa le etsise Morena Jesu Kreste*+ mme le se ke la rera esale pele hore na le tla kgotsofatsa ditakatso tse fosahetseng jwang.+
Dintlha tse qetellong ya sehloho
^ Ka Segerike: “sabole.”
^ Kapa: “boitshwaro bo hlabisang dihlong.” Ka Segerike ke bongata ba lentswe a·sel′gei·a. Sheba Tlhaloso.
^ Ka Segerike: “le apare Morena Jesu Kreste.”
